އައްޑޫގައި ގާއިމު ކުރާ ކުނިން ހަކަތަ އުފައްދާ ޕްލާންޓުގެ މަސައްކަތް އަންނަ ޖުލައި މަހަށް ނިންމާލެވޭތޯ މަސަައްކަތް ކުރަމުން އަންނަ ކަމަށް ތިމާވެއްޓާ ބެހޭ މިނިސްޓްރީން ބުނެފި އެވެ.
ކުނިން ހަކަތަ އުފައްދައި ރައްކާތެރި ގޮތުގައި ކުނި މެނޭޖު ކުރުމަށް ސަރުކާރުން ގެންގުޅޭ ސިޔާސަތުގެ ދަށުން ކުނިން ހަކަތަ އުފައްދާ ޕްލާންޓެއް އެންމެ ފުރަތަމަ އައްޑޫގައި ގާއިމު ކުރުމަށް ނިންމީ މިދިޔަ އަހަރުގެ މެއި މަހުގެ ތެރޭގަ އެވެ.
އެ ޕްލާންޓު ރާއްޖޭން ބޭރުން ޑިޒައިންކޮށް ހެދުމަށްފަހު މިހާރު ވަނީ އައްޑޫގައި ބެހެއްޓުމަށް ގެންގޮސްފަ އެވެ.
ކުނިން ހަކަތަ އުފައްދާ ނިޒާމުގެ މަސައްކަތް އެންވައިރަންޓު މިނިސްޓަރީގެ ބޭފުޅުން ބައްލަވާލައްވަނީ -- ފޮޓޯ: މިނިސްޓަރީ
ތިމާވެއްޓާ ބެހޭ މިނިސްޓްރީން ބުނީ އެ ޕްލާންޓުގެ އިންސްޓޯލޭޝަން މަސައްކަތުގެ 95 ޕަސެންޓު މަސައްކަތް މިހާރު ނިމިފައިވާ ކަމަށާއި މިހާރު ކުރަމުން ދަނީ އެ ޕްލާންޓު ހިންގުމަށްޓަކައި ހަދަންޖެހޭ ކޮންޓްރޯލް އިމާރާތާއި ވޭސްޓު އިންޓޭކު ބިލްޑިންގެ މަސައްކަތް ކަމަށެވެ.
އައްޑޫގައި ގާއިމު ކުރާ އެ ޕްލާންޓަކީ ދުވާލަކު 50 ޓަނުގެ ކުނި އަންދައިގެން ހަކަތަ އުފެއްދުމަށް ޑިޒައިން ކޮށްފައިވާ ޕްލާންޓެކެވެ. އެ ޕްލާންޓުން 1.5 މެގަވޯޓުގެ ކަރަންޓު އުފައްދާނެ ކަމަށް ތިމާވެއްޓާ ބެހޭ މިނިސްޓްރީން ބުނެ އެވެ.
އެ ޕްލާންޓުން އުފައްދާ ހަކަތައިގެ ތެރެއިން އެއް މެގަވޯޓުގެ ހަކަތަ އައްޑޫގެ ސެންޓްރަލް ގްރިޑާ ގުޅާލާނެ އެވެ. ބާކީ 500 ކިލޯވޯޓުގެ ހަކަތަ ބޭނުން ކުރާނީ އެ ފެސިލިޓީގެ ބޭނުމަށެވެ.
އައްޑޫގައި ކުނިން ހަކަތަ އުފެއްދުމުގެ ނިޒާމު ގާއިމު ކުރުމުގެ މަސައްކަތް ކުރަމުން ދަނީ ދެކުނު ކޮރެއާގެ ކުންފުނި، ލޮޓަސް ކުންވަ ޖޮއިންޓް ވެންޗާ އިންނެވެ.
