އިދިކޮޅު ޕީޕީއެމް-ޕީއެންސީ ކޯލިޝަންގެ އިސް އޮފިޝަލުން ލަންކާގައި ތިއްބަވާ ޔޫރަޕިއަން ޔޫނިއަން (އީޔޫ) ގެ ސަފީރުންނާ ބައްދަލުކޮށް ކުރީގެ ރައީސް އަބްދުﷲ ޔާމީނަށް ކުރި 11 އަހަރުގެ ޖަލު ހުކުމާ މެދު މަޝްވަރާކޮށްފި އެވެ.
އެ ކޯލިޝަނުން މިއަދު ނެރުނު ބަޔާނެއްގައި ބުނެފައިވަނީ ލަންކާގައި ކުރިއަށްދިޔަ މި މަޝްވަރާތަކުގައި އެ ކޯލިޝަނުން ބައިވެރިވި ޓީމުގައި ޔާމީނުގެ ވަކީލު ޑރ. މުހައްމަދު ޖަމީލު، ޕީޕީއެމްގެ ނައިބު ރައީސް އަހުމަދު ޝިޔާމް، ޕީއެންސީގެ ނައިބު ރައީސް މުހައްމަދު ސައީދު، އަދި ޔާމީނުގެ ދަރިކަލުން ޒައިން އަބްދުﷲ ޔާމީން ވެސް ހިމެނިވަޑައިގަންނަވާ ކަމަށެވެ.
އީޔޫގެ ގައުމުތަކުގެ ތެރެއިން އެ މަޝްވަރާތަކުގައި ބައިވެރިވީ ޖަރުމަނު، ނެދަލޭންޑްސް، ފްރާންސް، އިޓަލީ އަދި ރޯމޭނިއާގެ ސަފީރުންނެވެ.
ކޯލިޝަންގެ ބަޔާނުގައި ބުނެފައިވާ ގޮތުން އެ މަޝްވަރާތަކުގައި އެ ފަރާތުން ވަނީ ރައީސް ޔާމީނުގެ މައްޗަށް ކުރި ހުކުމަކީ ބޭއިންސާފުން ކޮށްފައިވާ ހުކުމެއް ކަމަށް ބުނެ ޔާމީނަށް އިންސާފު ހޯދައިދިނުމަށް އީޔޫގެ ގައުމުތަކުގެ އަރިހުން އެދިފަ އެވެ. އަދި މި ސަރުކާރުން ރާއްޖޭގެ ޑިމޮކްރަސީ ނެގެހެއްޓުމަށް ނުކުޅެދިފައިވާ ކަމަށް ވެސް އެ ކޯލިޝަނުން މަޝްވަރާތަކުގައި ފާހަގަކުރި ކަމަށް ބަޔާނުގައި ވަނީ ބުނެފަ އެވެ.
އޭގެ އިތުރުން އިދިކޮޅު ކޯލިޝަނުން ވަނީ ޔާމީނަކީ އެ ކޯލިޝަނުގެ ރިޔާސީ ކެންޑިޑޭޓު ކަމަށް ބުނާ ބުނުން ތަކުރާރުކޮށް، ޔާމީނަށް އިންސާފު ހޯދުމަށް ކުރެވެންހުރި މަސައްކަތެއް ކުރާނެ ކަމަށް އަނެއްކާ ވެސް ބުނެފަ އެވެ.
ޔާމީން ޖަލަށްލާފައިވަނީ އެމަނިކުފާނުގެ ވެރިކަމުގައި ހިނގި އެމްއެމްޕީއާރުސީ ބޮޑު ހިޔާނާތުގެ ތެރެއިން، ވ. އާރަށް ކުއްޔަށް ދޫކުރުމުގައި 1.1 މިލިއަން ޑޮލަރު ރިޝްވަތުގެ ގޮތުގައި ނަންގަވައި، އެ ފައިސާ ލޯންޑަކުރެއްވި ކަމަށް ސާބިތުވުމުންނެވެ. ޔާމީން މިހާރު ހުންނެވީ ކްރިމިނަލް 11 އަހަރުގެ ޖަލު އެ ޖަލު ހުކުމް ތަންފީޒުކުރެއްވުމަށް މާފުށީ ޖަލުގަ އެވެ.
