ރަށްރަށުގެ ފެނާއި ނަރުދަމާގެ މަސައްކަތް ހަ މަހެއްހާ ދުވަހުން ނިމޭ ކަމަށް ބުނަމުންދާއިރު, އެ މަސައްކަތް ކުރީ ސަރުކާރުތަކުން ނުކުރީ ކީއްވެތޯ ރައީސް އިބްރާހިމް މުހައްމަދު ސޯލިހު ސުވާލުކުރައްވައިފި އެވެ.
ރިޔާސީ ޕްރައިމަރީގެ ކެމްޕޭނަށް ހދ. ކުރިނބިއަށް ވަޑައިގެން ރައީސް ސޯލިހު ވަނީ ފެނާއި ނަރުދަމާގެ މަސައްކަތް ލަސްވާ ކަމަށް ބުނެ އެމަނިކުފާނަށް އަމާޒުކޮށްފައިވާ ފާޑުކިއުންތަކަށް ރައްދު ދެއްވާފަ އެވެ.
"ކުޑަރަށެއްގައި 6-7 މަހުން ނަރުދަމާ އެޅޭނެއޭ. އަޅުގަނޑު ހިތަށް އަރަނީ ކީއްވެތޯއޭ އެކަންތައް ނުކުރީ،" ރަށްރަށުގައި ފެނާއި ނަރުދަމާގެ މަސައްކަތް އެހާ އަވަހަށް ނިމޭއިރުވެސް އެ މަސައްކަތް އެހެން ސަރުކާރުތަކުން ކޮށްފައި ނުވާކަން ފާހަގަކުރައްވަމުން ރައީސް ވިދާޅުވި އެވެ.
މި މޭރުމުން ވާހަކަފުޅު ކުރިއަށް ގެންދަވަމުން ރައީސް ވިދާޅުވީ ރާއްޖޭގެ ރަށްތަކުގައި ނަރުދަމާ އެޅިފައި ނެތުމުން ރައްޔިތުން ތިބީ ގައިން ތާހިރުނުވެވިފައި ކަމަށެވެ. އަދި ތަރައްގީގެ ވާހަކަ ދެއްކޭނީ އެއިރުން ކަމަށެވެ.
ގައިން ތާހިރުނުވެ ތިބެ ގޮސް ކޮން ތަރައްގީއެއްގެ ވާހަކައެއްތޯ ދައްކާނީ؟ - ރައީސް ސޯލިހު
ރައީސް ވިދާޅުވީ ސިޔާސީ ޕާޓީއެއް އުފެއްދުމުގެ ހަމައެކަނި ބޭނުމަކީ އިހުތިޖާޖުކޮށް މުޒާހަރާ ކުރުން ނޫން ކަމަށެވެ. އަދި ވެރިކަމަށް އައިސް ވެރިކަމުގައި ތިބުމަކީ އެއީ ރައްޔިތުންނަށް ހިދުމަތް ކުރުމަށް ކޮންމެހެން ބޭނުންތެރިކަމެއް ކަމަށް ވެސް ވިދާޅުވި އެވެ.
ރަށްރަށުގެ ފެނާއި ނަރުދަމާގެ ވާހަކައަށް ރައީސަށް ފާޑުކިއުން އަމާޒުކުރެއްވީ ވާދަވެރި ކެންޑިޑޭޓް އަދި އެމްޑީޕީގެ ރައީސް މުހައްމަދު ނަޝީދެވެ.
ރަށްރަށުގެ ނަރުދަމާގެ މަސައްކަތް ސްލޯ ކަމަށް ސިފަ ކުރައްވައި ނަޝީދު ވިދާޅުވީ، ގިނަ ވެގެން ދެ މަސް ދުވަހުގެ ތެރޭގައި ކުދި ރަށްތަކުގެ ނަރުދަމާގެ މަސައްކަތް ނިމޭނެ ކަމަށެވެ.
އެކަމަށް ރައްދު ދެއްވައި ރައީސް ސޯލިހު ވަނީ ކުދި ރަށެއް, ބޮޑު ރަށެއް ތަފާތު ކުރުމެއް ސަރުކާރުން ނުގެންގުޅޭނެ ކަމަށް ވިދާޅުވި އެވެ. އެއީ، ކުދި ރަށްތަކުގައި ވެސް ދިރިއުޅެނީ ދިވެހި ރައްޔިތުން ކަމަށާއި, އެ ރައްޔިތުންގެ ހައްގުތަކެއްވާކަން ރައީސް ފާހަގަކުރެއްވި އެވެ.
ކުރިނބީގައި ރައީސް ވިދާޅުވީ ވައިކަރަދޫ ދާއިރާއަށް މި ސަރުކާރުން 174 މިލިއަން ރުފިޔާ ހަރަދުކޮށްފައިވާއިރު, ހަމައެކަނި ކުރިނބިއަށް 30 މިލިއަން ރުފިޔާ ހަރަދުކޮށްފައިވާ ކަމަށެވެ.
އަދި އެއީ އެހެން ސަރުކާރުތަކުން ނުކުރާ ވަރުގެ އިންވެސްޓްމަންޓެއް ކަމަށާއި, އެއީ ބޭކާރު ހަރަދެއް ނޫން ކަމަށް ވެސް ވިދާޅުވި އެވެ.
