އިދިކޮޅު ޕީޕީއެމް/ޕީއެންސީގެ ރިޔާސީ ކެންޑިޑޭޓް އަދި ކުރީގެ ރައީސް އަބްދުﷲ ޔާމީނަށް ވާދަނުކުރެވޭ ގޮތަށް ބާއްވާ ރިޔާސީ އިންތިހާބެއް ގަބޫލުނުކުރެވޭނެ ކަމަށް އިދިކޮޅު ކޯލިޝަނުން ބުނެފި އެވެ.
ޔާމީންގެ ވެރިކަމުގައި ހިނގި އެމްއެމްޕީއާރުސީ ބޮޑު ހިޔާނާތުގެ ތެރެއިން، ވ. އާރަށް ކުއްޔަށް ދޫކުރުމުގައި 1.1 މިލިއަން ޑޮލަރު ރިޝްވަތުގެ ގޮތުގައި ނަންގަވައި، އެ ފައިސާ ލޯންޑަކުރެއްވި ކަމަށް ސާބިތުވާ ކަމަށް ކަނޑައެޅުމަށް ފަހު ކްރިމިނަލް ކޯޓުން ވަނީ 11 އަހަރުގެ ޖަލު ހުކުމެއް އިއްވައިފަ އެވެ.
އެ ޖަލު ހުކުމް ދެމިއޮތްހާ ހިނދަކު ޔާމީނަށް ރިޔާސީ އިންތިހާބުގައި ވާދަކުރުމުގެ ފުރުސަތު ބަންދުވެފައި އޮތް ނަމަވެސް ޕީޕީއެމް/ޕީއެންސީއިން ދަނީ އެމަނިކުފާނުގެ ކެމްޕޭން ހަރަކާތްތައް ބާއްވަމުންނެވެ. އެގޮތުން، އަންނަ ފެބްރުއަރީ މަހު 2 އިން 4 އަށް ރިޔާސީ ކެމްޕޭންގެ ބޮޑު ކޮންފެރެންސެއް ވެސް އޮންނާނެ އެވެ.
އިދިކޮޅު ކޯލިޝަނުން މިއަދު ބޭއްވި ނޫސްވެރިންގެ ބައްދަލުވުމުގައި އެ ކޯލިޝަންގެ ތަރުޖަމާނު ހީނާ ވަލީދު ވިދާޅުވީ އިދިކޮޅު ލީޑަރު ޔާމީން ބައިވެރިނުވެވޭ ގޮތަށް ޖަލަށް ލައިގެން ބާއްވަން މަސައްކަތް ކުރާ އިންތިހާބެއްގެ މިނިވަން އިންސާފުވެރިކަމެއް ނޯންނާނެ ކަމަށެވެ.
"ރައީސް ޔާމީނަށް ކުރިމަތިނުލެއްވޭ ގޮތަށް މި ސަރުކާރުން ބާއްވަން އުޅޭ އިންތިހާބަކީ އެއްވެސް އިންސާފުވެރި، މިނިވަން އިންތިހާބެއް ކަމަކަށް ގަބޫލެއް ވެސް ނުކުރާނަން،" ހީނާ ވިދާޅުވި އެވެ.
މީގެ ކުރިން ވެސް ޕީޕީއެމް/ޕީއެންސީން ވަނީ ޔާމީން ވާދަނުކުރެވޭ ގޮތަށް ރިޔާސީ އިންތިހާބު ބޭއްވުމަށް ފުރުސަތު ނުދެވޭނެ ކަމަށް ބުނެފަ އެވެ. ޔާމީން މިނިވަންކުރަން ގޮވާލައި، އިދިކޮޅުން ގިނަ ހަރަކާތްތަކެއް ހިންގާއިރު، ރ. ފުއްގިރި ކުއްޔަށް ދިނުމުގައި ހިނގި ކަމަށް ބުނާ ހިޔާނާތުގެ މައްސަލާގައި ވެސް ކްރިމިނަލް ކޯޓުގައި ޝަރީއަތް ހިނގަމުން އެބަ ދެ އެވެ.
ޔާމީން ޖަލުގައި ހުންނެވި ނަމަވެސް ޕާޓީގެ ލީޑާޝިޕުން ވަނީ ބައެއް އަތޮޅުތަކުގައި ކެމްޕޭން ހަރަކާތްތައް ވެސް ހިންގަވައިފަ އެވެ. އަންނަ މަހު ފަށާ ކޮންފެރެންސްގައި ވެސް ޕާޓީގެ ލީޑާޝިޕާއި، ޕާލިމެންޓްރީ ގްރޫޕާއި، ސެނެޓް މެންބަރުން ހިމެނޭހެން 1،500 މެންބަރުން ބައިވެރިވާނެ އެވެ.
