މާލޭގެ މަގުތަކަށް ކުނިއަޅާ ފަރާތްތައް ދެނެގަނެ އެފަރާތްތަކާ މެދު އާންމު އިޖްތިމާއީ މިންގަނޑުތަކާ ހިލާފު އަމަލުތައް ހުއްޓުވުމުގެ ގާނޫނުގެ ދަށުން ހަރުކަށި ފިޔަވަޅު އަޅަން ސިޓީ ކައުންސިލުން ނިންމައިފި އެވެ.
މިމަހުގެ 20 ވަނަ ދުވަހުން ފެށިގެން މި ފިޔަވަޅު އެޅުމަށް ނިންމާފައިވަނީ ރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނު ދަށުންނެވެ.
މި އުސޫލު އާންމުކޮށްފައިވަނީ މިދިޔަ އަހަރުގެ ސެޕްޓެމްބަރު މަހުގެ 18 ވަނަ ދުވަހު އެވެ.
މި އުސޫލު އާންމުކުރިތާ ފަސް މަސްވެގެން ގޮސްފައިވާއިރު، މާލެ ސިޓީ ކައުންސިލުން ވަނީ ރައްޔިތުންނަށް ފިޔަވަޅު އެޅުމުގެ ބަދަލުގައި ނަސޭހަތްތެރިވެ، މައްސަލަ ހައްލުކުރެވޭތޯ ގިނަގުނަ މަސައްކަތްތަކެއް ކޮށްފަ އެވެ.
މާލޭ ސިޓީ ކައުންސިލުން ބުނީ ކުނީގެ މައްސަލަ ހައްލުކުރުމަށްޓަކައި މާލެ ސިޓީ ކައުންސިލުން ކުނި އެޅުން މަނާ ސަރަހައްދުތައް ފާހަގަވާނެހެން ބޯޑުތައް ހަރުކުރި ނަމަވެސް އެސަރަހައްދުތައް ހިމެނޭހެން މާލޭގެ އެކި ސަރަހައްދުތަކަށް ކުނިއަޅާ މިންވަރު އިތުރުވަމުންދާ ކަމަށެވެ.
އެއާއެކު، "މާލޭ ސިޓީގައި ކޮމިއުނިޓީ މޮނިޓަރިން ސެކިއުރިޓީ ހިދުމަތް" ދިނުމުގެ އުސޫލު ގެ ދަށުން ޕޮލިސް ކޮންސްޓަބިއުލަރީ ފުލުހުންނާ ގުޅިގެން މަގުތައް މޮނިޓާކޮށް، މަގުތަކަށް ކުނި އަޅާފަރާތްތައް ދެނެގަނެ، ޖެނުއަރީ 20 ވަނަ ދުވަހުން ފެށިގެން ޖޫރިމަނާކުރުމަށް ވަނީ ނިންމާފަ އެވެ.
އަދި ކުނިއަޅާ ފަރާތްތަކާ މެދު ފިޔަވަޅު އެޅުމަށްފަހު ޖޫރިމަނާ ކުރަންޖެހޭ ފަރާތްތައް ޖޫރިމަނާ ކުރުމުން، އެފަރާތަކުން މާލެ ސިޓީ ކައުންސިލުން ހޯދަންޖެހޭ އެއްވެސް ހިދުމަތެއް ހޯދޭނީ ޖޫރިމަނާ ފައިސާ ދެއްކުމަށް ފަހުގައި ކަމަށްވެސް ސިޓީ ކައުންސިލުން ބުނެ އެވެ.
މީގެ އިތުރުންވެސް އާންމު އިޖްތިމާއީ މިންގަނޑާ ހިލާފު އެއްވެސް އަމަލެއް ހިންގާނަމަ މި އުސޫލުގެ ދަށުން ފިޔަވަޅު އަޅަމުންދާނެ އެވެ.
މި ކަމުގައި އެހީތެރިކަން ފޯރުކޮށްދިނުމުގެ ގޮތުން އެއްވެސް ސަރަޙައްދަކަށް ކުނި އަޅަނިކޮށް ފެނިއްޖެނަމަ ނުވަތަ އާންމު އިޖްތިމާއީ މިންގަނޑާ ހިލާފު އެއްވެސް ޢަމަލެއް ހިންގާނަމަ ކައުންސިލްގެ ހޮޓްލައިން 1622 އަށް ގުޅައި ރިޕޯޓް ކުރެވޭނެ އެވެ.
