މިހާރު ކުރިއަށްދާ އެމްޑީޕީގެ ރިޔާސީ ޕްރައިމަރީގެ ކެމްޕޭނުގައި ރައީސް އިބްރާހިމް މުހައްމަދު ސޯލިހު ހއ. އިހަވަންދޫއަށް ކުރައްވާ ދަތުރުފުޅާ ދިމާކޮށް އެ ރަށުގައި ހޮސްޕިޓަލެއް އެޅުމުގެ އެއްބަސްވުމުގައި ސޮއިކޮށްފި އެވެ.
ހެލްތު މިނިސްޓްރީގައި އިއްޔެ ރަސްމިއްޔާތެއްގައި އިހަވަންދޫގައި އެޅުމަށް ހަމަޖެހިފައިވާ 30 އެނދުގެ ހޮސްޕިޓަލު އެޅުމަށް ހަވާލުކޮށްފައިވަނީ ޑުޕްލެކްސް ޕްރައިވެޓް ލިމިޓެޑު ކިޔާ ކުންފުންޏަކާ އެވެ. އެ އެއްބަސްވުމުގެ ދަށުން ހޮސްޕިޓަލާއި، އެކޮމޮޑޭޝަން އިމާރާތެއް އަދި ސާވީސް އިމާރާތެއް 18 މަސް ދުވަހުގެ ތެރޭގައި އަޅާ ނިންމަންޖެހެ އެވެ.
ބޭންކް އޮފް މޯލްޑިވްސް އިން ފައިނޭންސް ކުރާ މި މަޝްރޫއަށް ޖުމްލަ 123,303,792 ރުފިޔާ ހަރަދުވާނެ ކަމަށް ހެލްތު މިނިސްޓްރީއިން ވަނީ ބުނެފަ އެވެ.
ރައީސް ސޯލިހުގެ ރިޔާސީ ވައުދެއްގެ ގޮތުގައި ފާހަގަވި އިހަވަންދޫގެ ހޮސްޕިޓަލު އެޅުން ލަސްވެ އެ ރަށުގެ ރައްޔިތުން ވަނީ އެކަމުގެ ނުރުހުންވެސް ފާޅުކޮށްފަ އެވެ.
ހޮސްޕިޓަލު އެޅުމުގެ އެއްބަސްވުމުގައި ސޮއިކޮށްފައިވާއިރު، ރައީސް ސޯލިހު މިއަދުގެ ވަގުތެއްގައި އެ ރަށަށް ވަޑައިގަންނަވާނެ އެވެ.
އެކަމާ ގުޅިގެން ޕްރައިމަރީ ކެމްޕޭނުގެ ތެރެއިން މި މަހުގެ ހަތް ވަނަ ދުވަހު ނ. ވެލިދޫގައި ބޭއްވި ޖަލްސާއެއްގައި ރައީސް ސޯލިހު ވަނީ އެ ހޮސްޕިޓަލުގެ މަސައްކަތް ދެ ހަފްތާއެއްހާ ދުވަހުގެ ތެރޭގައި ކޮންޓްރެކްޓަރަކާއި ހަވާލުކުރެވޭނެކަމަށް ވިދާޅުވެފަ އެވެ.
ޕްރައިމަރީގެ ކެމްޕޭނުގެ ތެރެއިން ސަރުކާރުގެ ވަސީލަތްތައް ނަހަމަ ގޮތުގައި ރައީސް ސޯލިހު ބޭނުންކުރައްވާ ކަމަށާއި، އެއްވެސް ޕްލޭނެއް ނެތި ޕްރޮޖެކްޓުތައް ފައްޓަވަމުންދާ ކަމަށް އެމަނިކުފާނަށް ދެކޮޅަށް ނުކުންނަވައިގެން ހުންނެވި އެމްޑީޕީގެ ރައީސް މުހައްމަދު ނަޝީދު ދަނީ ތުހުމަތު ކުރައްވަމުންނެވެ.
ނަޝީދުގެ އިތުރުން ޓްރާންސްޕޭރެންސީ މޯލްޑިވްސްއިން ވެސް ވަނީ ރިޔާސީ އިންތިހާބުގެ ކެމްޕޭނާ ދިމާކޮށް ދައުލަތުގެ ވަސީލަތްތައް ބޭނުންކުރުން ހުއްޓާލުމަށާއި، އިންތިހާބުގެ ނަޒާހަތްތެރިކަން ކަށަވަރުކޮށް މިނިވަން އިންސާފުވެރި އިންތިހާބެއް ބޭއްވުމަށް ކުރަން ޖެހޭ މަސައްކަތްތައް ކުރުމަށް ގޮވާލާފަ އެވެ.
