ކުރީގެ ރައީސް އަބްދުﷲ ޔާމީންއަކީ ވަރަށް ގާބިލު ބޭފުޅެއް ކަމަށާއި އޮތް ހަމައެކަނި ހިޔާލު ތަފާތުވުމަކީ "އިންޑިއާ އައުޓް" ކަމަށް ވިދާޅުވެ އެމްޑީޕީގެ ރައީސް މުހައްމަދު ނަޝީދު، ޔާމީނަށް ވަރަށް ބޮޑަށް ތައުރީފު ކުރައްވައިފި އެވެ.
އެމްޑީޕީ ރިޔާސީ ޕްރައިމަރީގައި ވާދަކުރައްވާ ނަޝީދު މިއަދު ބޭއްވި ނޫސްވެރިންގެ ބައްދަލުވުމެއްގައި ވިދާޅުވީ ޔާމީނަކީ ކިޔަވައިގެން ހުންނެވި ވަރަށް ތަންދޮރު ދަންނަ ބޭފުޅެއް ކަމަށެވެ.
"ރައީސް ޔާމީނަކީ އިންޓަލެކްޗުއަލް ބޭފުޅެއް، އެކަޑެމިކް ބޭފުޅެއް، ތަންދޮރު އިނގިވަޑައިގަންނަވާ ވިޝަންއެއް ހުރި ބޭފުޅެއް، އަޅުގަނޑު ނުދެކެން އެއީ އެހާ ތަފާތު ބޭފުޅެއްގެ ގޮތުގައެއް،" ޔާމީން ވެރިކަމުގައި ހުންނެވިއިރު، އެ މަނިކުފާނަށް ވަރަށް ބޮޑަށް ފާޑުވިދާޅުވަމުން ގެންދެވި ނަޝީދު ޔާމީނަށް ތައުރީފް ކުރައްވަމުން ވިދާޅުވި އެވެ.
ނަޝީދު ވިދާޅުވީ ރައީސް އިބްރާހިމް މުހައްމަދު ސޯލިހާ މެދު އެގޮތަށް ދެންނެވެން ނޯންނާނެ ކަމަށެވެ.
"އަޅުގަނޑަކަށް ނުދެންނެވޭނެ މިހާރުގެ ރައީސް އެގޮތަކަށެއް،" ރައީސް ނަޝީދު
ޕީޕީއެމްއާއި ޔާމީނާ މެދު އެއްވެސް ރުޅި ވެރިކަމެއް ނެތް ކަމަށާއި ޔާމީނާ މެދު އޮތް ހަމައެކަނި ހިޔާލު ތަފާތުވުމަކީ "އިންޑިއާ އައުޓް" ކަން ފާހަގަކުރައްވައި ނަޝީދު ވަނީ އިންޑިއާއާއެކު ރާއްޖެ އޮތް ގުޅުން ވަރަށް ބޮޑަށް ދިފާއު ކުރައްވާފަ އެވެ.
"އިންޑިއާއާ ދެކޮޅަށް ހިންގާ މިފަދަ ކަންކަމަކީ ހުތުރު ކަންކަން، ކިހިނެއްތޯ ގައުމެއް އައުޓޭ ކިޔާފައި އެކަހަލަ ޒެނޯފޯބިކް ކަންކަން ކުރަމުން ގެންދިއުމަކީ އެއްގޮތަކަށް ވެސް ތަރައްގީ ވަމުން އަންނަ ގައުމެއްގެ ވިސްނުމަކަށް ވެގެން ނުވާނެ،" ނަޝީދު ވިދާޅުވި އެވެ.
މިކަމާ މެދު ޔާމީން ވިސްނަވައި، އެ ހިޔާލު ދޫކޮށްލެއްވުމަށް ވެސް ނަޝީދު ވަނީ އެދިވަޑައިގެންފަ އެވެ. އަދި މި ކަމުގައި "ދެ ބައި މީހުން" އެކައްޗެއް ކިޔަން ތަކުރާރުކޮށް އެދިފައިވާ ކަމަށް ވެސް ނަޝީދު ވިދާޅުވި އެވެ.
"ފުށޫ އަރާފައި މި އޮންނަނީ ހަމަ އެންމެ މައްސަލައެއް، އެ މައްސަލަ އަޅުގަނޑު ދެކެން [ޕީޕީއެމުން] ހައްލެއް ގެންނަވާނެ ކަމަށް،" ނަޝީދު ވިދާޅުވި އެވެ.
އެމްޑީޕީގެ ޕްރައިމަރީގެ ކެމްޕެއިނަށް ރަށްރަށަށް ވަޑައިގަތުމުން ޕީޕީއެމްގެ މެންބަރުން ދެއްވާ ތަރުހީބަށް ވަރަށް ބޮޑަށް ނަޝީދު ޝުކުރު އަދާކުރެއްވި އެެވެ.
މި މަހުގެ 28 ވަނަ ދުވަހު އޮންނަ އެމްޑީޕީ ޕްރައިމަރީގައި ނަޝީދާ ވާދަކުރައްވާނީ މިހާރު ވެރިކަމުގައި ހުންނެވީ ރައީސް ސޯލިހެވެ.
ޔާމީނަށް މިއަދު ތައުރީފު ކުރެއްވިއިރު، ޔާމީން ވެރިކަމުގައި ހުންނެވި ދުވަސްވަރު ނަޝީދު ވަނީ ވަރަށް ބޮޑަށް ފާޑުވިދާޅުވެފަ އެވެ.
