ރައީސް އިބްރާހިމް މުހައްމަދު ސޯލިހުގެ ކެމްޕޭނު ދަތުރުތަކާއި ރަސްމީ ދަތުރުތައް އެއްކުރުމަކީ، މަގާމުގެ ނުފޫޒު ބޭނުން ކުރުން ކަމަށް ޓްރާންސްޕޭރެންސީ މޯލްޑިވްސް އިން ބުނެފި އެވެ.
މިދިޔަ ހަފްތާގައި ރައީސް އޮފީހުން ބޭއްވި ނޫސްވެރިންގެ ބައްދަލުވުމެއްގައި ތަރުޖަމާނު މިއުވާން މުހައްމަދު ވިދާޅުވީ، ރަސްމީ ބައެއް ކަންކަމުގައި ރައީސް ބައިވެރިވެވަޑައިގަންނަވަނީ ކެމްޕޭން ދަތުރުފުޅުތަކުގެ ތެރެއިން ކަމަށެވެ. އަދި އެއީ ކޮންމެ ތަނެއްގައި ހުންނެވި ނަމަވެސް، ރައީސް ސޯލިހަކީ ރައީސުލްޖުމްހޫރިއްޔާއަށް ވާތީ ކަމަށް މިއުވާން ވިދާޅުވި އެވެ.
އެ ނޫސްވެރިންގެ ބައްދަލުވުން ސޯޝަލް މީޑިއާގައި ބްރޯޑްކާސްޓުކުރި ޕޯސްޓެއް ކޯޓުކޮށް ޓްރާންސްޕޭރެންސީން ބުނީ ރިޔާސީ ޕްރައިމަރީގެ ކެމްޕޭން ދަތުރުފުޅުތަޅުތަކުގެ ތެރެއަށް ރަސްމީ ކަންކަން ވެއްދުމަކީ އެއީ ރައީސުލްޖުމްހޫރިއްޔާ ކަމުގެ މަގާމާއި މަގާމުގެ ނުފޫޒު ނަހަމަ ގޮތުގައި ބޭނުން ކުރުން ކަމަށެވެ.
ސަބަބެއްގެ ގޮތުގައި އެ ޖަމްއިއްޔާއިން ބުނީ، ދެބައި މަސްހުނިކޮށްގެން ގެންދިއުމުން، ޕާޓީގެ ކެނޑިޑޭޓަކާއި އާންމު އޮފިޝަލެއްގެ ހައިސިއްޔަތުން މަގާމުގައި ހުންނެވި ބޭފުޅާގެ ދައުރާ މެދު ވޯޓުލާ މީހުންގެ މެދުގައި އޮޅުން ބޮޅުން އުފެދި، ބާރުގެ ބޭނުން ނަހަމަ ގޮތުގައި ހިފުމުގެ ވިސްނުން އިތުރުވެގެން ދިއުމެވެ.
މީގެ ސަބަބުން އިންތިހާބީ މަރުހަލާގެ ނަޒާހަތްތެރިކަމާއި އިންތިހާބީ މާހައުލުގެ އިންސާފުވެރިކަމާ މެދު ކަންބޮޑުވުން އުފެދޭ ކަމަށް ވެސް އެ ޖަމްއިއްޔާއިން ބުނެފައި ވެއެވެ.
ޓްރާންސްޕޭރެންސީން އިތުރަށް ބުނީ ރަސްމީ ހައިސިއްޔަތު ނަހަމަ ގޮތުގައި ބޭނުން ކުރުމަކީ ވަކި ކެންޑިޑޭޓެއްގެ ނުވަތަ ޕާޓީއެއްގެ އިންތިހާބީ މަސްލަހަތު ކުރިއެރުވުމަށް ނުވަތަ އިދިކޮޅު ޕާޓީތަކަށް ނުވަތަ ކެންޑިޑޭޓުންނަށް ގެއްލުމެއް ދިނުމަށް މަގާމުގެ އިތުރުން އެއާ ގުޅުންހުރި ބާރުތަކާއި އިމްތިޔާޒުތައް ބޭނުންކުރުން ކަމަށެވެ.
ހަމައެއާއެކު، މަގާމުތަކުގައި ތިއްބެވި ބޭފުޅުންނަށް ބާރުތަކާއި އިމްތިޔާޒުތަކާއި ވަސީލަތްތައް ލިބިފައިވާއިރު، ދައުލަތުގެ އޮފިޝަލުންނާއި ޕާޓީގެ ކެންޑިޑޭޓުންގެ ހައިސިއްޔަތުން އަދާކުރާ ދައުރާ މެދު ސާފު ތަފާތެއް ގެންނަން ޖެހޭ ކަމަށް އެ ޖަމްއިއްޔާއިން ބުނެފައި ވެއެވެ. އަދި ދައުލަތުގެ ވަސީލަތްތަކާއި މަގާމުގެ ބޭނުން ނަހަމަ ގޮތުގައި ހިފުން ހުއްޓުވުމަށް އެ ޖަމިއްޔާއިން ވަނީ ތަކުރާރުކޮށް ގޮވާލާފަ އެވެ.
އެ ޖަމްއިއްޔާއިން ވަނީ އިންތިހާބީ ގާނޫނީ އޮނިގަނޑު ހަރުދަނާކޮށް، 2023 ވަނަ އަހަރުގެ ރިޔާސީ އިންތިހާބުގެ ކުރިން އެ އޮނިގަނޑު ހަރުދަނާގޮތެއްގައި ތަންފީޒުކުރެވޭނެ ގޮތް ހެދުމަށް މަސައްކަތްކުރުމަށް ވެސް ގޮވާލާފަ އެވެ.
މިދިޔަ ހަފްތާގައި ބޭއްވި ނޫސްވެރިންގެ ބައްދަލުވުމުގައި މިއުވާން ވިދާޅުވީ ދައުލަތުގެ ވަސީލަތްތައް ބޭނުންކޮށްގެން ކޮރަޕްޝަނަށް މަގުފަހިވާ ކަމެއް ރައީސް ސޯލިހު ނުކުރައްވާ ކަމަށާއި، ކުރިއަށް އޮތްތަނުގައި ވެސް ނުކުރައްވާނެ ކަމަށެވެ. ރައީސްގެ އެއްވެސް ކެމްޕޭން ދަތުރަކަށް ސަރުކާރުން ހަރަދެއް ނުކުރާނެ ކަމަށާއި، އެކަން ބަލަން ބޭނުންނަމަ އޭސީސީއަށް ހުށަހަޅައިގެން ބެލުމުގެ ފުރުސަތު އޮންނާނެ ކަމަށް މިއުވާން ވިދާޅުވި އެވެ.
މިއުވާން އިތުރަށް ވިދާޅުވީ ކޮންމެތަނަކަށް ވަޑައިގެންނެވި ނަމަވެސް ރައީސް ސޯލިހު ހުންނަވަނީ ރައީސުލްޖުމްހޫރިއްޔާގެ މަގާމުގައި ކަމަށާއި، އެހެންކަމުން ރައީސްގެ ސެކިއުރިޓީ އަދި ސަޕޯޓު ޓީމު ރައީސާއެކު ހަރަކާތްތެރިވާނެ ކަމަށެވެ.
މީގެ ކުރިން ވެސް ރައީސްގެ ދަތުރުތަކުގައި ދައުލަތުގެ ވަސީލަތްތައް ބޭނުންކުރާ ކަމުގެ ތުހުމަތު ޓްރާންސްޕޭރެންސީން ވަނީކޮށްފަ އެވެ. އޭރު އެ ޖަމްއިއްޔާއިން ވަނީ އެމްޑީޕީގެ ރިޔާސީ ޕްރައިމަރީގެ ތެރެއިން ރައީސް ސޯލިހު ކުރައްވަމުން ގެންދަވާ ކެމްޕޭންގެ ހޭޝްޓެގުތައް ހިމަނައިގެން އެ ކެމްޕޭނަށް ހިތްވަރު ލިބޭ ގޮތަށް ދައުލަތުގެ މީޑިއާ، ޕީއެސްއެމްގެ ވެރިފައިޑް ޓްވިޓާ އެކައުންޓުން ޓްވީޓު ކުރުން ކުށްވެރިކޮށްފަ އެވެ.
