އެތައް ސަތޭކަ މަޝްރޫއެއް ނިމިފައިވާ ކަމަށާއި ނިމިފައިވާ ކަންކަމުގެ ވާހަކަ ދައްކާ ހުސްނުވާނެ ކަމަށް ވިދާޅުވެ ރައީސް އިބްރާހިމް މުހައްމަދު ސޯލިހު، އެމަނިކުފާނާއެކު ޕްރައިމަރީގެ ވާދަ ކުރައްވާ މުހައްމަދު ނަޝީދަށް ވަރުގަދަ ރައްދެއް މިއަދު ދެއްވައިފި އެވެ.
ނަޝީދު ބޭއްވި ކެމްޕެއިނު ޖަލްސާއެއްގައި ވަނީ މި ސަރުކާރުގެ ޝިއާރަކީ ތަރައްގީ "އަންނަނީ، އަންނަނީ" ކަމަށް ވިދާޅުވެ ސަރުކާރަށް ވަރަށް ބޮޑަށް ފާޑުވިދާޅުވެފަ އެވެ.
"ސަރުކާރުގެ ސްލޯގަން އަކީ ޝިއާރަކީ އޮލިމްޕަހުގައި އަޅުވާނެ އަންނަނީ، އަންނަނީ، ދެން އަންނަނީ މިއަންނަ ކުއާޓާގައި އަންނާނެ ދެން އަންނަ ކުއާޓާގައި އަންނާނެ. އަންނަނީ، މިފިލްމެއް ނުއެއް ފެނުނު. ހަމަ އަންނަނީ،" ކާނިވަލުގައި ބޭއްވި ޖަލްސާގައި ނަޝީދު ވިދާޅުވި އެވެ.
ނަޝީދު އަށް ރައްދު ދެއްވަމުން އައްޑޫ މީދޫގައި މިއަދު ބޭއްވި ކެމްޕެއިނު ހަރަކާތެއްގައި ރައީސް ވިދާޅުވީ ހަމައެކަނި އައްޑޫއަށް ބެލި ނަމަވެސް ފެންނަނީ ކަންކަން ނިމިފައިވާ މަންޒަރު ކަމަށެވެ.
"މީދޫ ދާއިރާ، ހުޅުމީދޫ އަށް ބެލިނަމަވެސް ބުނެލަން އޮތް އެއްޗަކީ ނިމިއްޖެ، ނިމިއްޖެ، ނިމިއްޖޭ،" ރައީސް ވިދާޅުވި އެވެ.
ސިއްހީ މަރުކަޒާއި ބަނދަރާއި ފުޓްސަލް ދަނޑާއި ހުޅުމީދޫ ބޮޑުމަގާއި އިޖުތިމާއީ މަރުކަޒު ޓެންޑާ ކުރެވިފައިވާ ކަމަށާއި ދަނޑުތައް ވެސް ނިމިއްޖެ ކަން ފާހަގަކުރައްވައި ރައީސް ވިދާޅުވީ "ނިމިއްޖެ" ކިޔާފައި ކިޔަން އޮތް ލިސްޓު މާ ދިގު ކަމަށެވެ.
"ނިމިއްޖެ ނިމިއްޖެ ކިޔަން ވެއްޖެއްޔާ ދިގު ލިސްޓަކަށް ވާނެ،" އެމަނިކުފާނުގެ ވިސްނުން ހުންނެވީ ދެން ހުރި ކަންކަން ނިންމުމަށް ކަން ފާހަގަކުރައްވައި ރައީސް ވިދާޅުވި އެވެ.
ރައީސް އިތުރަށް ވިދާޅުވީ އައްޑޫ ސިޓީގެ މަޝްރޫއުތައް ކުރިއަށް ގެންދަމުން އަންނަނީ އައްޑޫ ސިޓީގެ ރައްޔިތުން އަތުން، ލިޔެ ތައްޔާރު ކުރި މެނިފެސްޓޯގައި ވާ ގޮތަށް ކަމަށެވެ.
ޖެނުއަރީ 28، ގައި ބާއްވާ ރިޔާސީ ޕްރައިމަރީގައި އެމްޑީޕީގެ 57،000 މެމްބަރުންނަށް ވޯޓުލެވޭނެ އެވެ. މިއީ މިފަހުން ޕާޓީގެ އެތެރޭގެ އިންތިހާބެއް މިހާ ވާދަވެރިކޮށް ކުރިއަށްދާ ފުރަތަމަ ފަހަރެވެ. މިއީ ރިޔާސީ ޕްރައިމަރީއެއްގައި ރައީސް ސޯލިހު ވާދަ ކުރައްވާ ފުރަތަމަ ފަހަރެވެ. ނަޝީދު މީގެ ކުރިން ދެ ފަހަރަކު ވާދަ ކުރެއްވި އެވެ.
