މޯލްޑިވިއަން ޑިމޮކްރެޓިކް ޕާޓީގެ ރިޔާސީ ޕްރައިމަރީ ކާމިޔާބުވެެއްޖެ ނަމަ އަންނަ ސެޕްޓެމްބަރު މަހު ބާއްވާ ރިޔާސީ އިންތިހާބު އެއްބުރުން ކާމިޔާބު ކުރާނެ ގޮތުގެ ފޯމިއުލާއެއް އެބައޮތް ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.
ރިޔާސީ ޕްރައިމަރީގެ ކެމްޕެއިނަށް މިހާރު އައްޑޫއަށް ކުރައްވަމުން ގެންދަވާ ދަތުރުފުޅުގައި މި ރަށުގައި ވާހަކަ ދައްކަވަމުން ރައީސް ވަނީ މި ހިނގާ ރިޔާސީ ދައުރުގެ މިހާތަނަށް ރާއްޖޭގައި އިންތިހާއަށް ގިނަ ތަރައްގީގެ މަސައްކަތްތައް ފަށައި ނިމިފައިވާ ކަމަށް ވިދާޅުވެފަ އެވެ.
"މިއަދު ބޭނުން ވަނީ މިކަންކަން ހުއްޓުމެއް ނެތި ކުރިއަށް ދާން، މާޒީގައި ކަން ވެފައި އޮތް ގޮތް ހަނދާންކޮށް، އެ މާޒީގައި އަލުން ދިއުންތޯ ރަނގަޅީ ނުވަތަ އޭގެ އަލީގައި މިހާރު ކުރިއަށް ދާ ކަންކަމައިގެން ކުރިއަށް ދާނީތޯ ނިންމަން،" ރައީސް ވިދާޅުވި އެވެ.
ކުރިއަށް ވެސް ގިނަ މަސައްކަތްތަކެއް ހުރިކަން ފާހަގަކުރައްވައި ރައީސް ވިދާޅުވީ އެ މަސައްކަތް ކުރިއަށް ގެންދެވޭނީ ވެރިކަމަށް އާދެވިގެން ކަމަށެވެ. އަދި އެކަމަށް އޮތް ފޯމިއުލާއަކީ ކޯލިޝަން ހެދުން ކަމަށް އެމަނިކުފާނު ވިދާޅުވި އެވެ.
"ޕްރައިމަރީ ބޮޑުތަނުން ކާމިޔާބުވާނެ، ސަރުކާރެއް އެއްބުރުން އެކުލަވާލެވޭ ވަރުގެ ނަތީޖާއެއް ކާމިޔާބު ކުރެވޭނެ ފޯމިއުލާ އިރާދަކުރެއްވިއްޔާ އަޅުގަނޑުމެންނަށް އެބައޮތް،" ރައީސް ވިދާޅުވި އެވެ.
ރައީސް ވިދާޅުވި ގޮތުގައި ޕްރައިމަރީގައި އެމަނިކުފާނަށް ކާމިޔާބުވެއްޖެ ނަމަ ދެ ވަނަ ބުރަކަށް ދާން ނުޖެހޭނެ އެވެ. އަދި ޕްރައިމަރީ ބޮޑުތަނުން ނަގާނެ ކަމަށް ވިދާޅުވާ ވާހަކަ ވެސް ތަކުރާރު ކުރެއްވި އެވެ.
"ޕްރައިމަރީގައި ކާމިޔާބުވެއްޖެ ނަމަ ދެ ވަނަ ބުރަކަށް ދާން ޖެހޭ ސަބަބެއް ނުވިސްނޭ. އެއް ބުރުން އަޅުގަނޑުމެންނަށް މިކަން ނިންމާލާނީ،" ރައީސް ވިދާޅުވި އެވެ. "ޕްރައިމަރީގައި ގޮތެއް ނިންމާއިރު ރިޔާސީ އިންތިހާބާ ދޭތެރޭ ފުންކޮށް ވިސްނައި، މި އިންތިހާބު ގެއްލިއްޖެނަމަ ދެން އަނބުރާ ވެރިކަމަށް އައުމަށް ނަގާނީ ކިހާ ދުވަހެއް ކަމެއް ނޭނގޭ."
ޖެނުއަރީ 28، ގައި ބާއްވާ ރިޔާސީ ޕްރައިމަރީގައި އެމްޑީޕީގެ 57،000 މެމްބަރުންނަށް ވޯޓުލެވޭނެ އެވެ. މިއީ މިފަހުން ޕާޓީގެ އެތެރޭގެ އިންތިހާބެއް މިހާ ވާދަވެރިކޮށް ކުރިއަށްދާ ފުރަތަމަ ފަހަރެވެ. މިއީ ރިޔާސީ ޕްރައިމަރީއެއްގައި ރައީސް ސޯލިހު ވާދަ ކުރައްވާ ފުރަތަމަ ފަހަރެވެ. ރައީސް ސޯލިހުއާ ވާދަ ކުރައްވާ ރައްޔިތުންގެ މަޖިލީހުގެ ރައީސް މުހައްމަދު ނަޝީދު މީގެ ކުރިން ދެ ފަހަރަކު ވާދަ ކުރެއްވި އެވެ.
