ވެރިކަން ކުރާ މައި ޕާޓީ، އެމްޑީޕީގައި މިއަހަރުގެ ރިޔާސީ އިންތިހާބު ކާމިޔާބު ކުރެވިދާނެ އެހެން މީހަކު ނެތް ކަމަށް ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.
މި މަހު ފަހުކޮޅު ބާއްވާ އެމްޑީޕީ ރިޔާސީ ޕްރައިމަރީގެ ކެމްޕެއިނަށް މިހާރު އައްޑޫއަށް ކުރަމުން ގެންދަވާ ދަތުރުފުޅުގައި މަރަދޫފޭދޫ މެންބަރުންނާ ވާހަކަދައްކަވަމުން ރައީސް ވިދާޅުވީ ޕާޓީގެ އެތެރޭގެ އިންތިހާބާ ޕްރައިމަރީ ވަރަށް ބޮޑަށް ތަފާތު ކަމަށެވެ.
"ޕާޓީގެ ކެންޑިޑޭޓެއް ދެވިދާނެ، އެހެންނަމަވެސް އެމްޑީޕީއަކީ ވިސްނުމެއް ގެންގުޅޭނެ ބައެއް، ރާއްޖެ ތަރައްގީ ކުރުމަށް އެބަ ގެންގުޅޭ ޕްލޭނެއް، އެކަން ކުރެވެން އޮތީ ރިޔާސީ އިންތިހާބު ކާމިޔާބު ކޮށްގެން،" ރައީސް ވިދާޅުވި އެވެ.
ތަރައްގީގެ ކަންކަން ނުހުއްޓި ކުރިއަށް ގެންދިއުމުގައި އެމްޑީޕީ ޕްރައިމަރީއަކީ ގައުމީ ކަމެއްގެ ގޮތުގައި ދެކިގެން ވޯޓު އަޅަން ޖެހޭ ކަމަށް ވެސް ރައީސް ވިދާޅުވި އެވެ.
"ގައުމީ ވިސްނުމެއް އެބަގެންގުޅެން ޖެހޭ، މުޅި ރާއްޖެ ތަރައްގީ ކުރުމަށް އަޅުގަނޑުމެން ރާވާފައިވާ ޕްލޭނާ މެނިފެސްޓޯ ތަންފީޒު ކުރަން އެބަ ޖެހޭ،"
ވެރިކަމަށް އާދެވޭނީ ކޯލިޝަނަކަށް ކަމަށް ވިދާޅުވާ ވާހަކަ ތަކުރާރު ކުރައްވައި ރައީސް ވިދާޅުވީ ހަމައެކަނި އެމްޑީޕީ މެންބަރުންގެ ވޯޓުން ރިޔާސީ އިންތިހާބު ކާމިޔާބު ނުކުރެވޭނެ ކަމަށާއި އެކަން ކުރެވޭނީ ރައްޔިތުންގެ ވޯޓާ ވެސް ލައިގެން ކަމަށެވެ.
"އެހެންވީމާ [ރިޔާސީ އިންތިހާބު ކާމިޔާބު ކުރުުމަށް] އެމްޑީޕީއާއެކު އެހެން ބައެއްގެ ތާއީދު ހޯދަން އެބަ ޖެހޭ، އެކަން ކުރެވޭނެ އެހެން މީހަކު އެމްޑީޕީގައި މިވަގުތު ނެތް،" އެމަނިކުފާނަކީ އެމްޑީޕީއަށް އޮތް ހަމައެކަނި ޗޮއިސް ކަމަށް މީގެ ކުރިން ވިދާޅުވެފައިވާ ރައީސް ވިދާޅުވި އެވެ.
"ވެރިކަމަށް އާދެވޭނެ ގޮތް އެބައޮތް، ވެރިކަމަށް އައިސް ކަންތައް ކުރެވޭނެ ގޮތް އެބައޮތް، ދެން ކީއްކުރަންތޯ އެހެން ގޮތެއް ހިޔާރުކުރަނީ؟" ރައީސް ސޯލިހު
ރައީސް ވިދާޅުވީ މަޖިލީހުގައި 25 އަހަރު ހޭދަކުރައްވައި، އަދި ރިޔާސީ ދައުރެއް ފުރިހަމަ ކުރައްވާފައި ގޭގައި އޮންނަން ފަސޭހަ ނަމަވެސް ދެ ވަނަ ދައުރަކަށް ވާދަކުރަން ނިންމެވީ ވެސް އެ ސަބަބާ ހުރެ ކަމަށެވެ؛ "ޕާޓީއަށް ޓަކައި" ރިޔާސީ ވައުދުތައް ފުއްދުމަށެވެ.
ރާއްޖޭގެ އެކި ކަންކޮޅުތަކުގައި މި ދައުރުގައި ފަށާފައިވާ މަޝްރޫއުތައް ފާހަގަކުރައްވައި ރައީސް އިތުރަށް ވިދާޅުވީ އެ ކަންކަން ނިންމޭނީ "ފެށި ބަޔަކަށް" ކަމަށެވެ.
މި މަހުގެ 28 ގައި ބާއްވާ އެމްޑީޕީގެ ޕްރައިމަރީގައި ރައީސް ސޯލިހާ ވާދަކުރައްވާނީ އެ ޕާޓީގެ ރައީސް މުހައްމަދު ނަޝީދެވެ.
ކޯލިޝަން ހަދައިގެން ސަރުކާރު ހިންގުމާ ނަޝީދު ފާޅުގައި ދެކޮޅު ހައްދަވަމުން އަންނަވައިރު، ރައީސް އަންނަނީ ކޯލިޝަނާ ނުލައި ވެރިކަމަށް ނާދެވޭނެ ކަމަށް ތަކުރާރު ކޮށް ވިދާޅުވަމުންނެވެ. ރިޔާސީ އިންތިހާބު ކާމިޔާބު ވާނެ ކަމަށް ރައީސް އެންމެ ބޮޑަށް ޖައްސަވާ ހިސާބަކީ ވެސް ކޯލިޝަނަކާ އެކު އިންތިހާބަށް ކުރިމަތިލުމެވެ.
