ރާއްޖެއަށް ބޭނުންވާ ތަރައްގީ ގެނައުމަށްޓަކައި އައްޑޫ ސިޓީގެ ރައްޔިތުންގެ ތާއީދު އެމަނިކުފާނަށް ވަރަށް މުހިންމު ކަމަށް ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.
އެމްޑީޕީގެ ޕްރައިމަރީގެ ކެމްޕެއިނަށް މިހާރު އައްޑޫއަށް ކުރައްވަމުން ގެންދަވާ ދަތުރުފުޅުގައި ހިތަދޫ ދެކުނު ދާއިރާގެ އެމްޑީޕީ މެންބަރުންނާ ބައްދަލުކުރައްވައި ރައީސް ވަނީ އިންތިހާބު ބޮޑުތަނުން ކާމިޔާބުވާނެ ކަމަށް ގަބޫލުކުރައްވާ ކަމަށް ވިދާޅުވާ ވާހަކަ ތަކުރާރު ކުރައްވާފަ އެވެ.
"ކޮވިޑުގެ ދަތިކަމާއެކުގައި ދިޔަ ދެ އަހަރު ވެސް ހިމަނައިގެން އަޅުގަނޑުމެން އެކި ދާއިރާތަކަށް ކޮށްދެމުން އަންނަ މަސައްކަތްތައް ރައްޔިތުން ގަބޫލުކުރާ، ރައްޔިތުން ބޭނުން ވެފައި ތިބި، އެ ރައްޔިތުން އެބަ ބޭނުންވޭ މިކަން ކުރިއަށް ގެންދަން،" އިންތިހާބު ކާމިޔާބުވާނެކަން ފާހަގަކުރައްވައި ރައީސް ވިދާޅުވި އެވެ.
އައްޑޫ ސިޓީއަށް މިފަދަ ބޮޑު ތަރައްގީއެއް ގެނެސްދިން އިތުރު ސަރުކާރެއް މިހާތަނަށް އައިސްފައިވާ ކަމަށް ލިޔެކިޔުންތަކުން ނުފެންނަ ކަމަށް ރައީސް ވިދާޅުވި އެވެ.
އައްޑޫގެ ތަރައްގީއަށް ފަށާފައިވާ މި މަސައްކަތްތައް ނިންމުމަށް އައްޑޫ ރައްޔިތުންގެ ތާއީދު ބޭނުންވާ ކަން ފާހަގަކުރައްވައި ރައީސް ވިދާޅުވީ އެ ތާއީދު މުޅި ރާއްޖޭގެ ތަރައްގީއާ ގުޅިފައިވާ ކަމަށެވެ.
މާލޭ މަޖީދީމަގުގައި ވިޔަފާރިކުރާ މީހަކު ރައީސަށް ތާއީދު ކުރި ވާހަކަ އަލުން ހިއްސާ ކުރައްވައި ރައީސް ވިދާޅުވީ 2018 ގެ ފަހުން ވިޔަފާރިއަށް ބޮޑެތި ފައިދާތަކެއް ވަމުން އަންނަ ކަމަށާއި އެކަން ވީ ރައީސްގެ ސަބަބުން ކަމަށް އޭނާ ބުނި ކަމަށެވެ.
"މަޖީދީ މަގުގައި ވިޔަފާރިކުރާ އެ މީހާގެ އިހުސާސްތަކަށް ތަސައްލީއެއް ލިބޭނީ އައްޑޫ ރައްޔިތުންގެ ތާއީދު ލިބިގެން، މި ސިޓީގެ ތަރައްގީއަށާއި އަދި މާލެ އާއި ރާއްޖޭގެ އެހެން ރަށްތަކުގެ ތަރައްގީއަށް ކުރާ މަސައްކަތް ކުރިއަށް ގެންދިއުމަށް މި ދާއިރާގެ ތާއީދު އަޅުގަނޑަށް މުހިންމު،" އައްޑޫ ސިޓީން ލިބޭ ތާއީދު ބޭކާރު ނުވާނެ ކަމުގެ ޔަގީންކަން ދެއްވަމުން ރައީސް ވިދާޅުވި އެވެ.
އައްޑޫ ސިޓީއަކީ މާލެއަށް ފަހު ދެން އެންމެ ގިނަ މެންބަރުން ރިޔާސީ އިންތިހާބުގައި ވޯޓުލާނެ ސިޓީ އެވެ.
