ފާއިތުވީ ހަތަރު އަހަރުތެރޭގައި މި ސަރުކާރުން އެންމެ އިސްކަމެއް ދީފައިވާ ދާއިރާއަކީ ތައުލީމީ ދާއިރާކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ސ. ފޭދޫ ސުކޫލުގެ ރަންޔޫބީލް ފާހަގަކުރުމަށް މިރޭ ބޭއްވި ރަސްމިއްޔާތުގައި ވާހަކަދައްކަވަމުން ރައީސް ވިދާޅުވީ ދަރިންނަށް ކިޔަވައިދީގެން، މުޅި ރާއްޖޭގެ އިންސާނީ ވަސީލަތްތައް ތަރައްގީކުރުމަށް މި ސަރުކާރުން ބޮޑު އިސްކަމެއް ދީފައިވާ ކަމަށެވެ.
"މި ރާއްޖޭގެ ކޮންމެ އަތޮޅެއްގެ ކޮންމެ ރަށެއްގައި އެ ރަށެއްގެ ތަރައްގީއާއި ކުރިއެރުމަށް މަސައްކަތް ކުރާނެ ތައުލީމީ މީހުން ބިނާ ކުރުމަށް، ކުރިއަށް އޮތް ތާނގައި އަޅުގަނޑު އެންމެ އިސްކަމެއް ދޭނެ ކަމަކީ އެއީ،" ރައީސް ވިދާޅުވި އެވެ.
ރައީސް ވަނީ ތައުލީމީ ދާއިރާ ކުރިއަރުވައި، ތައުލީމީ ޒުވާނުން ބިނާ ކުރުމަށް ފާއިތުވީ ހަތަރު އަހަރު ސަރުކާރުން ކޮށްފައިވާ ކަންކަން ބައެއް ތަފާސްހިސާބުތަކާއެކު ހިއްސާކުރައްވާފަ އެވެ.
ރާއްޖޭގެ ކޮލެޖުތަކާއި ޔުނިވާސިޓީތަކުގައި ހިލޭ ޑިގްރީ ފެންވަރަށް ކިޔަވައިދޭން ފެށުމާއި ސްޓޫޑެންޓު ލޯނުގެ އިދާރީ ފީ ކުޑަކުރުމާއި ލޯނު މުއްދަތު ދައްކަން ޖެހޭ މުއްދަތު އިތުރުކޮށްދިނީ ވެސް ތައުލީމީ ޒުވާނުން ބިނާ ކުރުމަށް ކަމަށް އެމަނިކުފާނު ވިދާޅުވި އެވެ.
އަދި، ރާއްޖޭގެ ފުރަތަމަ ފަހަރަށް ތައުލީމުގެ ގާނޫނެއް އެކުލަވާލައި، ތަންފީޒު ކުރަން ފެށުނު ކަން ފާހަގަކުރަައްވައި ދަރިވަރުންގެ އެތައް ހައްގެއް މިހާރު ކަށަވަރުކުރެވިފައިވާ ކަމަށް ރައީސް ވިދާޅުވި އެވެ.
"މި ދެންނެވި ގާނޫނުން ތައުލީމީ ނިޒާމަށް އަންނާނެ އެންމެ ބޮޑު ބަދަލަކީ ސުކޫލު މާހައުލުގެ ތެރެއިން ފަންނީ އަދި މަސައްކަތްތެރިކަމުގެ ތައުލީމު މިހާރަށް ވުރެ ފުޅާ ގޮތެއްގައި ފޯރުކޮށްދެވޭ ގޮތަށް ބަދަލުވެގެން ދިއުން،" ރައީސް ވިދާޅުވި އެވެ.
މި ބަދަލުތައް ތަންފީޒު ކުރުމުގެ މަސައްކަތް ކުރެވެމުން އަންނައިރު، މުވައްޒަފުންގެ ފަންނީ ގާބިލުކަން އިތުރުކުރުމަށް ތަފާތު އެކި ޕްރޮގްރާމްތައް ހިންގައި މިހާތަނަށް 26،000 އަށް ވުރެ ގިނަ މުވައްޒަފުން ތަމްރީނު ކުރެވިފައިވާ ކަން ފާހަގަކުރެއްވި އެވެ.
މާލީ ގޮތުން އަގު ނުކުރެވުނު ނަމަވެސް، ޕްރިންސިޕަލުންނާއި ޓީޗަރުންނާއި އެޑިއުކޭޝަން އޮފިސަރުންގެ މުސާރަ މި ދައުރުގައި ބޮޑުކޮށްދީފައިވާ ކަމަށާއި އެހެނިހެން މުވައްޒަފުންގެ އެލަވަންސަށް ވެސް މި ދައުރުގައި ބަދަލުގެނެސްފައިވާ ކަމަށް ރައީސް ވިދާޅުވި އެވެ.
މާލީ އިނާޔަތުގެ އިތުރުން ފަންނީ ގޮތުން ކުރިއެރުން ހޯދުމަށް ޕްރިންސިޕަލުން ތަރައްގީކުރި ޕްރޮގްރާމްގައި މިހާރު ވެސް 18 ޕްރިންސިޕަލުން ތަމްރީނު ކުރެވެމުން އަންނަ ކަން ވެސް އެމަނިކުފާނު ފާހަގަކުރެއްވި އެވެ.
މިދިޔަ އަހަރުގެ ޖެނުއަރީ މަހު ސެޓެލައިޓް ސުކޫލު ވެސް ބައެއް ރަށްރަށުގައި ގާއިމްކޮށް ކިޔަވައިދޭން ފެށުނު ކަން ފާހަގަކުރައްވައި ރައީސް ވިދާޅުވީ، މިއީ އެއްވެސް ތަފާތު ކުރުމެއް ނެތި، ވަކި އުމުރެއްނެތި އުނގެނުމުގެ ހައްގު ހޯދުމަށް ފެށުނު ވަރަށް މުހިންމު ކަމެއްގެ ގޮތުގައި ދެކިވަޑައިގަންނަވާ ކަމަށެވެ.
"ރާއްޖޭގެ ހުރިހާ ރަށެއްގައި މަތީ ސާނަވީއަށް ކިޔަވައިދޭ ސުކޫލުތައް މިހާރު ހުންނާނެ،" ރައީސް ވިދާޅުވި އެވެ.
ރައީސް އިތުރަށް ވިދާޅުވީ ސަރުކާރުގެ އަމާޒަކީ ކުދިންނަށް ކިޔަވައިދިނުމުގައި އެއްވެސް އަތޮޅެއް، ރަށެއް އަދި އެއްވެސް ދަރިވަރެއް ބާކީ ނުކުރުން ކަމަށެވެ.
