ކުރީގެ ރައީސް މުހައްމަދު ނަޝީދުގެ ވެރިކަމުގައި އައްޑޫ ސިޓީ ތަރައްގީކުރުމުގެ މަސައްކަތް ކުރިއަށް ގެންގޮސްފައިވަނީ އެއްވެސް ރޭވުންތެރިކަމެއްނެތި ކަމަށް ވިދާޅުވެ، ރައީސް އިބްރާހިމް މުހައްމަދު ސޯލިހު ވަރަށް ބޮޑަށް ފާޑުވިދާޅުވެއްޖެ އެވެ.
އެމްޑީޕީގެ ރިޔާސީ ޕްރައިމަރީގެ ކެމްޕެއިނަށް އައްޑޫއަށް މިހާރު ކުރައްވަމުން ގެންދަވާ ދަތުރުފުޅުގައި މި ރަށުގައި ވާހަކަދައްކަވަމުން ރައީސް ވަނީ އައްޑޫ ސިޓީ ތަރައްގީ ނުވެ މި ރާއްޖެ ތަރައްގީނުވާނެ ކަމަށް ވިދާޅުވާ ވާހަކަ ތަކުރާރު ކުރައްވާފަ އެވެ.
"އައްޑޫ ރައްޔިތުންނަކީ ސިޔާސީ ވިސްނުމާއި ތަރައްގީގެ ވިސްނުން ވަރަށް ފުޅާ ދާއިރާއެއްގައި އޮތް ބައެއް، މިއީ ތަރައްގީގެ ވިސްނުމުގެ މައި ހަބެއް،" ރައީސް ވިދާޅުވި އެވެ.
ރައީސް ވިދާޅުވީ ތަރައްގީގެ ވާހަކަ އައްޑޫ ސިޓީ ރައްޔިތުންނަށް ދެކެވެން ފެށީ މި ސަރުކާރު އައި ފަހުން ކަމަށެވެ.
"ކުރީ ސަރުކާރުން އެބަހުރި ޕްރޮޖެކްޓުތައް ހިންގަން އުޅެފައި، މި ސިޓީގެ ފެނާއި ނަރުދަމާ ގާއިމް ކުރުމުގެ ނަމުގައި ކަންތައްތަކެއް ހިނގި، އެހެންނަމަވެސް ކިހިނެއްތޯވީ، ކިތައް އަހަރު އެކަމުގައި ހޭދަކުރަން ޖެހުނުތޯ،" ނަޝީދު ވެރިކަމުގައި ފެށި އެ މަޝްރޫއަށް ފާޑުވިދާޅުވަމުން ރައީސް ވިދާޅުވި އެވެ.
އައްޑޫގައި ދަތުރުފަތުރުގެ ނިޒާމު ފަށަން ނަޝީދުގެ ވެރިކަމުގައި ކުރި މަސައްކަތަށް ވެސް ރައީސް ވަނީ ވަރަށް ބޮޑަށް ފާޑުވިދާޅުވެފަ އެވެ. ރައީސް ވިދާޅުވީ އެކަން ވެސް ވީ ސަރުކާރަށް ބޮޑު ބުރައެއް އުފުލަން ޖެހުނު "ސަކަރާތްގަނޑަކަށް" ކަމަށެވެ.
"ސަތަރި ދޯންޏެއް އޮތް ކޮންމެ މީހަކަށް ފަޅު ރަށެއް ލިބޭ، ބަހަމުން ދިޔައީ، ބަހަމުން ދިޔައީ، ބޮޑު ސަކަރާތްގަނޑެއް، އެކަމުން އަޅުގަނޑުމެން ސަލާމަތް ނުވެވިގެން މިއުޅެނީ، އެތައް މިލިއަން ރުފިޔާއެއް އެބަ ޑިމާންޑުކުރޭ،" އެކަން ކުރާނެ ގޮތަކާމެދު ސުވާލު އުފައްދަވަމުން ރައީސް ވިދާޅުވި އެވެ.
މި ސަރުކާރުން އައްޑޫ ސިޓީގެ މަގު ހެދުމުގެ ކަންކަން ކުރިއަށް ގެންދާކަން ފާހަގަކުރައްވައި، ރައީސް ވަނީ ސާކް ސަމިޓާ ދިމާކޮށް ނަޝީދުގެ ވެރިކަމުގައި ގަސްތައް ކަނޑައިގެން މަގުތައް ހަދާފައިވަނީ ދެމެހެއްޓެނިވި ގޮތެއްގައި ނޫން ކަމަށް ވިދާޅުވެފަ އެވެ.
އެމްޑީޕީގެ ކުރީ ސަރުކާރަށް ފާޑުވިދާޅުވަމުން ދެން ރައީސް ފާހަގަކުރެއްވީ 2009 ވަނަ އަހަރު ތެރޭގައި ކުރިމަތިވި އިގްތިސޯދީ ގޮންޖެހުމުގައި ސަރުކާރުން އަމަލު ކުރި ގޮތަށެވެ.
"ސިވިލް ސާވިސްގެ މުސާރަ ކުޑަކުރީ، މުވައްޒަފުން މަދުކުރީ، ރައްޔިތުންނަށް ލިބޭ އާމްދަނީ ދަށް ވުމުގެ ސަބަބުން އެތައް ހާލެއްގައި އުޅެން ޖެހުނު ރައްޔިތުން، ސަރުކާރެއްގެ ޒިންމާއަކީ މިފަދަ ދަނޑިވަޅެއްގައި ރައްޔިތުންނަށް ވީ ވަރަކުން އެހީތެރިކަން ފޯރުކޮށްދިނުން،" ފާޑުވިދާޅުވަމުން ރައީސް ވިދާޅުވި އެވެ.
އެ ދުވަހާ ކޮވިޑުގެ ހާލަތާ އަޅާ ކިޔުއްވަމުން ރައީސް ވަނީ މި ސަރުކާރުން ވާނީ އެ ހާލަތުން އަރައިގަތުމުގައި ނަމޫނާ ދައްކާފައިކަން ފާހަގަކުރައްވާފަ އެވެ.
އަދި، އިގުތިސޯދީ ގޮންޖެހުންތައް އަދިވެސް ހުރިކަން ފާހަގަކުރައްވައި އެކަމުން އޭރު ވެރިކަމުގައި ތިބި މީހުންނަށް އަރައި ނުގަނެވޭނެ ކަމަށް ވެސް ވިދާޅުވި އެވެ.
"މި ގޮންޖެހުންތަކުން އަޅުގަނޑުމެންނަށް އަރައިގަނެވޭނީ މިފަދަ ވިސްނުމެއްގައި މިހާރު މިކަން ކުރާ ގޮތަށް ކުރާ ބަޔަކު ސަރުކާރުގައި ތިބެގެން، އެއިރު އެކުރި ގޮތަށް ކަން ކުރާ ބަޔަކު ތިބެގެންނެއް އަޅުގަނޑު ގަބޫލެއް ނުކުރަން މި ރާއްޖެ ސަލާމަތް ކުރެވޭނެ ކަމަކަށް،" ރައީސް ވިދާޅުވި އެވެ.
މި މަހުގެ 28 ވަނަ ދުވަހު އޮންނަ އެމްޑީޕީ ޕްރައިމަރީގައި ވާދަކުރައްވަނީ އެމްޑީޕީގެ ދެ ވެރިކަމުގައި ތިއްބެވި ރައީސުންނެވެ. ދެ ބޭފުޅުންގެ މެދުގައި ބަހުގެ ހަމަލާތައް އަންނަނީ ރައްދުކުރަމުންނެވެ.
