އައްޑޫ ރައްޔިތުން އެދޭނަމަ ޝަންގްރިއްލާ ރިސޯޓު ތަރައްގީކުރި އައްޑޫ އިންވެސްޓްމަންޓްސް ކުންފުނީގައި އޮތް ސަރުކާރުގެ 30 ޕަސެންޓު ހިއްސާ ދޫކޮށްލާނެ ކަމަށް ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެެ.
އައްޑޫ އަތޮޅުގައި ހުޅުވި ފުރަތަމަ ރިސޯޓު ޝަންގްރިއްލާ ރިސޯޓް އެންޑް ސްޕާ ބަންދުކުރީ ކޮވިޑުން ލިބުނު ގެއްލުމުން އަރައި ނުގަނެވިގެން ކަމަށް ބުނި އޮގަސްޓު 20، 2020 ގަ އެވެ. އޭގެ ކުރިން ވެސް ގެއްލުމުގައި ހިންގަމުން އަންނަ އެ ރިސޯޓު ބަންދުކުރުމުން އެތަނުގައި ވަޒީފާ އަދާކުރާ 500 ވަރަކަށް މީހުންގެ ވަޒީފާ ގެއްލުނު ކަމަށް މީޑިއާ ރިޕޯޓުތައް ބުނެ އެވެ.
މި ރިސޯޓަކީ 2005 ގައި ދިވެހި ސަރުކާރާއި ހޮންގްކޮންގްގެ ޝަންގްރިއްލާ ކުންފުނި ގުޅިގެން އުފެއްދި ޖޮއިންޓް ވެންޗާއެއް ކަމުގައިވާ އައްޑޫ އިންވެސްޓްމަންޓްސް އިން ހިންގާ ކުންފުންޏެކެވެ. ގާތްގަނޑަކަށް 150 މިލިއަން ޑޮލަރު (1.04 ބިލިއަން ރުފިޔާ) ހަރަދުކޮށްގެން ތަރައްގީކުރި 284 އެނދުގެ ރިސޯޓަކީ އެހާތަނަށް ރާއްޖޭގެ އެންމެ އަގު ބޮޑު ރިސޯޓެވެ.
ޝަންގްރިއްލާ ވިލިގިއްޔަކީ އައްޑޫ އަތޮޅުގައި ހުޅުވި ފުރަތަމަ ރިސޯޓު އަދި ސަރުކާރާއި ގުޅިގެން އުފެއްދި ޖޮއިންޓް ވެންޗާއެއްގެ ދަށުން ތަރައްގީކޮށް ހުޅުވި ފުރަތަމަ ރިސޯޓު ވެސް މެ އެވެ.
އެމްޑީޕީ ރިޔާސީ ޕްރައިމަރީގެ ކެމްޕެއިނަށް މިހާރު އައްޑޫއަށް ކުރައްވަމުން ގެންދަވާ ދަތުރުފުޅުގައި ރައީސް ވިދާޅުވީ އައްޑޫގެ ތަރައްގީއާ އެންމެ ބޮޑަށް ގުޅިފައި އޮތް އެއް ކަމަކީ ޝަންގްރިއްލާގެ މަސައްކަތް ކަމަށެވެ.
"ސަރުކާރުގެ ހިއްސާއަކާއެކު އޭރު ސަރުކާރުގެ ވަކި ބަޔަކާއެކު ހެދި ކުންފުންޏަކާއެކު ޖޮއިންޓް ވެންޗާއެއް ހަދައިގެން އެ މަސައްކަތް ފަށައިގެން، އެއްވެސް ސަރުކާރަކުން މިހާތަނަށް އައިރު އެތަނަށް ވާނުވާ ބަލަމަކުން ނޫން އައީ،" ރައީސް ވިދާޅުވި އެވެ.
ރައީސް ވިދާޅުވީ ރިސޯޓުގެ އޮޕަރޭޝަން ހުއްޓި، އެތަނަށް ކޮންމެ އަހަރަކު އެތައް މިލިއަން ރުފިޔާގެ ގެއްލުން ވަމުން އަންނަ ކަމަށާއި އެފަދަ ޖޮއިންޓް ވެންޗާއެއްގެ ބައިވެރިވުން އޮވެގެން ރިސޯޓު ހިންގޭނެ ކަމަށް ނުދެކޭ ކަމަށެވެ.
"ސަރުކާރުގެ ހިއްސާ ދޫކޮށްލެވޭނީ ކިހިނެއްތޯ ބަލައި ހޯދައި، ގާނޫނަށް ގެންނަން ޖެހޭ ބަދަލު މިހާރު ވާނީ ގެނެސްފަައި، ހިއްސާ ދޫކޮށްލުމަށް ބެލިއިރުގައި މި ވޭތުވެދިޔަ ތަނުގައި ކުންފުނި ހޯދާފައި އޮތީ ގެއްލުމުގައި،" ޝަންގްރިއްލާ ހުޅުވުމަށް ކުރެވުނު މަސައްކަތްތައް ހިއްސާ ކުރައްވަމުން ރައީސް ވިދާޅުވި އެވެ.
އެހެންނަމަވެސް ހިއްސާ ދޫކޮށްލަން ބެލިއިރު، ސަރުކާރުގެ ހިއްސާ އޮތީ ނެގަޓިވް ކޮށް ކަމަށާއި ދޫކޮށްލާނަމަ 70 މިލިއަން ޑޮލަރު ސަރުކާރުން ދައްކަން ޖެހޭ ކަމަށް ރައީސް ވިދާޅުވި އެވެ.
މިހާރު ޓޫރިޒަމް ގާނޫނު އޮތް ގޮތުން ސަރުކާރުގެ ހިއްސާ އޮންނަ ރިސޯޓު ޖޮއިންޓް ވެންޗާތަކުގެ ހިއްސާ ދޫކޮށްލެވޭނީ ކުއްޔަށް ދޫކޮށްފައިވާ ރަށް ނޫނީ ބިން ނުވަތަ ފަޅުތަކުގެ ބިމުގެ ބޮޑުމިނުގެ ކޮންމެ އަކަމީޓަރަކަށް އަގުކޮށްފަ އެވެ. އަގު ކުރަނީ އެ ކުންފުންޏެއްގައި ހިމެނޭ ސަރުކާރުގެ ހިއްސާ ކޮންމެ އިންސައްތައަކަށް ފަސް ޑޮލަރު މަގުންނެވެ.
ރައީސް ފޭދޫ އެމްޑީޕީ މެންބަރުންނާއެކު؛ މި ރަށުން ރައީސަށް ހޫނު މަރުހަބާއެއް ވަނީ ކިޔާފައި--- ފޮޓޯ: އެމްޑީޕީ
ޝަންގްރިއްލާ ހުޅުވެން ދެން އޮތް ހަމައެކަނި ގޮތަކީ ސަރުކާރުގެ ހިއްސާއާއި ދަރަނި އަޅާ ކަނޑާފައި އައްޑޫ އިންވެސްޓްމަންޓްސް ކުންފުންޏަށް ރިސޯޓު ހިލޭ ދިނުން ކަމުގައި ރައީސް ވިދާޅުވި އެވެ.
ކުންފުންޏަށް ރިސޯޓު ދޫކޮށްލިޔަސް މި ހިސާބަށް މި މައްސަލަ ބޮޑުވުމުގައި އިހުމާލުވި މީހުންނާ މެދު ފިޔަވަޅު ވެސް އަޅަން ޖެހޭ ކަމަށް ރައީސް ވިދާޅުވި އެވެ.
"ތިބޭފުޅުން އެގޮތަށް ގަބޫލުކަމަށް ވަންޏާ ޝަންގްރިއްލާގެ ހިއްސާ ސަރުކާރުން ދޫކޮށްލާ އެފަދަ އިހުމާލެއްވީ ބަޔަކު ހޯދައި އެބަޔަކާ ދޭތެރޭގައި އަޅުގަނޑުމެން ޖެހޭނެ ފިޔަވަޅު އަޅަން،" ފޭދޫގެ އެތައް ސަތޭކަ ރައްޔިތުންނަކާ ވާހަކަ ދައްކަވަމުން ރައީސް ވިދާޅުވި އެވެ.
ރައީސް ވަނީ އައްޑޫގެ ތަރައްގީއަށް ކުރަން ޖެހޭ މަސައްކަތްތައް ހުއްޓާނުލާނެ ކަމުގެ ޔަގީންކަން ރައްޔިތުންނަށް ދެއްވާފަ އެވެ.
ކެމްޕެއިނަށް ރައީސް އައްޑޫއަށް ކުރެއްވި ދަތުރުފުޅުގައި ފޭދޫއަށް ވަޑައިގަތުމުން މި ރަށުގެ އެމްޑީޕީގެ މެންބަރުން ވަނީ އެމަނިކުފާނަށް ހޫނު މަރުހަބާއެއް ކިޔާފަ އެވެ.
ރައީސް މި ރަށަށް ވަޑައިގެންނެވިއިރު އިދިކޮޅު ޕީޕިއެމް މެންބަރުން ވަނީ ބަނދަރު ސަރަހައްދަށް އެއްވެ ސަރުކާރާ ދެކޮޅަށް އަޑު އުފުލާފަ އެވެ. އިހުތިޖާޖުގެ ބައިވެރިން ފުލުހުން ހިފެހެއްޓިނަމަވެސް، ބައެއް ބައިވެރިން ވަނީ ސަފުތައް ފޫއަޅުވާ އެތެރެއަށް ވަނުމަށް މަަސައްކަތް ކޮށްފަ އެވެ.
