ދިވެހިރާއްޖެއިން ބޭރުގައި ކިޔަވާ ބައެއް އުމުރުފުރައިގެ ދަރިވަރުންނަށް ޔޫއެސް ޑޮލަރު ނުފޮނުވޭ ގޮތަށް ބޭންކް އޮފް މޯލްޑިވްސް އިން ކަނޑައެޅުމަކީ ވަރަށް ގިނަ ބައެއްގެ ކަންބޮޑުވުމެއް ކަމަށް ވިދާޅުވެ އެ މައްސަލައަށް ހައްލެއް ހޯދައިދިނުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މިރޭ އެދިވަޑައިގެންފި އެވެ.
ބީއެމްއެލަށް 40 އަހަރު ފުރުން ފާހަގަ ކުރުމަށް މިރޭ ކްރޮސްރޯޑްސްގައި ބޭއްވި ހަފްލާއެއްގައި ވާހަކަ ދައްކަވަމުން ރައީސް ސޯލިހު ވިދާޅުވީ އޭ ލެވެލްއިން ފެށިގެން ދަށުގެ ދަރިވަރުންނަށް ފައިސާ ނުފޮނުވޭ ގޮތް ހެދުމަކީ ވަރަށް ގިނަ ބައެއްގެ ކަންބޮޑުވުމެއް ކަމަށެވެ.
"ދާދިފަހުން ތިޔަ ބޭފުޅުން އިއުލާނު ކުރެއްވި، ރާއްޖެއިން ބޭރުގައި ކިޔަވާ ސްޓޫޑަންޓުންނަށް ފޮނުވާ ޕީޓީ ލިމިޓުވުމުގައި ކަންބޮޑުވުންތަކެއް ބެލެނިވެރިންގެ އެބަހުރި. އެހެންކަމުން ސެންޓްރަލް ބޭންކް އެމްއެމްއޭ އާއި ބޭންކް އޮފް މޯލްޑިވްސް މިކަމާ ދޭތެރޭގައި ވިސްނަވާ މި ކަންބޮޑުވުންތަކަށް ހައްލެއް ހޯދައިދިނުމަކީ ބޭންކުގެ ހިއްސާދާރުންނާއި ބޭންކުގެ ހިދުމަތް ހޯދާ ބޭފުޅުން ވަރަށް ބޮޑަށް އެދިވަޑައިގަންނަވާ ކަމެއް،" ރައީސް ވިދާޅުވި އެވެ.
ބައެއް ދަރިވަރުންނަށް ފައިސާ ނުފޮނުވޭ ގޮތަށް ބޭންކުން ހެދީ އެމްއެމްއޭއިން ގެނައި ބަދަލަކާ ގުޅިގެންނެވެ.
ބީއެމްއެލްގެ ކަސްޓަމަރުންނަށް އެ ބޭންކުން ފޮނުވި އީމެއިލްއެއްގައި ބުނެފައިވަނީ މި މަހުގެ އެއް ވަނަ ދުވަހުން ފެށިގެން ޓިއުޝަން ފީ އާއި ލިވިން އެލަވަންސް އަށް ވާ ޑޮލަރު ދޫކުރާނީ ހަމައެކަނި އޭ ލެވަލްއިން މަތީގެ ޓާޝަރީ ފުލްޓައިމް ދަރިވަރުންނަށާއި، އޭވިއޭޝަން، ލޯ އަދި މެޑިސިން ފަދަ ޕްރޮފެޝަނަލް ދާއިރާތަކުގެ ދަރިވަރުންނަށް ކަމަށެވެ.
"އަޅުގަނޑުމެންނަށް ބަދަލު ގެންނަން ޖެހުނީ، އެމްއެެމްއޭ އިން ދޭ ޑޮލަރު ސަޕޯޓާ އެގޮތަށް އެބަދަލު ގެންނަށް ޖެހިގެން،" ބީއެމްއެލްގެ އޮފިޝަލަކު ކުރިން ވިދާޅުވި އެވެ.
ރާއްޖެއިން ބޭރުގައި ކިޔަވާ އޭ ލެވަލް އިން ދަށުގެ ގްރޭޑްތަކުގެ ދަރިވަރުންނަށް ވެސް ލިވިން އެލަވަންސް އާއި ޓިއުޝަން ފީ އަށް ބޭނުންވާ ބޭރު ފައިސާ ބީއެމްއެލް އިން މީގެ ކުރިން އައީ ހަމަޖައްސައި ދެމުންނެވެ.
