ގދ. ފިޔޯރީ ސްކޫލުގައި އަލިފާނުގެ ބޮޑު ހާދިސާއެއް ހިނގާފައިވީ ނަމަވެސް މަސައްކަތް ކުރަނީ ކިޔެވުން މެދުކަނޑާނުލާ ކުރިއަށް ގެންދިއުމަށް ކަމަށް އެޑިއުކޭޝަން މިނިސްޓްރީންް ބުނެފި އެވެ.
އެޑިއުކޭޝަން މިނިސްޓްރީން ބުނީ އަލިފާނުގެ ހާދިސާއާ ގުޅިގެން ކިޔެވުން މެދުކަނޑާނުލާ ކުރިއަށް ގެންދިއުމަށް ސްކޫލު މެނޭޖްމެންޓާއި ގުޅިގެން މަސައްކަތްް ކުރާ ކަމަަށެވެ.
އެޑިއުކޭޝަން މިނިސްޓްރީއިން ބުނީ އެ ސްކޫލުގައި އަލިފާނުގެ ހާދިސާ ހިނގާފައި ވަނީ މިއަދު ހަވީރު ފަހެއް ޖެހި އިރު ކަމަށެވެ. މި ހާދިސާގެ ސަބަބުންް ސްކޫލުގެ އެއްވެސް މުވައްޒަފަކަށް އަދި އެއްވެސް ކުއްޖަކަށް އަނިޔާވެފައި ނުވާކަމަށް އެމިނިސްޓްރީން ވަނީ ބުނެފަ އެވެ.
އަލިފާން ރޯވެފައި ވަނީ ސްކޫލުގެ ބައު އިމާރާތުގަ އެވެ. އެ އިމާރާތަކީ ސެންް ކްލާހާއި އާންމު ތިންް ކްލާސްރޫމު އަދި ގުދަން ވެސް ހިންގަމުންް ދިޔަ އިމާރާތެވެ.
އެ ސްކޫލް ހިންްގެވުމާ ހަވާލުވެ ހުންނެވި މުހައްމަދު އިގްބާލް "އަދަދު"އަށް ވިދާޅުވީ މި ހާދިސާގައި ސްކޫލްްގެ ބައު އިމާރާތް ބޭނުން ނުކުރެވޭ މިންވަރަށް އަނދައިގެން ގޮސްފައިވާކަމަށެވެ. އަދި އެއް ދަންފަޅިއަށް މިހާރު ކިޔަވައިދެމުން އައި ނަމަވެސް މި ހާދިސާއާ ގުޅިގެން ސްކޫލުގެ ކިޔެވުން ދެ ދަންފަޅިއަށް ބަދަލުކުރުމަށް މަސައްކަތް ކުރާކަމަށް އޭނާ ވިދާޅުވިއެވެ.
ރޯވި އަލިފާންގަނޑު ކޮންްޓްރޯލް ކުރެވުނީ މުޅި އިމާރާތްް އެކީ އަނދައިގެން ދިޔަ ފަހުންނެވެ. ނަމަވެސް, ސްކޫލުގެ އިތުރު އިމާރާތަކަށް އަސަރު ނުކުރާކަމަށް ވެސް އިގުބާލް ވަނީ މައުލޫމާތު ދީފަ އެވެ.
