މާލޭގެ ވަށައިގެން އޮންނަ ބޭރުމަގު ނުވަތަ ބޮޑުތަކުރުފާނު މަގަކީ ދުވާލެއްގެ މައްޗަށް އެތައް ބަޔަކު އެމަގުން ދަތުރުކުރާ މަގެކެވެ. 2018 ވަނަ އަހަރު ތެރޭގައި ހުޅުވި ސިނަމާލެ ބްރިޖާއި ގުޅިފައިވާ މަގުތައް ތަރައްގީކުރުމުގެ މަޝްރުއޫގެ ތެރެއިން ބޮޑުތަކުރުފާނު މަގުގައި ތާރުއަޅާ ހުޅުވާލިތާ ގާތްގަނޑަކަށް ހަތަރު އަހަރު ވެއްޖެ އެވެ.
ބޮޑުތަކުރުފާނު މަގުގައި ތާރު އަޅާ ހުޅުވާލިތާ އަދި މާ ގިނަ އަހަރުތަކެއް ނުވި ނަމަވެސް އެމަގުގެ ބައެއް ސަރަހައްދުތަކުގައި އޮތީ ބޮޑެތި ވަޅުގަނޑުތަކެއް ހެދިފަ އެވެ. ވަޅުގަނޑުތަކުގެ ކައިރިފަތް، ބޯވެފައި ފުނެވެ. މިއީ އެ މަގުގައި ދުއްވާ މީހުންނަށް އެކަމުގެ ސަބަބުުން ނުރައްކާތަކެއް ކުރިމަތިވެދާނެ މައްސަލައެކެވެ.
"ވަޅުތައް ފެނޭ، އެކަމަކު ބަޖެޓެއް ނެތް"
މާލޭގެ މަގުތަކަށް ދިމާވާ މިފަދަ މައްސަލަތައް ހަައްލުކުރުން އޮންނަނީ ސިޓީ ކައުންސިލުގެ ބެލުމުގެ ދަށުންނެވެ. ނަމަވެސް ކައުންސިލުގެ މޭޔަރު ޑރ. މުހައްމަދު މުއިއްޒު "އަދަދު" އަށް ވިދާޅުވީ، ބޭރު މަގުގައި ވަޅުތައް ހުރި ނަމަވެސް އެމަގު މަރާމާތުކުރުމަށް ސިޓީ ކައުންސިލްގެ މާލީ ތަނަވަސްކަން ނެތް ކަމަށެވެ.
"ކުދި ކުދި މަރާމާތު ކުރުމަކީ ވަރަށް ހަރަދު ބޮޑު ކަމެއް. އަޅުގަނޑުމެން އަތަަކު ނުހުރޭ އެހާ ރިސޯސަސްއެއް،" ޑރ. މުއިއްޒު ވިދާޅުވި އެވެ.
މުއިއްޒު ވިދާޅުވީ މަގުތަކުގައި ޖަހާ ގަލަކީ ވެސް ވަކިވަކިން ބޭރުން ހައްދައިގެން ގެންނަ ނަމަ ވަރަށް އަަގުބޮޑު އެއްޗެއް ކަމަށާއި މިހާރު މާލޭގެ އެހެނިހެން މަގުތަކުގައި ހެދިފައި ހުންނަ ޕޮޓްހޯލްތައް ރަނގަޅުކުރުމަށް ވެސް ބޭނުންކުރަނީ ސިޓީ ކައުންސިލުގައި ހުރި ބައު ގާތަކެއް ކަމަށެވެ.
މުއިއްޒު އިތުރަށް ވިދާޅުވީ އެ ކައުންސިލުން މަރާމާތުކުރާ ތަންތަން ނުފެންނަނީ މަގުތަކުގައި ހުންނަ ވަޅުތައް ގިނަކަމުން ކަމަށާއި އެކައުންސިލުގެ ބެލުމުގެ ދަށުން ވެސް ގިނަ ތަަންތަން ރަނގަޅު ކުރެވިއްޖެ ކަމަށެވެ.
މުއިއްޒު ގަބޫލުކުރައްވާ ގޮތުގައި މާލޭގެ މަގުތަކަށް ދާއިމީ ހައްލެއް ގެނައުމަށް އެންމެ މުހިންމު ކަމަކީ ކުރިން ސިޓީ ކައުންސިލުން ހިންގިހެން މަގު ހެދުމުގެ މަޝްރޫތައް ހިންގުމުގެ ބާރު އަނެއްކާވެސް އެކައުންސިލަށް ދިނުމެވެ.
