މިއަހަރު ފަހުކޮޅު ބޭއްވުމަށް ހަމަޖެހިފައިވާ ރިޔާސީ އިންތިހާބު ކާމިޔާބުކޮށް, އެ ވެރިކަން ދަމަހައްޓައި ދެއްވާނެ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ވެލިދޫގައި ކުރިއަށްދާ ރައީސްގެ ރިޔާސީ ޕްރައިމަރީ ކެމްޕޭނު ޖަލްސާގައި ވާހަކަދައްކަވަމުން ރައީސް ވިދާޅުވީ އެމްޑީޕީގެ ހުރިހާ ވިސްނުމަކާ ހަރަކާތެއް ބަހައްޓަންވީ މިއަހަރު އޮންނަ ރިޔާސީ އިންތިހާބު ކާމިޔާބު ކުރުމަށް ކަމަށެވެ. އެގޮތުން, އެ އިންތިހާބު އެއްބުރުން ކާމިޔާބު ކުރައްވާނެ ކަމުގެ ފުރިހަމަ ޔަގީންކަމާއެކު ރައީސް ވިދާޅުވީ ދެވަނަ ދައުރަކަށް އިންތިހާބުވެވަޑައިގެންނެވުމުން އެ ވެރިކަން ދަމަހައްޓައި ދެއްވާނެ ކަމަށެވެ.
އެ މޭރުމުން ވާހަކަ ކުރިއަށް ގެންދަވާ ރައީސް ވަނީ 2008 ވަނަ އަހަރު ބުރަ މަސައްކަތުން ކާމިޔާބު ކުރި ވެރިކަން ނިމިގެން ދިޔަ ގޮތް ހަނދާނުން ފިލައިގެން ނުދާނެކަން ފާހަގަކުރައްވާފަ އެވެ.
ރައީސް ވިދާޅުވީ އެ ވެރިކަން ވެއްޓުމަށްފަހު ރާއްޖޭގައި އޮތް އެންމެ ބޮޑު ޕާޓީ އޮތީ މަގުމަތިވެފައި ކަމަށެވެ. އަދި 2013 ވަނަ އަހަރުގެ ރިޔާސީ އިންތިހާބުން ދެ ޕަސަންޓުން ނާކާމިޔާބުވުމުން އަނެއްކާވެސް މަގުމަތިވެ ތަހަންމަލު ކުރި ބިރުވެރިކަމާއި ނާމާންކަމުގެ ތެރެއަށް ދިޔަކަން އެމަނިކުފާނު ވަނީ ފާހަގަ ކުރައްވާފަ އެވެ.
ސުވާލަކީ ބިރުވެރިކަމާއި ނާމާންކަމުގެ ތެރެއަށް ދާނީތޯ ނުވަތަ ސުލްހަވެރިކަމާއެކު ގައުމައިގެން ކުރިއަށް ދާނީތޯ؟ އެއްވެސް މީހަކު ނޭދޭނެ އެ ބިރުވެރިކަމަށް އަނބުރާ ދާކަށް.
އެ ދުވަސް އަނބުރާ އިއާދަ ނުވާން އޮތީ ރިޔާސީ އިންތިހާބު ކާމިޔާބުކޮށްގެންކަން ރައީސް ވިދާޅުވި އެވެ.
ރައީސް ސޯލިހް ވިދާޅުވީ 50 ޕަސަންޓަށް ވުރެ ގިނަ މީހުންގެ ތާއީދާއެކު އިންތިހާބު ކާމިޔާބު ކުރެވޭނީ ކޯލިޝަނަކާއެކު ކަމަށެވެ. އަދި ތަފާތު ފިކުރުގެ މީހުންނާ ގުޅިގެން އެކުގައި މަސައްކަތް ކޮށްގެން ކަން ފާހަގަކުރައްވައި ރައީސް ވިދާޅުވީ ކޯލިޝަނަކާއެކު ވެރިކަން ކުރެވޭނެ މީހަކަށް އެމްޑީޕީގައި ހުރީ އެމަނިކުފާނު ކަމަށެވެ.
އަދި ދެވަނަ ދައުރެއްގައި ވެސް ވެރިކަން ކުރައްވާނީ ރައްޔިތުން ބޭނުންވާ ގޮތަށް އެއްވެސް މީހަކު ބާކީނުކޮށް ކަމަށް ރައީސް ވިދާޅުވި އެވެ.
މިއީކީ ވަކި މީހަކާ އިދިކޮޅާށް ކުރާކަމެއް ނޫން. ވަކި ބަޔަކު ބާކީކުރަން ކުރާ ކަމެއް ނޫން.
ރިޔާސީ ޕްރައިމަރީއަށްފަހު އެމްޑީޕީ އޮންނާނީ އެކުގައިކަން ފާހަގަކުރައްވާ ރައީސް ވަނީ ޕްރައިމަރީގައި ކެމްޕޭން ކުރަންވީ ގޮތާބެހޭގޮތުން އިލްތިމާސްކުރައްވާފަ އެވެ.
ޕްރައިމަރީއަށް ފަހު އެމްޑީޕީއަކީ އެއްބައެއްކަން ވިސްނުމުގައި ބެހެއްޓުމަށް ރައީސް ވަނީ މިރޭގެ ޖަލްސާގައި ވެސް ތަކުރާރުކޮށް އިލްތިމާސްކުރައްވާފަ އެވެ. އަދި ކެމްޕޭނުގައި މިހާތަނަށް ވަޑައިގެންނެވި ހުރިހާ ރަށެއްގައި ވެސް ތަކުރާރުކޮށް ގެންދަވަނީ އެކަން ހަނދާން ކޮށްދެއްވަމުންނެވެ.
ޕާޓީގެ ރިޔާސީ ޕްރައިމަރީގައި ރައީސް ސޯލިހާ ދެކޮޅަށް ޕާޓީގެ ރައީސް އަދި ކުރީގެ ރައީސް މުހައްމަދު ނަޝީދު ވާދަކުރައްވާއިރު، ދެ ރައީސުންގެ މެދުގައި ބަހުގެ ހަމަލާތަކާއި ފާޑުކިޔުންތައް ވަނީ އިތުރުވެފަ އެވެ.
ޖެނުއަރީ 28، ގައި ބާއްވާ ރިޔާސީ ޕްރައިމަރީގައި އެމްޑީޕީގެ 57،000 މެމްބަރުންނަށް ވޯޓުލެވޭނެ އެވެ. މިއީ މިފަހުން ޕާޓީގެ އެތެރޭގެ އިންތިހާބެއް މިހާ ވާދަވެރިކޮށް ކުރިއަށްދާ ފުރަތަމަ ފަހަރެވެ. މިއީ ރިޔާސީ ޕްރައިމަރީއެއްގައި ރައީސް ސޯލިހު ވާދަ ކުރައްވާ ފުރަތަމަ ފަހަރެވެ. ރައީސް ނަޝީދު މީގެ ކުރިން ދެ ފަހަރަކު ވާދަ ކުރެއްވި އެވެ.
