ޑިމޮކްރަސީއެއް ފައްކާވަމުން އަންނައިރު, ކަންކަން ހަމަޖެހި ތަރުތީބު ވަންދެން ގިނަ ފިކުރުގެ މީހުން އެކުލެވޭ ކޯލިޝަނެއް އޮތުން މުހިންމު ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ރިޔާސީ ޕްރައިމަރީގެ ކެމްޕޭނަށް ނ.މަނަދޫއަށް ވަޑައިގެން އެމްޑީޕީގެ މެންބަރުންނާ މުހާތަބު ކުރައްވާ ރައީސް ވިދާޅުވީ ރައްޔިތުން އަދިވެސް އިހުތިޔާރު ކުރަނީ ގިނަ ފިކުރުގެ ގިނަ ޕާޓީތައް އެކުލެވޭ ސަރުކާރެއް ކަމަށެވެ. ރައީސް ވިދާޅުވީ އެއީ އެންމެ ރަނގަޅު ގޮތް ކަމަށެވެ.
"ކަންތައްތައް ހަމަޖެހި, ތަރުތީބު ވަންދެން ގިނަ ފިކުރުތައް އެއްތަނެއްގައި ތިބެ މަޝްވަރާކޮށްގެން ކަންކަން ނިންމުމަކީ ގައުމަށް އެންމެ ފައިދާހުރި ގޮތް ކަމަށް އަޅުގަނޑު ގަބޫލު ކުރަނީ،" ރައީސް ވިދާޅުވި އެވެ.
ރައީސް އިތުރަށް ވިދާޅުވީ, އެމްޑީޕީގެ އަޒުމަކީ ކޮންމެ އިންތިހާބެއް ވެސް ކާމިޔާބު ކުރުން ކަމަށެވެ. ނަމަވެސް މާޒީން ފެންނަން އޮތީ މޮޅާއި ބަލިވުމެވެ. އެގޮތުން އެމްޑިޕީގެ ކުރީގެ ސަރުކާރު ނިމިގެން ދިއުމާއެކު ރާއްޖޭގެ އެންމެ ބޮޑު ޕާޓީ ކަމަށްވާ އެމްޑީޕީ މަގުމަތިވެގެން ދިޔަކަން އެމަނިކުފާނު ފާހަގަކުރެއްވި އެވެ.
ކުރީ ސަރުކާރަށް ވަރަށް ބޮޑަށް ފާޑުވިދާޅުވަމުން ރައީސް ވިދާޅުވީ އެއީ އަނިޔާވެރި, ހުދުމުހުތާރު ވެރިކަމެއް ކަމަށެވެ. އަދި އެއީ ޑިމޮކްރަސީގެ އެއްވެސް ސިފައެއް ނެތް ވެރިކަމެއް ކަން ވެސް ފާހަގަކުރެއްވި އެވެ.
ކޯލިޝަނުގެ މުހިންމު ކަމާބެހޭގޮތުން ރައީސް މަނަދޫގައި ވާހަކަ ދައްކަވާފައިވާއިރު, މީގެ ކުރިން ވަޑައިގެންނެވި ކެމްޕޭން ޖަލްސާތަކުގައި އެމަނިކުފާނު ވަނީ ކޯލިޝަން ވެރިކަމެއް ދެމެހެއްޓޭނީ ހަމައެކަނި އެމަނިކުފާނަށް ކަމަށް އިޝާރާތް ކުރައްވާފަ އެވެ.
އެމްޑީޕީ ރިޔާސީ ޕްރައިމަރީގެ ކެމްޕޭން މާލޭގައި އިފްތިތާހު ކުރުމަށްފަހު ކުރައްވާ ފުރަތަމަ ދަތުރުފުޅުގައި ރައީސް ވަނީ ރ އަތޮޅު މާކުރަތު, އިންނަމާދޫ އަދި މީދޫގެ އިތުރުން ނ. ކެނދިކުޅުދޫ އާއި މަނަދޫއަށް ވަޑައިގެންފަ އެވެ. ރައީސްގެ ކެމްޕޭން އިފްތިތާހު ކުރުމުގެ ރަސްމީ ޖަލްސާ އޮންނާނީ މިރޭ ނ. ވެލިދޫގަ އެވެ.
