ފެށުނީއްސުރެ ރައްޔިތުންގެ މަޖިލީހުންނާއި, އިދިކޮޅުން ސަރުކާރަށް ގޮންޖެހުންތައް ކުރިމަތި ކުރުވަމުން ދިޔަ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ރިޔާސީ ޕްރައިމަރީގެ ކެމްޕޭނަށް ނ. ކެނދިކުޅުދުއަށް ވަޑައިގެން ރައީސް ވިދާޅުވީ ފެށުނީއްސުރެ ސަރުކާރަށް ކުރިމަތިވަމުންދިޔަ ގޮންޖެހުންތައް ހުރަސްކޮށް ހަތަރު އަހަރު ތެރޭ އެހެން އެއްވެސް ސަރުކާރަކަށް ނުކޮށްދެވޭހާ ހިދުމަތް މި ސަރުކާރަށް ކޮށްދެވިއްޖެ ކަމަށެވެ. އަދި ކޮންމެ ފަސް އަހަރެއްގެ ހިސާބު ޖެހުމުން އެކަން ސާބިތުވެގެންދާނެ ކަމަށް ރައީސް ވިދާޅުވި އެވެ.
ފެށުނީއްސުރެ މި ސަރުކާރަށް ގޮންޖެހުންތަކެއް މަޖިލިސް ތެރެއިންނާއި އަދި އިދިކޮޅު ޕީޕީއެމްގެ ފަރާތުން ވެސް ކުރިމަތިވި.
ރައީސް ވިދާޅުވީ އެ ގޮންޖެހުންތައް ހުރަސްކޮށް ރައްޔިތުންނަށް ހިދުމަތް ކޮށްދެއްވީ ކެތްތެރިކަމާއެކު ކަމަށެވެ. އަދި ފަސް އަހަރު ތެރޭގައި އެއްވެސް ސަރުކާރަކަށް ނުކޮށްދެވޭހާ މަސައްކަތް މި ހަތަރު އަހަތު ތެރޭގައި ކޮށްދެއްވިއްޖެ ކަމަށެވެ.
އެމްޑީޕީ މެންބަރުންނާ މުހާތަބު ކުރައްވާ ރައީސް ވިދާޅުވީ މި ސަރުކާރުން އެއްވެސް ރަށެއް ބާކީ ނުކުރާ ކަމަށާއި, ކައިރީގައި އޮތް ކުޑަކުޑަ ހެނބަދޫގައި ވެސް ވަރަށް ގިނަ މަޝްރޫއުތައް ހިންގާލެވިއްޖެ ކަމަށެވެ. އަދި އެއީ މިހާރު ބާކީވެފައި އޮތް ރަށެއް ނޫން ކަމަށް ވިދާޅުވި އެވެ.
އެމަނިކުފާނު ވިދާޅުވީ ސަރުކާރަކުން ރައްޔިތަކަށް ކޮށްދޭ އެއްވެސް ކަމަކީ އެއީ އިސްރާފެއް ނޫން ކަމަށާއި, އެގޮތަށް ދެކިގެން ނުވާނެ ކަމަށެވެ.
ސަރުކާރުން އެއްވެސް ރަށެއް ބާކީ ނުކުރާ ކަމަށް ރައީސް ވިދާޅުވި ވިދާޅުވުމަކީ ކެމްޕޭނަށް ވަޑައިގެން ކޮންމެ ރަށެއްގައި އެމަނިކުފާނު ތަކުރާރު ކުރައްވާ ވާހަކަފުޅެކެވެ. އޭގެ އިތުރަށް އެމަނިކުފާނު ގެންދަވަނީ ކޮންމެ ރަށެއްގައި ވެސް ހިނގަމުންދާ މަޝްރޫއުތަކުގެ ފަހުގެ މައުލޫމާތު ހިއްސާ ކުރައްވާ, ރައްޔިތުންގެ ކަންބޮޑުވުންތައް އަޑުއައްސަވާ އެކަންކަމަށް ހައްލު ހޯދައިދެއްވަން މަސައްކަތް ކުރައްވާނެ ކަމަށް ވިދާޅުވަމުންނެވެ.
ކެނދިކުޅުދޫއަކީ އާބާދީ އިތުރުކުރެވޭނެކަން ފާހަގަކުރައްވަމުން ރައީސް ވަނީ, އެ ރަށުގައި ތަރައްގީގެ މަޝްރޫއުތައް ހިންގާނީ އެކަމަށް ވިސްނައިގެންނެވެ. އަދި ރައްޔިތުން ބޭނުންވާކަންކަން ކުރެވޭނީ ވެރިކަމުގައި ހުރެގެންކަން ފާހަގަކުރައްވާ އެމަނިކުފާނު ވިދާޅުވީ އިދިކޮޅުގައި ހުންނަވައިގެން ޝަކުވާ ކުރައްވަން ބޭނުންފުޅު ނުވާ ކަމަށެވެ. އެހެންކަމުން, ދެވަނަ ދައުރަކަށް އެމަނިކުފަނު އިންތިހާބު ކުރުމަށް މިމަހު 28 ވަނަ ދުވަހު ނިކުމެ, ގަނޑުކޮށް ވޯޓުއަޅައި ދިނުމަށް ރައީސް ވަނީ އެދިވަޑައިގެންފަ އެވެ.
