އެމްޑީޕީގެ އިސް ލީޑަރު އަދި ރައީސް އިބްރާހީމް މުހައްމަދު ސޯލިހުގެ ރިޔާސީ ޕްރައިމަރީގެ ކެމްޕޭންގެ ފުރަތަމަ ދަތުރާއި، ޕީޕީއެމްގެ ރިޔާސީ ކެންޑިޑޭޓް އަދި ކުރީގެ ރައީސް އަބްދުﷲ ޔާމީންގެ ރިޔާސީ ކެމްޕޭންގެ ދަތުރެއް އެއް މަންޒިލަކަށް އެއް ދުވަސްވަރަކު ކުރާ ގޮތަށް ހަމަޖެހިއްޖެ އެވެ.
އެނގިފައިވާ ގޮތުގައި ރައީސްގެ ހައިސިއްޔަތުން ކުރައްވާ ދަތުރުފުޅެއްގައި މާދަމާ ރ. އަތޮޅަށް ރައީސް ސޯލިހު ވަޑައިގަންނަވަ އެވެ. އެ ދަތުރުފުޅަށް ފަހު، ހުކުރު ދުވަހުން ފެށިގެން އަންގާރަ ދުވަހަށް، އެމްޑީޕީގެ ރިޔާސީ ކެމްޕޭންގެ ޕްރައިމަރީއަށް ނ. އަތޮޅަށް އެމަނިކުފާނު ވަޑައިގަންނަވާނެ އެވެ.
މި ވަގުތު މާފުށީ ޖަލުގައި 11 އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާ ޔާމީންގެ ކެމްޕޭން ދަތުރު، އެމަނިކުފާނު ޓީމުގެ ފަރާތުން ނ. އަތޮޅުގައި ވެސް ފަށާނީ އަންނަ ހުކުރު ދުވަހުގަ އެވެ. އަދި އެ ދަތުރު ނިންމާލާނީ ވެސް އަންނަ އަންގާރަ ދުވަަހަށެވެ.
މި އަހަރު ބާއްވާ ރިޔާސީ އިންތިހާބުގެ ފޯރި ގަދަވެ، ރައީސްގެ ކެމްޕޭން ދަތުރަކާއި ޔާމީންގެ ކެމްޕޭން ދަތުރެއް އެއް މަންޒިލަކަށް އެއް ދުވަސްވަރަކަށް ކުރުމަށް ހަމަޖެހިފައި އޮތް އިރު، މިރޭ މާލެ ސަރަހައްދުގެ އިރުމަތީ ކޮޅުގައި ވެސް މި ޓީމުގެ ހަރަކާތްތަކެއް އެބަ އޮތެވެ.
އެ ގޮތުން ރައީސް ސޯލިހު ބައިވެރިވެވަޑައިގަންނަވާ ކެމްޕޭން ޖަލްސާއެއް އެމްޑީޕީގެ ހަރުގޭގައި އޮތް އިރު، އެ ހަރުގެ ކުރިމަތީ އޮންނަ އާޓިފިޝަލް ބީޗުގައި އިދިކޮޅު ލީޑަރު ޔާމީން މިނިވަން ކުރުމަށް ގޮވާލާ އަޑުއުފުލުމުގެ ގޮތުން ޖަލްސާއެއް އޮންނާނެ އެވެ.
އިދިކޮޅުގެ ހަރަކާތް މިރޭ 8:45 ގައި ފެށޭއިރު، ރައީސް ސޯލިހުގެ ކެމްޕޭނު ޖަލްސާ ފެށުމަށް ހަމަޖެހިފައިވަނީ 9:00 ގަ އެވެ.
ރައީސް ސޯލިހުގެ ކެމްޕޭނު ޖަލްސާއަކީ ޕްރައިމަރީގެ ކެމްޕޭނުގައި މިހާތަނަށް އެމަނިކުފާނު ބައިވެރިވެވަޑައިގަންނަވާ ފުރަތަމަ ޖަލްސާ އެވެ. ކެމްޕޭނުގައި ރައީސް ނުފެނުމުގެ ސަބަބުން ދެން ޕްރައިމަރީގާ ވާދަކުރައްވާ ކެންޑިޑޭޓު، ޕާޓީގެ ރައީސް މުހައްމަދު ނަޝީދު ވަނީ ވަރަށް ބޮޑަށް ފާޑުވިދާޅުވެފަ އެވެ.
ރައީސް ސޯލިހަށް ތާއިދުކުރާ ގިނަ ފަރާތްތަކުން އަންނަނީ މިރޭ އިދިކޮޅުން ބާއްވާ ހަރަކާތަކީ ރައީސްގެ ކެމްޕޭނަށް ހުރަސްއަޅާ މަސްލަހަތު ނަގާލަން ކުރާ ކަމެއް ކަމަށް ތުހުމަތުކުރަމުންނެވެ. ނަމަވެސް އިދިކޮޅުން ބުނަމުންދަނީ މިރޭގެ ހަރަކާތަކީ ދުރާލާ ރޭވިގެން، މާލެ ސިޓީ ކައުންސިލްގެ ހުއްދައާ އެކު ބާއްވާ ޖަލްސާއެއް ކަމަށް ބުނެފަ އެވެ.
ޔާމީން ޖަލަށްލުމާ އެކު އިދިކޮޅު ކޯލިޝަނުން އަންނަނީ ސިލްސިލާ ގޮތެއްގައި އެކި ހަރަކާތްތައް ހިންގަމުންނެވެ. އެގޮތުން މިދިޔަ މަހުގެ 25 ވަނަ ދުވަހު ޔާމީން ޖަލަށް ލުމާ އެކު ކޮންމެ ރެއަކު މާލޭގެ މަގުތަކުގައި، ޔާމީން ދޫކޮށްލުމަށް ގޮވާލާ އިދިކޮޅުން ދަނީ މުޒާހަރާ ކުރަމުންނެވެ. ޔާމީން 11 އަހަރަށް ޖަލަށް ލާން ހުކުމް ކޮށްފައިވަނީ ވ. އާރަށް ކުއްޔަށް ދިނުމުގައި ރިޝްވަތު ނަންގަވައި މަނީލޯންޑާ ކުރެއްވި ކަމުގެ ކުށް ސާބިތުވާ ކަމަށް ކްރިމިނަލް ކޯޓުން ކަނޑައެޅުމަށް ފަހުގަ އެވެ.
