މި އަހަރު ބާއްވާ ރިޔާސީ އިންތިހާބުގެ ފޯރި ގަދަވެ އެމްޑީޕީގެ ޕްރައިމަރީއަށް ރައީސް އިބްރާހިމް މުހައްމަދު ސޯލިހުގެ ޓީމުން ބާއްވާ ޖަލްސާ އަދި އިދިކޮޅުން ބާއްވާ ހަރަކާތް މިރޭ އެއް ސަރަހައްދެއްގައި ބާއްވާކަން އިއުލާނުކޮށްފި އެވެ.
މިރޭގެ ދެ ހަރަކާތް ވެސް ކުރިއަށްދާނީ މާލޭގެ އިރުމަތީ ފަރާތުން އެމްޑީޕީ މައި ޖަގަހަ އަދި އާޓިފިޝަލް ބީޗު ސަރަހައްދުގަ އެވެ. އެގޮތުން އިދިކޮޅުގެ ހަރަކާތް މިރޭ 8:45 ގައި ފެށޭއިރު، ރައީސް ސޯލިހުގެ ކެމްޕޭނު ޖަލްސާ ފެށުމަށް ހަމަޖެހިފައިވަނީ 9:00 ގަ އެވެ.
މިރޭގެ ދެ ހަރަކާތުގެ ތެރެއިން ރައީސް ސޯލިހުގެ ކެމްޕޭނު ޖަލްސާއަކީ ޕްރައިމަރީގެ ކެމްޕޭނުގައި މިހާތަނަށް އެމަނިކުފާނު ބައިވެރިވެވަޑައިގަންނަވާ ފުރަތަމަ ޖަލްސާ އެވެ. ކެމްޕޭނުގައި ރައީސް ނުފެނުމުގެ ސަބަބުން ދެން ޕްރައިމަރީގާ ވާދަކުރައްވާ ކެންޑިޑޭޓު، ޕާޓީގެ ރައީސް މުހައްމަދު ނަޝީދު ވަނީ ވަރަށް ބޮޑަށް ފާޑުވިދާޅުވެފަ އެވެ. އެގޮތުން ރައީސް ކެމްޕޭނު ކުރައްވަނީ ޣައިރު ހާޒިރުގައި ކަމަށް ނަޝީދު ވަނީ ވިދާޅުވެފަ އެވެ.
"އަޅުގަނޑަށް ދެން ފެންނަނީ ޣައިރު ހާޒިރުގައި ކުރައްވާ ކެމްޕޭނެއް، ޣައިބުގައި ހުންނަވާ ލީޑަރެއް، ތިޔަ ބޭފުޅުން ކުރިމަތީގައި އަޅުގަނޑު ހުންނާނެ، އަޅުގަނޑު މިހާރު ވެސް މި ހުރީ ތިޔަ ބޭފުޅުންނަށް ފެންނަ ގޮތަށް،" މި މަހުގެ ދެވަނަ ދުވަހު އެމްޑީޕީގެ މައި ހަރުގޭގައި ވާހަކަ ދައްކަވަމުން ނަޝީދު ވިދާޅުވި އެވެ.
ރައީސް ސޯލިހަށް ތާއިދުކުރާ ގިނަ ފަރާތްތަކުން އަންނަނީ މިރޭ އިދިކޮޅުން ބާއްވާ ހަރަކާތަކީ ރައީސްގެ ކެމްޕޭނަށް ހުރަސްއަޅާ މަސްލަހަތު ނަގާލަން ކުރާ ކަމެއް ކަމަށް ތުހުމަތުކުރަމުންނެވެ. ނަމަވެސް އިދިކޮޅުން ބުނަމުންދަނީ މިރޭގެ ހަރަކާތަކީ ދުރާލާ ރޭވިގެން، މާލެ ސިޓީ ކައުންސިލްގެ ހުއްދައާ އެކު ބާއްވާ ޖަލްސާއެއް ކަމަށް ބުނެފަ އެވެ.
އިދިކޮޅު ކެންޑިޑޭޓު، ކުރީގެ ރައީސް އަބްދުﷲ ޔާމީން ޖަލަށްލުމާ އެކު އިދިކޮޅު ކޯލިޝަނުން އަންނަނީ ސިލްސިލާ ގޮތެއްގައި އެކި ހަރަކާތްތައް ހިންގަމުންނެވެ. އެގޮތުން މިދިޔަ މަހުގެ 25 ވަނަ ދުވަހު ޔާމީން ޖަލަށް ލުމާ އެކު ކޮންމެ ރެއަކު މާލޭގެ މަގުތަކުގައި، ޔާމީން ދޫކޮށްލުމަށް ގޮވާލާ އިދިކޮޅުން ދަނީ މުޒާހަރާ ކުރަމުންނެވެ. ޔާމީން 11 އަހަރަށް ޖަލަށް ލާން ހުކުމް ކޮށްފައިވަނީ ވ. އާރަށް ކުއްޔަށް ދިނުމުގައި ރިޝްވަތު ނަންގަވާ މަނީލޯންޑާ ކުރެއްވި ކަމުގެ ކުށް ސާބިތުވުމުގެ ސަބަބުންނެވެ.
