ރާއްޖެ އަންނަ ޗައިނާ ފަތުރުވެރިންނާ މެދު އަޅާނެ ފިޔަވަޅެއް އަދި ނިންމާފައި ނުވާ ކަމަށް އެޗްޕީއޭއިން ބުނެފި އެވެ.
އެޗްޕީއޭއިން ބުނީ، ރާއްޖެ އަންނަ ޗައިނާ ފަތުރުވެރިންނާ މެދު ގޮތެއް ނިންމުމަށް މިއަދު ކަމާބެހޭ ފަރާތްތަކާ އެކު ބައްދަލުވުމެއް ބޭއްވުމަށް ހަމަޖެހިފައިވާ ކަމަށެވެ. އަދި ފިޔަވަޅެއް އާޅާނެތޯ ނިންމާނީ އެއަށްފަހު ކަމަށެވެ. ނަމަވެސް ޗައިނާއިން އަންނަ ފަތުރުވެރިން ގާތުން މޮނިޓާ ކުރަމުންދާނެ ކަމަށް އެޗްޕީއޭއިން ބުނެ އެވެ.
ޗައިނާގައި ހަލުވި ކަމާއެކު ބަލި ފެތުރުނު ނަމަވެސް އެކަށީގެންވާ ފިޔަވަޅުތައް ނާޅާތީ، ގިނަ ގައުމުތަކުން ވަނީ ޗައިނާއިން އަންނަ ފަތުރުވެރިންނާ މެދު ފިޔަވަޅު އަޅަން ނިންމާފަ އެވެ. ޗައިނާއިން ކޮވިޑްގެ ތަފާތު ވޭރިއެންޓުތައް ފެތުރިދާނެ ކަމުގެ ބިރާ އެކު އެމެރިކާ، ކެނެޑާ އަދި ޖަޕާން ހިމެނޭހެން ދުނިޔޭގެ ބޮޑެތި ގައުމުތަކުން ވަނީ ޗައިނާއިން އަންނަ ފަތުރުވެރިން ކޮވިޑް ޓެސްޓު ހަދަން މަޖުބޫރުކޮށްފަ އެވެ.
ކޮވިޑްގެ ބަލިމަޑުކަމާ އެކު ޗައިނާގައި ހަރުކަށި ފިޔަވަޅުތަކެއް އަޅާފައި އޮތުމަށްފަހު ދޫކޮށްލީ މިދިޔަ ޑިސެމްބަރު މަހެވެ. އެގޮތުން އެ ގައުމަށް އެތެރެވާ މީހުން ފުރިހަމަ ކުރަންޖެހޭ ކަރަންޓީނު މުއްދަތު އުވާލާފައި ވެއެވެ. 2019 ވަނަ އަހަރު ކޮވިޑް އައީއްސުރެ ހަރުކަށި ފިޔަވަޅުތަކެއް އަޅާފައި އޮތުމަށް ދޫކޮށްލުމުން، އެ ގައުމުން ގިނަ އަދަދެއްގެ ފަތުރުވެރިން ވަނީ ދަތުރު ކުރަން ފަށާފަ އެވެ.
ހަރުކަށި ފިޔަވަޅުތައް ދޫކޮށްލުމުން، ޗައިނާގައި ވަނީ ހަލުވި ކަމާއެކު ކޮވިޑް ފެތުރެން ފަށާފަ އެވެ. ބަލި ކޮންޓްރޯލްކުރަން ދަތި, ހަލުވި މިނެއްގައި ޗައިނާގައި ކޮވިޑް ފެތުރެމުންދާއިރު، އެ ގައުމުގެ ހޮސްޕިޓަލްތަކާއި، ސަހަރާތައް ވެސް ވަނީ ފުރިފަ އެވެ.
ނަމަވެސް އެ ގައުމުން ވަނީ ކޮވިޑް ކަމަށް ކަނޑައަޅާ މިންގަނޑަށް ބަދަލު ގެނެސްފަ އެވެ. އޭގެ ސަބަބުން، އެ ގައުމުން ރިޕޯޓުކުރާ ކޮވިޑްގެ ކޭސްތަކާއި، ކޮވިޑުގައި މަރުވާ މީހުންގެ އަދަދުތައް ގުނަނީ އިންތިހާ ދަށުންނެވެ.
