މި މަހު ބާއްވާ މޯލްޑިވިއަން ޑިމޮކްރެޓިކް ޕާޓީގެ ރިޔާސީ ޕްރައިމަރީގައި ވޯޓު ލެވޭ މީހުންގެ ލިސްޓަށް ހުށަހެޅި ހުރިހާ ޝަކުވާތަކެއް ބަލައި، ފުރިހަމަ ވޯޓާސް ލިސްޓެއް އާންމުކުރާނެކަމުގެ ޔަގީންކަން އިންތިހާބާ ބެހޭ ކޮމިޓީއިން ދީފި އެވެ.
އެ ޕާޓީގެ ގައުމީ މަޖިލީހުން ހޮވި ފަސް މެމްބަރުންގެ ކޮމިޓީން މިއަދު ބޭއްވި ނޫސްވެރިންގެ ބައްދަލުވުމެއްގައި އެ ކޮމިޓީގެ މުގައްރިރު އިބްރާހިމް ވަހީދު (އިބުރޭ) ވިދާޅުވީ ޝަކުވާ ހުށަހެޅުމަށް ހުޅުވާލި މުއްދަތުގައި ޖުމްލަ 905 ޝަކުވާއެއް ހުށަހެޅި ކަމަށެވެ. އަދި އެ ޝަކުވާތަކަށް އެޓެންޑުވެފައިވާ ކަމަށް ވިދާޅުވެ މާދަމާ އާންމުކުރާ ވޯޓާސް ލިސްޓު ފުރިހަމަ ވާނެ ކަމުގެ ޔަގީންކަން އޭނާ ދެއްވި އެވެ.
"މީގެ ތެރޭގައި އެބަ ހިމެނޭ ނިޔާވެފަވާ ފަރާތްތައް ހިމެނިގެން [ހުށަހެޅި ޝަކުވާތައް]، ދާއިރާ ބަދަލުވެގެން އެކަން ކުރުމަށް ހުށަހެޅި މައްސަލަތައް އެބަހުރި،" އިބުރޭ ވިދާޅުވި އެވެ.
ލިބުނު ޝަކުވާތަކަށް ބަލާއިރު ވޯޓާސް ލިސްޓުގައި ނަން ނެތް ކަމަށް ބުނެ 900 އެއްހާ މީހުން ޝަކުވާ ހިމެނޭ ކަމަށް އިބްރާހިމް ވަހީދު ވިދާޅުވި އެވެ. އަދި އެ ޝަކުވާތައް ބެލިއިރު އޭގެ ތެރެއިން 683 މީހަކު އިލެކްޝަންސް ކޮމިޝަނުގެ އެއްވެސް ޕާޓީއެއްގެ ދަފުތަރުގައި ނެތް ކަމަށާއި ނަމަވެސް އޭގެ ތެރެއިން 212 މީހަކު އީސީގެ އެހެން ޕާޓީތަކުގެ ދަފުތަރުގައި އެބަތިބި ކަމަށް އޭނާ ވިދާޅުވި އެވެ.
އޭގެ އިތުރުން ހުށަހެޅި ހުރިހާ ޝަކުވާތަކަކަށް މިއަދު ޖަވާބުދޭން ފަށާނެ ކަމަށް ވެސް ވިދާޅުވި އެވެ.
އެމްޑީޕީގެ ދަފުތަރާއި ވޯޓާސް ލިސްޓާމެދު އެންމެ ބޮޑަށް ފާޑުވިދާޅުވަމުން އަންނަނީ ޕްރައިމަރީގައި ވާދަކުރައްވާ ޕާޓީގެ ރައީސް މުހައްމަދު ނަޝީދު އެވެ. އެގޮތުން ނަޝީދު ވަނީ އެބޭފުޅާގެ ބޭބެ އަދި އަނބިކަބަލުން ހިމެނޭހެން އަރިސް އެތައް ބަޔަކު ޕާޓީއިން ވަކިކޮށްފައިވާ ކަމަށް ތުހުމަތުކުރައްވާފަ އެވެ.
ނަމަވެސް މިއަދު ބޭއްވި ނޫސްވެރިންގެ ބައްދަލުވުމުގައި ނަޝީދުގެ ތުހުމަތު ދޮގުކުރައްވާ ވަހީދު ވިދާޅުވީ ނަޝީދުގެ އަރިސް ބޭފުޅުން ޕާޓީއިން ވަކިކޮށްފައިވާ ކަމަށް ގަބޫލުނުކުރައްވާ ކަމަށެވެ.
