ޕީޕީއެމްގެ ޓިކެޓުގައި މި އަހަރުގެ ރިޔާސީ އިންތިހާބުގައި ވާދަކުރާ ރައީސް ޔާމީން އަބްދުލްގައްޔޫމަށް ސިޔާސީ ނުފޫޒުން "ހަރާން" ހުކުމެއްކޮށް ޖަލަށްލުމުގެ ބޭނުމަކީ މިވަގުތު ވެރިކަމުގައި ހުންނެވި ރައީސް އިބްރާހީމް ސޯލިހު ދެވަނަ ދައުރަކަށް އިންތިހާބުވުމަށް ކޮށި މަގެއް ކަމަށް އިދިކޮޅުން ބުނެފި އެވެ.
މީލާދީ އާ އަހަރުގެ ތަހުނިޔާ ފޮނުވައި އިދިކޮޅުން ނެރުނު ބަޔާނެއްގައި ބުނީ، ރައީސް ޔާމީނަށް ކޮށްފައިވަނީ ސިޔާސީ ނުފޫޒު ބޭނުންކޮށްގެން ކޮށްފައިވާ ހުކުމެއް ކަމަށެވެ.
އިދިކޮޅުން ބުނީ 2023 ވަނަ އަހަރު ފެށިގެން އައީ ރައްޔިތުންގެ އުންމީދު ގައުމުގެ ބާނީ ރައީސް ޔާމީނަށް ހަރާން ހުކުމެއް ޖަހައި ޖަލުގެ ތޭރިތަކުގެ ތެރެއަށް ލައިގެން ކަމަށާއި، އެމަނިކުފާނަށް ހަރާމް ހުކުމެއް ޖެހުމުގެ އެންމެ ބޮޑު ބޭނުމަކީ ރައީސް ސޯލިހު ދެވަނަ ދައުރަކަށް އިންތިހާބުވުމަށް ކޮށައިދިން މަގެއް ކަމަށެވެ.
އަދި މިއީ ދިވެހި ރައްޔިތުންނަށް ހިތްދަތިކަމާއި، މާޔޫސްކަމުގެ ހަތަރު އަހަރަށް އިތުރުވި ބޮޅެއް ކަމަށްވެސް ބަޔާނުގައި ބުންޏެވެ.
"ރައްޔިތުންގެ ދިރިއުޅުމުގެ އަގުބޮޑުކޮށް، ރައްޔިތުން އަތުން އަށް ޕަސެންޓުގެ ޖީއެސްޓީ އެއް ނަގާ ތަކެތީގެ އަގުބޮޑުކުރުމުގެ އިތުރުން ރައްޔިތުން ނިކަމެތި ކުރަމުންނެވެ. މިހުރިހާ ކަމަކުން އަރައިގަނެވެން އޮތީ މިއަހަރު ރިޔާސީ އިންތިހާބުގައި އިބްރާހީމް މުހައްމަދު ސޯލިހު އާއި، ސަރުކާރު ކޯލިޝަންގައި ހިމެނޭ ފަރާތްތައް ބަލިކޮށް ރައީސް ޔާމީން އަނބުރާ ވެރިކަމަށް ގެނެސްގެން ކަން އެއީ ޔަގީންވާކަމެކެވެ،" ބަޔާނުގައި ބުނެފައިވެ އެވެ.
މީގެ އިތުރުން އެމަނިކުފާނު ޖަލުގައި ރަހީނުކޮށްގެން އުޅުނު ނަމަވެސް، އެމަނިކުފާނު ހިތްވަރަކަށް ބަދަލެއް ނާންނާނެ ކަމަށާއި، އެމަނިކުފާނު ހުންނެވީ ވަރަށް ސާބިތުކަމާއި އަޒުމާއެކު ކަމަށްވެސް އިދިކޮޅުން ބުންޏެވެ.
އިދިކޮޅުން ވަނީ މިވެރިކަން ބަދަލުކުރުމުގެ އަޒުމުގައި އެންމެހާ ދިވެހި ރައްޔިތުން ނުކުތުމަށްވެސް ގޮވާލާފަ އެވެ.
