ފާއިތުވި އަހަރަކީ ގޮންޖެހުންތައް ގިނަ އަހަރެއް ކަމަށާއި، އެ ގޮންޖެހުންތަކާ އެކު ވެސް ހާސިލު ކުރެވުނު ކަންކަމާ މެދު ފަހުރުވެރިވެވަޑައިގަންނަވާ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
އެމަނިކުފާނު އެހެން ވިދާޅުވީ ރައީސްގެ ދެކަނބަލުންގެ ފަރާތުން ދިވެހިރާއްޖޭގެ ރައްޔިތުންނަށް އާ އަހަރުގެ ތަހުނިޔާ ފޮނުއްވުމަށް ކުރެއްވި ޓުވީޓެއްގަ އެވެ.
ރައީސްގެ ޓުވީޓުގައި އެމަނިކުފާނު ވަނީ މި ފެށުނު އާ އަހަރަކީ ގިނަ ފުރުސަތުތަކެއް ތަނަސްވެގެންދާނެ އަހަރެއް ކަމުގައި ގަބޫލުފުޅު ކުރައްވާ ކަމަށާއި އެ ފުރުސަތުތަކަށް އިންތިޒާރު ކުރައްވާނެ ކަމަށް ވިދާޅުވެފަ އެވެ.
ނިމުނު އަހަރަކީ ގޮންޖެހުންތައް ގިނަ އަހަރެއްގެ ގޮތުގައި ރައީސް ސިފަކުރެއްވި އިރު، މިދިޔަ އަހަރު ރާއްޖޭގެ އިތުރުން ދުނިޔޭގެ އިގުތިސާދު ވެސް ވަރަށް ބޮޑަށް ހީނަރުވެގެންދިޔަ އަހަރެކެވެ. ހާއްސަ ގޮތެއްގައި ރަޝިއާ-ޔޫކްރެއިން ހަނގުރާމައާއި ކޮވިޑުގެ ބަލިމަޑުކަމުން ރައްކާތެރިވުމަށް އެޅި ފިޔަވަޅުތަކުގެ ސަބަބުން ދުނިޔޭގެ އިގުތުސާދަށް ބޮޑެތި އަސަރުތަކެއް ކުރި އެވެ.
އެ އަސަރުތަކުގެ ސަބަބުން އަވައްޓެރި ސްރީލަންކާ އެއްކޮށް ބަނގުރޫޓުވި އިރު ރާއްޖޭގައި ވެސް ތަކެތީގެ އަގު ވަނީ ކުރިއާ އަޅާ ބަލާއިރު ވަރަށް ބޮޑަށް އުފުލިފަ އެވެ. އަދި މިއަދުން ފެށިގެން ވަނީ ވިޔަފާރި މުދަލުން ނަގާ ޖީއެސްޓީ ވެސް އަށް ޕަސެންޓު ބޮޑު ކުރަން ނިންމާފަ އެވެ.
އާ އަހަރު ފާހަގަ ކުރެއްވުމަށް ކޮޅުނބުގައި ހުންނަވާ ކުރެއްވި ޓުވީޓު އެ މަނިކުފާނު ނިންމަވާލެއްވީ މި ފެށުނު އާ އަހަރަކީ ހުރިހާ އެންމެންނަށް ވެސް އުފާ ފާގަތި އަހަރެއްކަމުގައި އެދެމުންނެވެ.
