މާލެތެރެ ސާފުކޮށް ބޭއްވުމަށް ކުރަން ޖެހޭ ހުރިހާ ކަމެއް ސަރުކާރުން ކުރާނެ ކަމަށާއި އެ މަސައްކަތް ކުރިއަށް ގެންދާނީ ވަކި މީހަކަށް ބެލުމެއް ނެތި ކަމަށް މިނިސްޓަރު އައިމިނަތު ޝައުނާ މިއަދު ވިދާޅުވެއްޖެ އެވެ.
މާލެ ސާފު ކުރުމުގެ މަސައްކަތާ މިދިޔަ އަންގާރަ ދުވަހުން ފެށިގެން ސިޓީ ކައުންސިލުން ހަވާލުވި ފަހުން، ރަށު ތެރެ ގޮނޑުވަމުންދާތީ ޝައުނާގެ އެންގެވުމަށް ކުރިން އެ މަސައްކަތް ކުރި ވޭސްޓް މެނޭޖްމަންޓް ކޯޕަރޭޝަނުން އިއްޔެ ވަނީ މާލެ ސާފު ކުރަން ނިކުމެފަ އެވެ. އެކަމާ ގުޅިގެން "އަދަދު" އާ މިއަދު ވާހަކަ ދައްކަވަމުން ޝައުނާ ވިދާޅުވީ މާލެތެރެ ކުނިވާން ސަރުކާރުން ދޫނުކޮށްލާނެ ކަމަށެވެ.
"ދެތިން ދުވަސް މިވީ އަދި ވެމްކޯއާ އެކު އޮތް ކޮންޓްރެކްޓު ނިމުމަކަށް އައިތާ. އެފަހަކުން ސަރުކާރުގެ ސިޔާސަތުތަކާ އެއްގޮތަށް ސިޓީ ކައުންސިލުން މިކަން [މާލެތެރެ ސާފްކުރުމުގެ މަސައްކަތް] އެންމެ އެދެވޭ ގޮތަކަށް ކުރާތަނެއް ނުފެނޭ،" ޝައުނާ ވިދާޅުވި އެވެ.
މާލެ ސާފުކޮށް ބެލެހެއްޓުމަށް ވެމްކޯއާއެކު ހަދާފައި އޮތް އެއްބަސްވުން ސިޓީ ކައުންސިލުން އާ ނުކުރީ އަގު ބޮޑުވުމުންނާއި އެދެވޭ ގޮތެއްގައި މަސައްކަތުގެ ޒިންމާ އެ ކުންފުނިން ނުނަގާ ކަމަށް ބުނެ އެވެ. ސިޓީ ކައުންސިލުން އެ މަސައްކަތް ފެށީ 100 އެއްހާ މުވައްޒަފުންނާއެކު މަސައްކަތަށް ބޭނުންވާ ސާމާނު ވެސް ކުއްޔަށް ނަގައިގެނެވެ.
މާލެ ސާފުކޮށް ބެހެއްޓުމާ ގުޅޭ ގޮތުން ވާހަކަ ދައްކަވަމުން ޝައުނާ ވިދާޅުވީ އާންމު ސިއްހަތައް ގެއްލުން ނުވާނޭ ގޮތަކަށް ކުނި މެނޭޖް ކުރުމަކީ ސަރުކާރުގެ ޒިންމާއެއް ކަމަށެވެ. އަދި ވިދާޅުވީ، "ވަކި މީހަކު މާހަރުކޮށް އެއްޗެއް ބުނާތީ" ސަރުކާރުގެ ސިޔާސަތުތައް ތަންފީޒުކުރުން މަޑުޖައްސާ ނުލައްވާނެ ކަމަށެވެ.
މިނިސްޓަރު ވިދާޅުވީ ވެމްކޯގެ ކޮންޓްރެކްޓު ނިމުމަކަށް ގެނެސް އެ މަސައްކަތާ ސިޓީ ކައުންސިލުން ހަވާލުވުމަށް ފަހު ކުރީގައި ހިނގަހިނގާ އޮތް ނިޒާމު އޭގެ އެންމެ ރަނގަޅުގޮތުގައި ހިނގަމުން ދިޔަ މަންޒަރު ނުފެނުނު ކަމަށެވެ.
"އެންމެ ދުވަހަކުވެސް މާލޭގެ މަގުތައް މައްޗަށް ކުނިތައް ޖަމާވެފައި ހުރުމަކީ އަޅުގަނޑުމެންނަށް ދޫދެވޭނެ ކަމެއް ނޫން،" ޝައުނާ ވިދާޅުވި އެވެ.
ވެމްކޯއަކީ މާލޭގެ ކުނި މެނޭޖްކުރުމަށް ރައީސް އަބްދުﷲ ޔާމީންގެ ސަރުކާރުގައި 2016 ވަނަ އަހަރު އުފެއްދި ކޯޕަރޭޝަނެކެވެ. ވެމްކޯއިން ވަނީ މިދިޔަ ފަސް އަހަރު ދުވަހުގެ މުއްދަތުގައި މާލެތެރެ ސާފްކުރުމާއި ގޭބިސީތަކުން ކުނި ނެގުމުގެ މަސައްކަތް ކުރިއަށް ގެންގޮސްފަ އެވެ.
