އެމްޑީޕީގެ ދަފްތަރުން އުނިވި މެންްބަރުން އަލުން ޕާޓީއަށް ރުޖޫއަކުރެވެންދެން ޕާޓީގެ ރިޔާސީ ޕްރައިމަރީ ފަސްކުރުމަށްް ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ކެމްޕެއިނު ޓީމުން ގޮވާލައިފި އެވެ.
މިއަދު ބޭއްވި ނޫސްވެރިންްގެ ބައްދަލުވުމުގާ ވާހަކަ ދައްކަވަމުން ނަޝީދުގެ ކެމްޕެއިނު ޓީމުގެ ފަރާތުން ހެންވޭރު ހުޅަނގު ދާއިރާގެ މެންބަރު ހަސަން ލަތީފު ވިދާޅުވީ، އެމްޑީޕީގެ ދަފްތަރުން 39،000 މެންބަރުން އުނިވެފައިވާކަމުގެ ޝަކުވާތައް ކެނޑިނޭޅި ލިބެމުންދާ ކަމަށާއި އިންތިހާބު ބާއްވަންޖެހޭނީ އެ ޝަކުވާތައް ބެލުމަށްފަހު ކަމަށެވެ.
"ހަގީގަތުގައި އެމްޑީޕީން މިވަގުތު ކުރަންވީ މަސައްކަތަކީ ޕްރައިމަރީ ބޭއްވުމުގެ މަސައްކަތް މަޑުޖައްސާލާފައި، އެމްޑީޕީން ވަކިކޮށްފައި އޮތް 39.000 މެންބަރުންގެ ހައްގުތައް ހޯދައިދެވޭނެ ކަހަލަ ގޮތަކަށް މަސައްކަތްކޮށް، އެ މަސައްކަތް ނިންމުމުގެ ކުރިން ޕްރައިމަރީ މަޑު ޖައްސާލުން،" ހަސަން ވިދާޅުވި އެވެ.
އެމްޑީޕީގެ ދަފްތަރުން ވަކިވި މެމްބަރުންގެ ތެރޭގައި ނަޝީދަށް ތާއީދު ކުރާ މީހުން ވަރަށް ގިނަ ކަމަށް ވެސް ހަސަން ލަތީފް ތުހުމަތު ކުރެއްވި އެވެ.
"އަޅުގަނޑުމެންނަށް ފާއިތުވެ މިދިޔަ ކުރު މުއްދަތުގެ ތެރޭގައި، އަޅުގަނޑުމެންގެ ސާވޭތަކުން ދައްކާ ގޮތުން ގާތްގަނޑަކަށް 80 ޕަސެންޓާ ގާތްކުރާ އަދަދަކަށް މިދެންނެވި ވަކިކުރި 39،000 މެންބަރުންގެ ތެރޭގައި ތިބީ ރައީސް ނަޝީދަށް ތާއިދުކޮށް އަދި މި ޕްރައިމަރީގައި ވެސް ވޯޓު ދިނުމަށް ތައްޔާރަށް ތިބި މެންބަރުން،" އޭނާ ވިދާޅުވި އެވެ.
އޭގެ އިތުރުން، ހަސަން ލަތީފް ވިދާޅުވީ އިންތިހާބުގެ ވޯޓާސް ލިސްޓުގައި ހިމެނޭ މީހުންގެ އައިޑީކާޑު ނަމްބަރު އެނގޭ ނަމަ އިންތިހާބުގެ ކަންކަމަށް ފަސޭހަވެގެންދާނެ ކަމަށާއި ނަމަވެސް އިއްޔެ ވޯޓާސް ލިސްޓު ރައީސް ނަޝީދާ ހަވާލުކުރި އިރު އައިޑީކާޑު ނަމްބަރުތައް އުނިކުރެވިފައިވާ ކަމަށެވެ. އެ ލިސްޓު ދީފައިވާނީ އައިޑީކާޑު ނަނމްބަރުތަކާއެކު ކަމުގެ ޔަގީންކަން އިލެކްޝަން ކޮމިޝަނުން ދީފައިވާ ކަމަށް ވެސް އޭނާ ވިދާޅުވި އެވެ.
"ޕާޓީން ބުނަނީ އިލެކްޝަންް ކޮމިޝަނުން އެބޭފުޅުންނާ [ވޯޓާސް ލިސްޓު] ހިއްސާކުރައްވާފައި ވަނީ އައިޑީކާޑު އޭގާ ނުހިމެނޭ ގޮތަށް ކަމަށް. އެހެން ނަމަވެސް އިލެކްޝަންސް ކޮމިޝަނުން އަޅުގަނޑު މި ދެންނެވިހެން ވިދާޅުވެފައިވަނީ އެއީ ޕާޓީން މެމްބަރުންގެ ލިސްޓު އައިޑީކާޑާ އެކީގައޭ ހުށަހަޅަނީ އިލެކްޝަން ކޮމިޝަނަށް. އެހެންމާ ތިމަންނާމެން އަނެއްކާ އަނބުރާ ޕާޓީއަށްް އެ ސައްހަ މެންބަރުންގެ ގޮތުގާ ލިސްޓު ދޭއިރު އައިޑީކާޑު ނަމްބަރާ ނުލާ ހުށަހެޅުމަކީ ހަމަޖެހޭ ކަމެއްވެސް ނޫނޭ. އަދި އެއީކީ ސިއްރެއްވެސްް ނޫނޭ،" ހަސަން ލަތީފް ވިދާޅުވި އެވެ.
އައިޑީކާޑު ނަމްބަރުތައް ދީފައި ވަނީ މިއަދުކަން ފާހަގަކޮށް ހަސަން ލަތީފް ވިދާޅުވީ، ވޯޓާސް ލިސްޓާ ގުޅިގެން ޝަކުވާ ހުށަހެޅުމަށް ދީފައިވާ ކުރު މުއްދަތުން އެއް ދުވަސް މިކަމުގެ ސަބަބުން ބޭކާރުވެގެން ގޮސްފައިވާ ކަމަށެވެ.
