ރައީސުލްޖުމްހުރިއްޔާ އިބްރާހިމް މުހައްމަދު ސޯލިހާއި ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދާ ދެމެދު ޖެހިފައިވާ މައްސަލައަކީ ރައީސް ސޯލިހު ވެރިކަމުގައި ހުންނަވާ، ވެރިކަމުގެ ޒިންމާ އަދާނުކުރެއްވުން ކަމަށް ހެންވޭރު ހުޅަނގު ދާއިރާގެ މެންބަރު، ހަސަން ލަތީފު ވިދާޅުވެއްޖެ އެވެ.
އަންނަ މަހު ބާއްވާ އެމްޑީޕީގެ ރިޔާސީ ޕްރައިމަރީގައި ވާދަކުރައްވާ ނަޝީދުގެ ކެމްޕޭން ޓީމުން މިއަދު ބޭއްވި ނޫސްވެރިންގެ ބައްދަލުމެއްގައި ހަސަން މިހެން ވިދާޅުވީ، އިއްޔެ ނޫސްވެރިންނާ ބައްދަލުކުރައްވާ ނަޝީދާ ދެމެދު އޮތް މައްސަލައަކީ އެމަނިކުފާނު ވެރިކަން ބޭނުންވުން ކަމަށް ރައީސް ސޯލިހު ވިދާޅުވުމުން އެކަމަށް ރައްދު ދެއްވަމުންނެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި "އަދަދު" އިން ކުރި ސުވާލަށް ޖަވާބުދެއްވަމުން ހަސަން ވިދާޅުވީ ރައީސް ނަޝީދު ފާހަގަކުރައްވާ މައްސަލައަކީ އެމްޑީޕީގެ މެނިފެސްޓޯ ތަންފީޒުނުކުރުން ކަމަށާއި ރައީސް ސޯލިހު ވެރިކަމަށް ވަޑައިގެން ހުންނެވީ ވަރަށް ގިނަ ވައުދުތަކެއް ވެވަޑައިގެން ކަމަށެވެ.
"ރައީސް ނަޝީދުގެ މައްސަލައަކީ ރައީސް ސޯލިހު ވެރިކަމުގައި ހުންނެވުމެއް ނޫން، ވެރިކަމުގައި ނުހުންނެވުން، ވެރިކަން ކުރައްވާތަން ފެނިވަޑައިނުގަތުން، ކަމެއް ނުކުރެއްވުން، އެއްވެސް ކަމަކާ އަޅާނުލެއްވުން، ފަރުވާކުޑަކުރެއްވުން،" ހަސަން ވިދާޅުވި އެވެ.
އޭގެ އިތުރުން، ރައީސް ސޯލިހު އުޅުއްވަނީ މެނިފެސްޓޯ ބޭއްވުމަށްފަހު އެހެން ކަމަކާ ކަމަށާއި ރައީސްގެ ގާތް ބޭފުޅުން އިންތިހާއަށް ކޮރަޕްޝަން ހިނގަމުންދާއިރު އެކަން ކަމަށް ރޯމަލައިގެން ހުންނަވާ ކަމަށް ވެސް ހަސަން ތުހުމަތު ކުރެއްވި އެވެ.
"[މައްސަލައަކީ] ބޮޑެތި ހިޔާނަތް ކުރައްވައިގެން ތިއްބެވި ބޭފުޅުން މާގިނައިން މާކައިރީގައި ތިއްބަވާކަން، މާގިނަ ލަފާދެއްވާކަން،" ހަސަން ވިދާޅުވި އެވެ.
ގިނަ ދުވަސްތަކަށްފަހު އިއްޔެ ނޫސްވެރިންނާ ބައްދަލުކުރައްވާ، ނޫސްވެރިޔެއްގެ ސުވާލަށް ޖަވާބުދެއްވަމުން ރައީސް ސޯލިހު ވިދާޅުވީ އެމަނިކުފާނާއި ނަޝީދާ ދެމެދު އޮތް އަސްލު މައްސަލައަކީ ނަޝީދު ވެރިކަން ބޭނުންވުން ކަމަށެވެ.
"އަޅުގަނޑު ނޫން ކޮންމެ ބޭފުޅަކު ވެރިކަމުގައި ހުންނެވި ނަމަވެސް މި މައްސަލަ އޮންނާނެ. ރައީސް ނަޝީދަކީ އަބަދުވެސް ވެރިކަމުގައި ހުންނަން ބޭނުންވާ ބޭފުޅެއް،" ރައީސް ވިދާޅުވި އެވެ.
އެމްޑީޕީގެ އެތެރޭގައި ގިނަ މައްސަލަތަކެއް ޖެހި ދެ ރައީސުންނަށް ތާއިދުކުރާ ފެކްޝަނެއް ތަކެއް އުފެދި ހޫނުގަދަ ބަހުގެ ހަމަލާތައް ބަދަލުކުރާތާ ދުވަސްތަކެއް ވެފައިވީ ނަމަވެސް މިއީ އެކަންކަމަށް ރައީސް ސޯލިހު ފާޅުގައި ޖަވާބުދެއްވި ފުރަތަމަ ފަހަރެވެ.
