ރިޔާސީ އިންތިހާބުގައި އެމްޑީޕީން ވާދަކުރައްވާނެ ކެންޑިޑޭޓަކު ހޮވުމަށް ބާއްވާ ޕްރައިމަރީން ނާކާމިޔާބުވާ މަންޒަރު ނުފެންނަ ކަމަށް ރައީސް އިބްރާހިމް މުހައްމަދު ސޯލިހް މިއަދު ވިދާޅުވެއްޖެ އެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން ރައީސް ވިދާޅުވީ، އެމްޑީޕީގެ ރިޔާސީ ޕްރައިމަރީން ނާކާމިޔާބުވެއްޖެ ނަމަ ދެން ވާނެ ގޮތަކާ މެދު ވާހަކަ ދައްކަވަން ނޭނގޭ ކަމަށާއި، އެއީ އެ އިންތިހާބުގައި ނާކާމިޔާބުވާނެ ކަމަށް ކުޑަކޮށް ވެސް ނުފެންނަ ކަމަށެވެ.
އެ ސުވާލު ތަކުރާރުކުރުމުން ރައީސް ވިދާޅުވީ ނާކާމިޔާބުވާ މަންޒަރު ނުފެންނަ ކަމަށެވެ. އެކަމަކު އެފަދަ ހާލަތެއް އަޔަސް, އެމަނިކުފާނަކީ އެމްޑީޕީގެ މެންބަރެއް ކަމަށާއި އަބަދުވެސް ތާއިދު ކުރައްވާނީ އެމްޑީޕީގެ ކެންޑިޑޭޓަށް ކަމަށް ވިދާޅުވި އެވެ.
"އަޅުގަނޑަކީ އެމްޑީޕީގެ މެންބަރެއް. އެމްޑީޕީން ކުރިމަތިލާ ކޮންމެ ކެނޑިޑޭޓަކާ އެކީ އަޅުގަނޑުގެ ތާއީދު އޮންނާނެ. އެއީ ވަކި ބޭފުޅެއް ނޫން," ރައީސް ސޯލިހް ވިދާޅުވި އެވެ.
އެމްޑީޕީގެ ޕްރައިމަރީގައި ވާދަކުރައްވާ ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދާއި ރައީސް ސޯލިހްގެ ދެމެދުގައި ހިޔާލުތަފާތުވުންތައް އުފެދި އެމްޑީޕީ ވަނީ ދެ ފެކްޝަނަކަށް ބައިބައިވެފަ އެވެ. ބައެއް ހާލަތްތަކުގައި ބަހުގެ ހަމަލާތައް ވެސް އަމާޒުކުރެ އެވެ.
ކަންމިހެން އޮތް އިރު ރައީސް ސޯލިހް ޕްރައިމަރީއިން ނާކާމިޔާބުވެވަޑައިގެންފި, ހާލަތެއްގައި ވެސް އަލުން ދެ ރައީސުން އެކުގައި މަސައްކަތް ކުރައްވާނެ ކަމާމެދު ގިނަ ބަޔަކު ސުވާލު އުފައްދަ އެވެ.
