މާލެ/ވިލިމާލޭގެ އާންމު ތަންތަން ސާފުކުރުމާއި ކުނި ނެގުމަށް މާލެ ސިޓީ ކައުންސިލާއި ވެމްކޯއާ ދެމެދު ވެފައިވާ އެއްބަސްވުން ނިމުމަކަށް އައުމާއެކު މަގުތަކުން ކުނި ނެގުމަކީ ވެމްކޯގެ ޒިންމާއެއް ނޫން ކަމަށް އެ ކޯޕަރޭޝަނުގެ މެނޭޖިން ޑިރެކްޓަރު ޔޫސުފް ސިރާޖް ވިދާޅުވެއްްޖެ އެވެ.
ސިރާޖު "އަދަދު"އަށް މިއަދު ވިދާޅުވީ، ކޮންޓްރެކްޓް އުވާލުމާއެކު ވެމްކޯއިން ދެމުން ގެންދާނީ އިމާރާތްތަކުގެ ކަލެކްޝަން ޕޮއިންޓުން ކުނި ނެގުމާއި އެޕާޓްމެންޓުތަކަށް އަރާ ކުނި ނެގުމުގެ ހިދުމަތް ކަމަށެވެ.
މި ހިދުމަތަށް ރަޖިސްޓްރީކޮށްގެން ހިދުމަތް ހޯދަމުން އަންނަނީ ގާތްގަނޑަކަށް 25،000 ކަސްޓަމަރުން ކަން ފާހަގަކުރައްވައި ސިރާޖް ވިދާޅުވީ، މާލޭގެ ޖުމްލަ ގޭބިސީތަކުގެ އަދަދު 60،000 އިން މަތި ކަމަށެވެ.
"ހަގީގަތުގަ މިއަދު މާލެ ސިޓީ ކައުންސިލަށްވެސް އެނގެންވީ ކަމަކީ ފާއިތުވެ ދިޔަ ތާނގާ ވެމްކޯއިން މިދިޔައީ މުޅި މާލޭ ރައްޔިތުންނަށް ހިދުމަތް ދެމުންކަން. ރަޖިސްޓާޑްއެއް އަންރެޖިސްޓާޑެއް ބެލުމެއް ނެތި" ސިރާޖް ވިދާޅުވި އެވެ.
މާލޭގެ އިމާރާތްތަކުންް މަގުމައްޗަށް ނެރެފައި ހުންނަ ކުނި ރަޖިސްޓްރީކޮށްފައިވޭތޯ ބެލުމެއް ނެތި ކުނި ނެގުމުގެ މަސައްކަތް ކުރެވެމުން ދިޔަ އެންމެ ބޮޑު އެއް ސަބަބަކީ ސިޓީ ކައުންސިލާ ވެމްކޯއާ ދެމެދު އޮތް އެއްބަސްވުން ކަމަށް ސިރާޖް ފާހަގަކުރެއްވި އެވެ.
"އެހެންވީމަ އަޅުޅުގަނޑުމެންނާއެކު މި އެގްރީމެންޓު އާ ނުކުރުމުން ނޫނީ އޭގެ މުއްދަތު ހަމަވުމާ ގުޅިގެން އިއްޔެއިން ފެށިގެން އަޅުގަނޑުމެން މި ނިންމީ މަގުމައްްޗަށް ނެރެފަ ހުންނަ ކުންޏަކާ ވެމްކޯއިން ޒިންމާއެއް ނުވާނެއޭ،" ސިރާޖް ވިދާޅުވި އެވެ.
ސިރާޖް އިތުރަށް ވިދާޅުވީ މަގުމަތީގައި ހުންނަ ކުނި ނުނަގާތީ އެކަމާ ގުޅިގެން އެންމެ ގަދައަށް ނުރުހުން ފާޅުކޮށް ވާހަކަ ދައްކަމުން އަންނަނީ ވެސް ސިޓީ ކައުންސިލުން ކަމަށާއި، ނަމަވެސް މި ހިދުމަތް އެ އިދާރާއިން ދޭން ފެށުމުން މިމަސައްކަތް ކުރަން ޖެހޭތީ ކަންބޮޑުވެގެން އުޅޭ ކަމަށެވެ.
މިއަދު ސިޓީ ކައުންސިލުން މަގުތައް ސާފުކުރާއިރުވެސް އެ ދިމާވަނީ އެއް މައްސަލައެއް ކަމަށް ސިރާޖް ފާހަގަކުރެއްވި އެވެ.
"އަޅުގަނޑުމެން ހިތްވަރުދޭކަމެއް ނޫން އެއީ މާލޭގެ މަގުމައްޗަށް ކުނި އެޅުމަކީ. އަޅުގަނޑުމެން ހިދުމަތް ދޭނަން ރަޖިސްޓާޑް ކަސްޓަމާސްއަށް" ސިރާޖް ވިދާޅުވި އެވެ.
އާންމު ތަންތަން ސާފްކުރުމާއި ކުނި ނެގުމުގެ ހިދުމަތް ސިޓީ ކައުންސިލުން ފެށުމާ ގުޅިގެން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މޭޔަރު ޑރ. މުހައްްމަދު މުއިއްޒު ވިދާާޅުވީ ވެމްކޯއިން އަންނަނީ އެ ކައުންސިލަށް "ޖެއްސުންކުރަމުން" ކަމަށެވެ.
ވެމްކޯއިން ހިތްވަރު ދެނީ މަގުތަކަށް ކުނި ނެރުމަށް ކަމަށްވެސް މުއިއްޒު ވިދާޅުވިއެވެ. އަދި އެގޮތަށް ކަންކަން ކުރާ ނަމަ ގާނޫނީ ފިޔަވަޅު އަޅާނެ ކަމުގެ އިންޒާރުވެސް ދެއްވި އެވެ.
