ވެރިކަން ކުރާ އެމްޑީޕީގެ ރިޔާސީ ޕްރައިމަރީއާ ގުޅިގެން ޝަކުވާ ހުށަހެޅުމުގެ ފުރުސަތު ހުޅުވާލައިފި އެވެ.
ރިޔާސީ ޕްރައިމަރީއާ ގުޅިގެން ޝަކުވާ ހުށަހެޅުމަށް ކަނޑައަޅާފައިވާ ފޯމު މިހާރު އެމްޑީޕީގެ ވެބްސައިޓުން ލިބެން ހުރިއިރު، ޝަކުވާ ބަލާ ކޮމިޓީއެއް ވެސް އެ ޕާޓީން ވަނީ އެކުލަވާލާފަ އެވެ.
އެމްޑީޕީގެ ރިޔާސީ ޕްރައިމަރީގެ ޝަކުވާ ބަލާ ކޮމިޓީ:
- އަހްމަދު އަބްދުﷲ ލަތީފް
- އަފްޝަން ލަތީފް
- މުހައްމަދު ހާޝިމް
ޝަކުވާ ހުށަހެޅުމުގެ ފުރުސަތު ހުޅުވާލާފައިވާއިރު، އިއްޔެ އެމްޑީޕީން ވަނީ ޕްރައިމަރީގައި ބައިވެރިވާ ކެންޑިޑޭޓުންގެ ނަންތައް އިއުލާންކޮށްފަ އެވެ. އެގޮތުން، މަޖިލިސް ރައީސް މުހައްމަދު ނަޝީދަށް ކެންޑިޑޭޓް ނަންބަރު އެކެއް ލިބުނުއިރު، ރައީސް އިބްރާހިމް މުހައްމަދު ސޯލިހަށް ލިބިވަޑައިގެންނެވީ ކެންޑިޑޭޓު ނަންބަރު ދޭކެވެ.
ދެ ރައީސުންގެ ފޯމު ހުށަހަޅުއްވައި ކެމްޕޭނު ފަށާފައިވާއިރު ޕާޓީގެ ތެރޭގައި ދެ ފެކްޝަނެއް އުފެދި ފާޅުގައި ބަހުގެ ހަމަލާތައް ބަދަލުކުރަން ވަނީ ފަށާފަ އެވެ. އެގޮތުން ރައީސް ނަޝީދު ވަނީ މި ސަރުކާރުން ވައުދުތައް ނުފުއްދާ ކަމަށް ބުނެ ރައީސް ސޯލިހުގެ ވެރިކަން މި ނިމެނީ ކަމަށް ވެސް ވިދާޅުވެފަ އެވެ.
އެމްޑީޕީ ދެ ފެކްޝަނުގެ ކޯޅުން ޕްރައިމަރީން ފެނިގެންދާއިރު، ރިޔާސީ ޕްރައިމަރީގެ އިންތިހާބީ ކޮމިޓީއަށް މެންބަރުން ނެގުމަށް ބޭއްވި ގައުމީ މަޖިލީހުގެ ޖަލްސާ ވެސް ވަނީ ހޫނުވެފަ އެވެ. އެގޮތުން، ރައީސް ނަޝީދު ފެކްޝަނުން ބޭނުންވި ގޮތަށް އިންތިހާބީ ކޮމިޓީއަށް މެންބަރުން ނުހޮވުމުން، އެ ފެކްޝަނުގެ މެންބަރުން ވަނީ ޖަލްސާ ދޫކޮށް ވަޑައިގެންފަ އެވެ. އެހެންކަމުން އިންތިހާބީ ކޮމިޓީ ހޮވާފައި ވަނީ ނަޝީދު ފެކްޝަނުގެ ވޯޓާ ނުލަ އެވެ.
އެމްޑީޕީ އަކީ ރާއްޖޭގެ އެންމެ ގިނަ ދުވަސްވީ އެންމެ ބޮޑު ސިޔާސީ ޕާޓީ އެވެ. މިވަގުތު އެޕާޓީގެ ދަފްތަރުގައި 58،000 މެމްބަރުން އެބަ ތިއްބެވެ.
