ރައީސް އިބްރާހިމް މުހައްމަދު ސޯލިހް މިއަދު ނޫސްވެރިންނާ ބައްދަލު ކުރައްވާ ގޮތަށް ހަމަޖައްސަވައިފި އެވެ.
ރައީސް އޮފީހުގައި ނޫސްވެރިންނާ އެންމެ ފަހުން ބައްދަލުކުރެއްވީ ޖޫން 8، 2022 ގަ އެވެ. އެހެންކަމުން މި ނޫސްވެރިންގެ ބައްދަލުވުން މި ބާއްވަނީ އެންމެ ފަހުން ރައީސް ނޫސްވެރިންނާ ބައްދަލުކުރެއްވިތާ 203 ދުވަސް ފަހުންނެވެ.
އެމަނިކުފާނު ނޫސްވެރިންނާ ބައްދަލުކުރައްވާނީ މިއަދު ހަވީރު 4:30 ގައި ކަމަށް ރައީސް އޮފީހުގެ އޮފިޝަލަކު ވަނީ "އަދަދު" އަށް ވިދާޅުވެފަ އެވެ.
ރައީސް ސޯލިހު ނޫސްވެރިންނާ ބައްދަލު މިކުރައްވަނީ ރާއްޖޭގެ ސިޔާސީ މަސްރަހު ހަލަބޮލިވެފައިވާ ދަނޑިވަޅެއްގަ އެވެ.
އެގޮތުން، އިދިކޮޅު ލީޑަރު އަދި ކުރީގެ ރައީސް އަބްދުﷲ ޔާމީންގެ މައްޗަށް މަނީ ލޯންޑާ ކުރުމާއި ރިޝްވަތު ހިފުމުގެ ދަައުވާ ސާބިތުވެ 11 އަހަރުގެ އަހަރުގެ ޖަލު ހުކުމެއް ގެންދަނީ ތަންފީޒު ކުރައްވަމުންނެވެ. އެ ހުކުމް ބަލައިނުގަންނަ ކަމަށް ބުނެ ރައީސް ޔާމީން މިނިވަން ކުރުމަށް ގޮވާލައި އިދިކޮޅުން ގެންދަނީ ތަކުރާރުކޮށް މުޒާހަރާ ކުރަމުންނެވެ.
ހަމައެހެންމެ، އަންނަ އަހަރު އޮންނަ ރިޔާސީ އިންތިހާބުގައި ވާދަކުރުމަށް އެމްޑީޕީގެ ރިޔާސީ ޓިކެޓަށް ރައީސް ގެންދަވަނީ ވާދަކުރައްވަމުންނެވެ. އެމަނިކުފާނާ ދެކޮޅަށް ނުކުންނަވަނީ މަޖިލިސް ރައީސް އަދި އެ ޕާޓީގެ ރައީސް މުހައްމަދު ނަޝީދު އެވެ.
މިއީ ރިޔާސީ ޕްރައިމަރީގައި ވާދަކުރައްވަން ފޯމު ހުށަހެޅުއްވި ފަހުން ރައީސް ސޯލިހު ދެއްވާ ފުރަތަމަ ނޫސްވެރިންގެ ބައްދަލުވުމެވެ. ރައީސް ނަޝީދުގެ ފެކްޝަނުން ގެންދަނީ ރައީސް ސޯލިހުގެ ސަރުކާރަށް ބޮޑެތި ފާޑުކިޔުންތައް އަމާޒު ކުރަމުންނެވެ. އެ ފާޑުކިޔުންތަކަށް މިއަދު ރައީސް ރައްދު ދެއްވާނެ ކަމަށް ބެލެވެ އެވެ.
އިގްތިސާދީ ގޮތުން ރާއްޖެއަށް ދަތިތަކެއް ކުރިމަތިވެފައިވާއިރު މިކަމާ ގުޅިގެން ވެސް އެމަނިކުފާނު ވާހަކަ ދައްކަވާނެ އެވެ.
ނޫސްވެރިންނަށް ސުވާލު ކުރުމުގެ ފުރުސަތު ހުޅުވާލާ ގޮތަށް ބާއްވާ މި ޕްރެސް ޓީވީތައް މެދުވެރިކޮށް ލައިވް ކުރާ ގޮތަށް ވަނީ ހަމަޖެހިފަ އެވެ.
