މާލޭގެ އާންމު ތަންތަނުން ކުނި ނެގުމާއި ސާފްކުރުމަށް މާލެ ސިޓީ ކައުންސިލުން ވޭސްޓު މެނޭޖްމެމެންޓް ކޯޕަރޭޝަން (ވެމްކޯ)އާއެކު ވެފައިވާ އެއްބަސްވުން އާ ނުކުރުމުން ގުޅިގެން އެ ހިދުމަތް ހުއްޓާލައިފި އެވެ.
ކައުންސިލުން ވެމްކޯއާއެކު ފަސް އަހަރު ދުވަހުގެ މުއްދަތަކަށް ވެފައިވާ އެއްބަސްވުމުގެ މުއްދަތު އިއްޔެއަށް ހަމަވިއިރު، ދެން މާލެ ސާފުކޮށް، ކުނި ނަގަމުންދާނީ މާލޭ ސިޓީ ކައުންސިލުން ކަމަށް އެ އިދާރާއިން ބުނެ އެވެ.
ވެމްކޯއިން އެ ހިދުމަތް ހުއްޓާލިކަން އާންމުކޮށް ނެރުނު ނޫސްބަޔާނެއްގައި ބުނީ ކައުންސިލުން އެއްބަސްވުން ނިމުމަކަށް ގެނައުމާއެކު އެ ކޯޕަރޭޝަނުން ދެމުން ގެންދިޔަ މާލެ/ވިލިމާލޭގެ މަގުތަކާއި ގޯޅިތައް އަދި ޕާކުތަކާއި މައިޒާންތަކާއި ގުޅިފައިވާ މަގުތަކާއި ގޯޅިތަކާއި ހިމެނޭ ގޮތަށް ކުނި ކަހައި ސާފްކުރުން ހުއްޓާލާފައިވާ ކަމަށެވެ.
ދަތުރުވެރިންގެ މާރުކޭޓާއި ލޯކަލް މާރުކޭޓު ސާފްކުރުމާއި ކުނި ނެގުންވެސް ވެމްކޯއިން ހުއްޓާލާފައިވެ އެވެ. އަދި މާލެ ސިޓީގެ އެކި ތަންތަނަށް ގަވައިދާ ހިލާފަށް އަޅާފައި ހުންނަ ކުނި ނެގުން ވެސް އެ ކޯޕަރޭޝަނުން ވަނީ ހުއްޓާލާފަ އެވެ. ވެމްކޯއިން ބުނީ މި ހިދުމަތްތައް ހުއްޓާލި ނަމަވެސް އެކުންފުނީގައި ރަޖިސްޓްރީވެފައިވާ ގޭބިސީތަކުން ކުނި ނެގުމުުގެ މަސައްކަތް ކުރާނެ ކަމަށެވެ.
މާލެ ސިޓި ކައުންސިލުން ވަނީ ކުނި ނެގުމުގެ ހިދުމަތް ފަށާ އެކަމަށް މުވައްޒަފުންނާއި އެއްގަމު އުޅަނދު ހޯދުމަށް ނިންމާފަ އެވެ. ސިޓީ ކައުންސިލުން "އަދަދު" އަށް ބުނީ ވެމްކޯއާ އެކު ވެފައިވާ އެއްބަސްވުމުގެ މުއްދަތު ހަމަވާ ދުވަހުން ފެށިގެން އެ ކައުންސިލުން މާލޭގެ އާންމު ތަންތަނުގެ ކުނި ނެގުމުގެ ހިދުމަތް ފަށާނެ ކަމަށެވެ.
ސިޓީ ކައުންސިލުން ވަނީ ވެމްކޯއިން ކުނި ނެގުމުގެ ހިދުމަތަށް ބޭނުންކުރަނީ ކުއްޔަށް ދީފައިވާ އުޅަނދުތަކެއް ކަމަށް ބުނެފަ އެވެ. އެ ކައުންސިލުން ބުނީ މި ހިދުމަތުގައި ކައުންސިލުން ބޭނުންކުރާނީ ބޭރުގެ ހިލޭ އެހީގައި ހޯދާ އުޅަނދުތަކެއް ކަމަށެވެ.
