އިދިކޮޅު ޕްރޮގްރެސިވް ޕާޓީ އޮފް މޯލްޑިވްސްގެ ލީޑަރުން ވެރިކަމަށް ވަޑައިގަތުމަށް މަސައްކަތް ނުކުރާނެ ކަމުގެ ވައުދާއެކު ކުރީގެ ރައީސް އަބްދުﷲ ޔާމީންގެ ފަހަތުގައި ތިބޭނެކަމުގެ ޔަގީންކަން އެބޭފުޅުން މިއަދު ދެއްވައިފި އެވެ.
ރައީސް ޔާމީންގެ މައްޗަށް ދައުލަތުން އުފުލި މަނީ ލޯންޑަރިންގެ ދައުވާ އާއި ރިޝްވަތު ނެންގެވުމުގެ ދައުވާ ސާބިތުވާ ކަމަށް ކަނޑައެޅުމުން ބޭއްވި ނޫސްވެރިންގެ ބައްދަލުވުމެއްގައި ޕީޕީއެމްގެ ޑެޕިއުޓީ ލީޑަރު އަބްދުﷲ އަބްދުއްރަހީމް ވިދާޅުވީ، 2023 ގެ ރިޔާސީ އިންތިހާބުގައި ވާދަ ކުރެއްވުމުގެ ފުރުސަތު ޔާމީނަށް އަދިވެސް އެބަ އޮތް ކަމަށާއި އެ ޕާޓީގެ އެއްވެސް ލީޑަރަކު އެހެން އެއްވެސް ސިޔާސީ ފަރާތަކާއެކު މަޝްވަރާ ނުކުރާނެ ކަމަށެވެ.
"އަޅުގަނޑުމެން ޔަގީންކުރަނީ މަތީ މަރުހަލާގެ ކޯޓުތަކުން ޔާމީން މިނިވަން ވެދާނެ ކަަމަށް، އަޅުގަނޑުމެންނަށް ޔަގީންކަން އެބައޮތް އިރާދަކުރެއްވިއްޔާ،" އަބްދުއްރަހީމް ވިދާޅުވި އެވެ. "ދެ ވަނަ ކެންޑިޑޭޓަކަށް ޕީޕީއެމް/ޕީއެންސީއަކުން ނުވިސްނަން، ނުވެސް ވިސްނާނަމޭ، ޕީޕީއެމް/ޕީއެންސީގެ ރިޔާސީ ކެންޑިޑޭޓަކީ ރައީސް އަބްދުﷲ ޔާމީން އަބްދުލްގައްޔޫމް."
މީގެ ކުރިން ނޮވެމްބަރު، 2019، ގައި ވެސް މަނީ ލޯންޑަރިންގެ ކުށް ސާބިތުވެފައިވާ ޔާމީންގެ މައްޗަށް ހުކުމް ކުރުމަށް ހަމަޖެހިފައި ވަނީ މިއަދު ހަވީރު ބާއްވާ ޝަރީއަތުގެ މަޖިލީހެއްގަ އެވެ.
މިއަދުގެ ނޫސްވެރިންގެ ބައްދަލުވުމުގައި އަބްދުއްރަހީމް ވަނީ ޔާމީން ނޫން "ޗޮއިސް"އެއް އެ ޕާޓީގެ ނެތް ކަމަށް ތަކުރާރު ކޮށް ވިދާޅުވެފަ އެވެ. ޔާމީނަށް އިންތިހާބުގައި ވާދަނުކުރެއްވޭނެ ހާލަތެއް މެދުވެރިވެއްޖެ ނަމަ ކަން ކުރައްވާނެ ގޮތް ތަކުރާރުކޮށް ސުވާލުކުރުމުން ވެސް އަބްދުއްރަހީމް ވިދާޅުވީ އެފަދަ ހާލަތެއް ނެތް ކަމަށެވެ.
ނޫސްވެރިން ވަނީ ތަކުރާރުކޮށް އެހެން ކެންޑިޑޭޓެއް ނެރުމާމެދު ސުވާލުކޮށްފަ އެވެ. އެހެންނަމަވެސް އަބްދުއްރަހީމް ވިދާޅުވީ ޔާމީންއަކީ އެންމެ ގާބިލް ލީޑަރު ކަމަށެވެ. އަދި އެކަމަށް އެހެން ބޭފުޅަކު ޝައުގުވެރިކަން ވެސް ނެތް ކަމަށް ޕާޓީގެ އިސް އެހެން ބޭފުޅުންގެ ހާޒިރުގައި އަބްދުއްރަހީމް ވިދާޅުވި އެވެ.
"އެއްގޮތަކަށް ވެސް ހީނުކުރައްވާތި، އަޅުގަނޑުމެން މިތާނގައި މިތިބަ މީހުންނަކީ ބައިބައި ވާނެ ބައެއް ނޫން. ބައިބައި ނުކުރެވޭނެ މި ޓީމެއް، ސާފުކޮށް މި ދަންނަވަނީ. ބައިބައި ނުކުރެވޭނެ، އަޅުގަނޑުމެން އެއް ހަށިގަނޑެއްގެ ގޮތުގައި މި ތިބީ،" މާލޭ މޭޔަރު އަބްދުﷲ މުއިއްޒާއި ރައްޔިތުންގެ މަޖިލީހުގެ މެމްބަރު ގައްސާން މައުމޫން ފަހަތުގައި ބަހައްޓަވައިގެން އަބްދުއްރަހީމް ވިދާޅުވި އެވެ.
