ކުރީގެ ރައީސް އަބްދުﷲ ޔާމީންގެ މައްޗަށް ކްރިމިނަލް ކޯޓުގައި އުފުލާފައިވާ ދައުވާތައް ސާބިތުވެ، ހުކުމެއް އަތުވެއްޖެ ހާލަތެއްގައި ވެސް އަންނަ އަހަރުގެ ރިޔާސީ އިންތިހާބުގައި އެމަނިކުފާނަށް ވާދަކުރެއްވޭނެ ކަމަށް މަހިބަދޫ ދާއިރާގެ އިދިކޮޅު މެންބަރު އަހުމަދު ތޯރިގް ވިދާޅުވެއްޖެ އެވެ.
އިދިކޮޅު ޕީޕީއެމް/ޕީއެންސީގެ ރިޔާސީ ކެންޑިޑޭޓު ކަމަށް ވެސް އައްޔަން ކޮށްފައިވާ ޔާމީން، ވ. އާރަށް ކުއްޔަށް ދިނުމުގައި ހިންގި ކަމަށް ބުނާ ހިޔާނާތުގެ މައްސަލައިގެ ހުކުމް އިއްވުން މާދަމާއަށް ވަނީ ތާވަލްކޮށްފަ އެވެ.
ހުކުމާއެކު ޔާމީނަށް ރިޔާސީ އިންތިހާބުގައި ވާދަކުރެވިދާނެކަމުގެ ސުވާލު އުފެދިފައިވާ ދަނޑިވަޅެއްގައި ތޯރިގް ނެރުއްވި ބަޔާނެއްގައި ވިދާޅުވީ މާދަމާ ޔާމީންގެ މައްޗަށް 12 މަސް ދުވަހަށް ވުރެ ދިގު ހުކުމެއް އިއްވިނަމަވެސް، އިންތިހާބުގައި ވާދަކުރުމުގެ ދޮރު ބަންދު ނުވާނެ ކަމަށެވެ.
"އެފަދަ ހާލަތެއްގައި ކްރިމިނަލް ކޯޓުގެ ހުކުމް ދަމަހައްޓައި ސުޕްރީމް ކޯޓުން ނިހާއީ ހުކުމެއް ކުރުމާ ހަމައަށް ރައީސް އަބްދުﷲ ޔާމީންއަށް ރިޔާސީ އިންތިހާބުގައި ޕީޕީއެމްގެ ޓިކެޓުގައި ވާދަކުރުމުގެ ފުރުސަތު އޮންނާނެ އެވެ." ތޯރިގް ނެރުއްވި ބަޔާނުގައިވެ އެވެ.
ތޯރިގް ވިދާޅުވީ ރިޔާސީ ކެންޑިޑޭޓެއްގެ ޝަރުތާ މެދު ހިޔާލުތަފާތުވުން އުފެދިއްޖެ ހާލަތެއްގައި ގޮތް ނިންމުމުގެ ބާރު ވެސް އޮތީ ސުޕްރީމު ކޯޓުގެ މައްޗަށް ކަމަށެވެ.
ތޯރިގް އެގޮތަށް ގަބޫލުކުރައްވާ ސަބަބެއްގެ ގޮތުގައި ނެންގެވީ ސުޕްރީމު ކޯޓުން މީގެ ކުރިން ނިންމާފައިވާ މައްސަލައެއް ކަމަށްވާ ކާށިދޫ ދާއިރާގެ މެންބަރު އިސްމާއީލް އަބްދުލްހަމީދުގެ މައްސަލަ އެވެ.
އެ ހުކުމުގައި ސުޕްރީމު ކޯޓުން ވަނީ އެއް އަހަރާއި ހަ މަހަށް އަރުވާލަން އޭނާގެ މައްޗަށް ކޮށްފައިވާ ހުކުމަކީ އިސްތިއުނާފު ކުރުމުގެ ހައްގު ލިބިގެންވާ ހުކުމެއް ކަމަށާއި އެ މައްސަލައިގައި ސުޕްރީމް ކޯޓުން ނިހާއީ ހުކުމަކަށް ވާސިލް ވުމާ ހަމައަށް އޭނާގެ މެންބަރުކަމުގެ ގޮނޑި ނުގެއްލޭނެ ކަމަށް ހުކުމް ކޮށްފަ އެވެ.
ޔާމީންގެ ކިބައިގައި އިންތިހާބުގައި ވާދަކުރުމުގެ ޝަރުތު ހަމަނުވާ ކަމަށް އިލެކްޝަންސް ކޮމިޝަނުން ނިންމާ ހާލަތެއްގައި ވެސް ފަހު ބަސް އިއްވާނީ ސުޕްރީމް ކޯޓުން ކަމަށް އޭނާ ވިދާޅުވި އެވެ.
"އަދަދު" ނޫހަށް އެނގިފައިވާ ގޮތުގައި ހުކުމް ބޯމަތިވެފައިވާ ދަނޑުވަޅުގައި ޔާމީން ވަނީ އެ ޕާޓީގެ ބައެއް އިސް ބޭފުޅުންނާ ބައްދަލުކުރައްވައި، ހުކުމާ ގުޅޭ ގޮތުން މަޝްވަރާކޮށްފަ އެވެ.
އޭގައި ހިމެނޭ ގާނޫނީ ގިނަ ބޭފުޅުން ޔާމީނަށް ލަފާ ދެއްވާފައިވަނީ ހުކުމެއް އައިކަމުގައިވީނަމަވެސް ޔާމީނަށް އިންތިހާބުގައި ވާދަކުރެވޭނެ ކަމަށެވެ.
