ދިވެހިރާއްޖޭގައި ހުންނަ އިންޑިއާ ހައިކޮމިޝަނުގައި ހުޅުޖަހަން ސަރުކާރުގެ ކުރީގެ ތަރުޖަމާނު އައްބާސް އާދިލް ރިޒާ ގޮވާލި މައްސަލަ ސިޔާސީ ޕާޓީތަކުން ކުށްވެރިކޮށްފި އެވެ.
ހުޅުމާލޭގައި ހުންނަ އިންޑިއާ ހައިކޮމިޝަނުގައި ހުޅުޖަން މިދިޔަ ބުރާސްފަތި ދުވަހު ގޮވާލި މައްސަލަ ވެރިކަން ކުރާ މޯލްޑިވިއަން ޑިމޮކްރެޓިކް ޕާޓީ އާއި ސަރުކާރު ކޯލިޝަނުގައި ހިމެނޭ އަދާލަތު ޕާޓީ އާއި މޯލްޑިވްސް ރިފޯމް މޫވްމަންޓާއި ކުރީގެ ނައިބު ރައީސް އަހުމަދު އަދީބުގެ މޯލްޑިވްސް ތާޑް-ވޭ ޑިމޮކްރެޓްސް ވެސް ވަނީ ކުށްވެރިކޮށްފަ އެވެ.
މި މައްސަލައިގައި ވެރިކަންކުރާ މައި ޕާޓީ އެމްޑީޕީއިން ކުރި ޓުވީޓުގައި ބުނެފައިވަނީ އެމްބަސީގައި ހުޅުޖެހުމަށް ގޮވާލުން ހަރުކަށި އިބާރާތުން ކުށްވެރިކުރާ ކަމަށާއި އެ މައްސަލަ ސަލާމަތީ ބާރުތަކުން ބަލަންޖެހޭ ކަމަށެވެ. އަދި ރާއްޖޭގެ އެކުވެރި ގައުމުތަކާ ދެކޮޅަށް ނަފުރަތު އުފެއްދުމަށް އިދިކޮޅުން ކެނޑިނޭޅި ކުރަމުންދާ މަސައްކަތްތަށް ކުށްވެރިކުރާ ކަމަށް ވެސް އެމްޑީޕީއިން ވަނީ ބުނެފަ އެވެ.
އެމްއާރުއެމް އިން ކުރި ޓުވީޓުގައި ވެސް މި މައްސަލަ ކުށްވެރިކޮށް ތަހުގީގު ކުރުމަށް ވަނީ ގޮވާލާފަ އެވެ. މީގެ އިތުރުން މި އަމަލަކީ ޓެރަރިޒަމަށް ހިތްވަރުދޭ ފިނޑި އަމަލެއް ކަމަށް އެ ޕާޓީއިން ވަނީ ބުނެފަ އެވެ.
އޭގެ އިތުރުން، އަދާލަތު ޕާޓީ އަދި އެމްޓީޑީއިން ވެސް ވަނީ މި މައްސަލަ ތަހުގީގުކޮށް ޓެރަރިޒަމުގެ އަމަލެއްގެ ގޮތުގައި ބެލުމަށް ގޮވާލާފަ އެވެ. ވެރިކަން ކުރާ ކޯލިޝަނުގައި ހިމެނޭ ޕާޓީތަކުގެ ތެރެއިން ރަސްމީ ސިފައެއްގައި މިކަން ކުށްވެރި ނުކުރާ ހަމައެކަނި ޕާޓީއަކީ ޖުމްހުރީ ޕާޓީ އެވެ. އެ ޕާޓީގެ ބަހެއް ހޯދުމަށް "އަދަދު" އިން ކުރި މަސައްކަތުން މިހާތަނަށް ބަހެއް ލިބޭގޮތް ވަނީ ނުވެފަ އެވެ.
އައްބާސްއަކީ ކުރީގެ ރައީސް ޑރ. މުހައްމަދު ވަހީދު ހަސަންގެ ތަރުޖަމާނުގެ މަގާމުގައި ހުރި މީހެކެވެ. ފައިނޭންސް މިނިސްޓްރީގެ ސްޓޭޓް މިނިސްޓަރަކަށް ވެސް ވަހީދުގެ ވެރިކަމުގައި އައްބާސް ހުރި އެވެ. އަދި ކޮމިޝަނާ ޖެނެރަލް އޮފް ކަސްޓަމްސްގެ މަގާމާއި މެލޭޝިޔާގައި ހުންނަ ސަރުކާރުގެ ޓްރޭޑް ރެޕްރެޒެންޓިވްގެ މަގާމު ރައީސް އަބްދުﷲ ޔާމީންގެ ވެރިކަމުގައި ފުރި އެވެ. އައްބާސްގެ ލިންކްޑްއިން ޕްރޮފައިލްގައިވާ ގޮތުން އޭނާއަކީ މިހާރު މާލޭގައި ހިންގާ ކޮލެޖެއްގެ ލެޗްޗަރާއެކެވެ.
ފުލުހުން ބުނީ އައްބާސްގެ މައްސަލަ އެ އިދާރާގައި މިހާތަނަށް ލޮގް ކޮށްފައި ނުވި ނަމަވެސް ބަލަންޖެހޭ ކަންކަން ބަލަމުން އަންނަ ކަމަށެވެ. ނަމަވެސް އޭގެ ތަފްސީލެއް ފުލުހުން ނުދެ އެވެ. ނަމަވެސް ޑިފެންސް މިނިސްޓަރު މާރިޔާ ކުރެއްވި ޓުވީޓެއްގައި އެ މައްސަލަ ބަލާނެ ކަމުގެ ޔަގީންކަން ވަނީ ދެއްވައިފަ އެވެ. \
