މި އަހަރުގެ ގައުމީ އެއްބައިވަންތަކަމުގެ ދުވަސް ފާހަގަކުރުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް މ. ކޮޅުފުއްޓަށް ވަޑައިގަންނަވާ ގޮތަސް ހަމަޖެހިއްޖެ އެވެ.
މި އަހަރުގެ ގައުމީ އެއްބައިވަންތަކަމުގެ ދުވަހުގެ ޖަލްސާ ބޭއްވުމަށް ހަމަޖެހިފައި ވަނީ ކޮޅުފުށީގަ އެވެ. ކޮންމެ އަހަރަކު ޑިސެމްބަރު 26 ވަނަ އަހަރު ި ދުވަސް ފާހަގަކުރަމުންދަނީ މީގެ 18 އަހަރު ކުރިން ރާއްޖެއަށް ކުރިމަތިވި ސުނާމީ ހާދިސާއާ ގުޅިގެންނެވެ.
އެގޮތުން، އެއްބައިވަންތަކަމުގެ ދުވަހު ސުނާމީގެ ހިތާމަވެރި ކާރިސާއާ ގުޅިގެން ރައްޔިތުން ދެއްކި އެކުވެރިކަމާއި އަހުވަންތަކަމާއި، ގައުމީ އެއްބައިވަންތަކަމުގެ ގުޅުމުގެ ހަނދާންތައް އާކުރުން އޮވެ އެވެ.
ޑިސެމްބަރު 26ގައި މ. ކޮޅުފުއްޓަށް ވަޑައިގެންނެވުމުގެ ކުރިން މި ހަފްތާ ބަންދުގައި ވެސް ރައީސް ދަތުރުފުޅެއް ކުރައްވާނެ އެވެ. އެއީ، ގއ. އަތޮޅު ދާންދޫ، ނިލަންދޫ އަދި މާމެންދުއަށް ކުރައްވާ ދަތުރުފުޅެކެވެ.
ގއ އަތޮޅަށް ކުރައްވާ ދަތުރުފުޅުގައި އެ ތިން ރަށުގެ ކައުންސިލްތަކާއި، އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކުގެ މެންބަރުންނާ ބައްދަލުކުރައްވާނެ އެވެ. އަދި އެ ރަށްތަކުގައި ކުރިއަށްދާ ބައެއް މަޝްރޫއުތަކުގެ ނިމުން ވެސް ފާހަގަކުރައްވާގޮތަށް ވަނީ ހަމަޖެހިފަ އެވެ.
