މާލޭ ސިޓީ ކައުންސިލްގެ ސެކެޓަރީ ޖެނެރަލްގެ މަގާމުގައި ހުންނެވި މުޖުތަބާ ޖަލީލްގެ މައްޗަށް ކޮރަޕްޝަންގެ ދައުވާ ކޮށްދޭން ފޮނުވާފައިވާ މައްސަލައިގައި އެއްވެސް އެއްޗެއް ބުނަން ބޭނުން ނުވާ ކަމަށް އެ ކައުންސިލުން ބުނެފި އެވެ.
މުޖުތަބާގެ މައްޗަށް ތުހުމަތު ކުރެވެނީ އޭނާ އެންސްޕާގެ ސީއީއޯގެ މަގާމުގައި ހުންނެވިއިރު، އެ ތަނުގެ ބޭނުމަށް ކުއްޔަށް ހިފި ގެއެއްގެ ފްލޯތަކުގެ އިންޓީރިއާ ޑިޒައިނިންގެ މަސައްކަތް އުސޫލުތަކާއި ހިލާފަށް އަމިއްލަ ފަރާތަކާ ހަވާލުކުރި މައްސަލައެއްގަ އެވެ.
އޭސީސީން ބުނީ 2015 ވަނަ އަހަރު އެ ޕްރޮޖެކްޓު އަމިއްލަ ކުންފުންޏަކާ ހަވާލުކުރުމުގެ ހުއްދައަށް އެދި ސޮއިކޮށްފައިވަނީ މުޖުތަބާ ކަމަށާއި އެންސްޕާއިން ފިނޭންސް މިނިސްޓްރީއަށް ފޮނުވި ސިޓީއާއެކު އެ މިނިސްޓްރީއަށް ފޮނުވާފައިވާ ކޯޓޭޝަންތަކަކީ އެއް ވިޔަފާރި އަނެއް ވިޔަފާރިއާ ގުޅުން އޮންނަ މުޖުތަބާއާ ވެސް ގުޅުން އޮންނަ ވިޔަފާރިއެއް ކަން ހާމަވެފައިވާ ކަމަށެވެ.
އޭނާގެ މައްޗަށް ދައުވާ ކުރަން ފޮނުވާފައިވަނީ މަގާމުގެ ނުފޫޒު ބޭނުންކޮށްގެން ނާޖާއިޒު ފައިދާ ހޯދައިދިނުމުގެ ކުށުގެ ދައުވާއާއި ރަސްމީ ހައިސިއްޔަތު ނަހަމަގޮތުގައި ބޭނުންކޮށްގެން، އޭގެ ފައިދާ ލިބެން ނުޖެހޭ ފަރާތަކަށް މަންފާ ހޯދައިދިނުމުގެ ކުށުގެ ދައުވާ އެވެ.
މިކަމާ ގުޅިގެން "އަދަދު" އިން ސުވާލުކުރުމުން ސިޓީ ކައުންސިލްގެ މީޑިއާ އޮފިޝަލް ވިދާޅުވީ އެކަމާ މެދު މިވަގުތު "ނޯ ކޮމެންޓް" ކަމަށެވެ.
އިދިކޮޅު ޕީޕީއެމްގެ އަގްލަބިއްޔަތު އޮންނަ ސިޓީ ކައުންސިލްގެ އެސްޖީކަމަށް ކުރިމަތިބި 23 މީހުންގެ ތެރެއިން އެ މަގާމަށް މުޖުތަބާ އައްޔަން ކުރީ މިދިޔަ ނޮވެންބަރު މަހުގަ އެވެ.
އޭނާ އެންސްޕާގެ ސީއީއޯ ކަމުގެ މަގާމުގައި ހުންނެވީ ކުރީގެ ރައީސް އަބްދުﷲ ޔާމީންގެ ވެރިކަމުގަ އެވެ.
އެ މަގާމުގައި ހުންނެވުމަށް ފަހު ސީއީއޯ ކަމުން ވަކިކޮށް މުޖުތަބާ އައްޔަނުކުރީ އިކޮނޮމިކް މިނިސްޓްރީގެ ނައިބުގެ މަގާމަށެވެ. ނަމަވެސް އޭގެ ދެމަހެއްހާ ދުވަސް ފަހުން މުޖުތަބާ ވަނީ އެ މަގާމުން ވަކިކޮށްފަ އެވެ.
