ލޯކަލް އޮތޯރިޓީ ކޮމްޕެނީ ރެގިއުލޭޝަންގެ ދަށުން ކުންފުނި ރަޖިސްޓްރީކުރަން މާލެ ސިޓީ ކައުންސިލަށް އަދިވެސް ހުއްދަ ނުދީ އޮތުމުން މާލެ ސިޓީގެ ކައުންސިލަރުން ނުރުހުން ފާޅުކޮށްފި އެވެ.
ސިޓީ ކައުންސިލުން މިއަދު ބޭއްވި ބައްދަލުވުމުގެ އެޖެންޑާގައި ލޯކަލް އޮތޯރިޓީ ކުންފުނީގެ މައުޟޫއު ހިމެނިއިރު، މިހާތަނަށް އެފަދަ ހުއްދައެއް އިކޮނޮމިކް މިނިސްޓްރީން ދިނީ ތޮއްޑޫ ކައުންސިލަށް އެކަންޏެވެ.
ޕީޕީއެމްގެ މެޖޯރިޓީ އޮތް މާލެ ސިޓީ ކައުންސިލްގައި މިއަދު ބޭއްވި ބައްދަލުވުމުގައި އެމްޑީޕީގެ ކައުންސިލަރުން ވެސް ވަނީ އެ ކަމާ ނުރުހުން ފާޅުކޮށްފަ އެވެ.
ގަލޮޅު އުތުރު ދާއިރާގެ ކައުންސިލަރު މުހައްމަދު ސައިފް ފާތިހު ވިދާޅުވީ އަދިވެސް ކަންކަން ހިނގަނީ މައި ސަރުކާރުގެ "މުށު ތެރޭގައި" ކަންކަން ބާއްވައިގެން ކަމަށެވެ.
"އަދިވެސް މި ޖެހެނީ އިކޮނޮމިކް މިނިސްޓްރީގެ ހުއްދައެއް ހޯދަން، ކުންފުންޏެއް ހަދަން، އެ ހުއްދަ ވެސް، އެންމެ ރަށަކަށޭ މިހާތަނަށް މި ދެވުނީ،" ފާތިހު ވިދާޅުވި އެވެ.
ސަރުކާރުގެ މިނިސްޓްރީތަކުންނާއި ކުންފުނިތަކުން މާލޭގައި އެކި ޕްރޮޖެކްޓްތައް ހިންގާއިރު ސިޓީ ކައުންސިލްގެ ހިޔާލު ވެސް ކުޑަމިނުން ނުހޯދާ ކަމަށް އޭނާ ވިދާޅުވި އެވެ.
"ކުރީގެ ސަރުކާރުތަކުން ލާމަރުކަޒީ ނިޒާމު ފުނޑާލީ ކަމަށް ދެކިގެން، އެ ކަންކަން ރަނގަޅު ކުރަން އައި ބައެއް އަޅުގަނޑުމެން މިއީ، މި ވާހަކަ ދައްކަން ލަދުވެސް ގަނޭ،" ފާތިހު ވިދާޅުވި އެވެ.
ފާތިހު ވިދާޅުވީ، މާލެ ސިޓީގެ މެޖޯރިޓީ ޕީޕީއެމަށް އޮތް ނަމަވެސް މާލޭގެ ރައްޔިތުން އިންތިހާބުކޮށްފައިވާ ކައުންސިލަށް ލާމަރުކަޒީ ނިޒާމުގެ ބާރުވެރިކަން ދޫކޮށްލަން ޖެހޭނެ ކަމަށެވެ.
ހުޅުމާލެ ދާއިރާގެ ކައުންސިލަރު އިބްރާހީމް ޝުޖާއު ވިދާޅުވީ މިހާތަނަށް ވެސް ސިޓީ ކައުންސިލަށް ލިބެން ޖެހޭ ހައްގުތައް ހޯދަން ކޯޓަށް ދާން ޖެހިފައި އެބަ ހުރި ކަމަށެވެ. މި މައްސާލަގައި ވެސް ކޯޓަށް ދާން ޖެހޭ ވަރަށް ކަންކަން ހިނގަމުންދާ ކަމަށް އޭނާ ވިދާޅުވި އެވެ.
މާލޭގެ މޭޔަރު ޑރ. މުހައްމަދު މުއިއްޒު ވެސް ވަނީ އެ ކަމާ މެދު ކަންބޮޑުވުން ފާޅުކުރައްވައިފަ އެވެ. އަދި ކުންފުނި އުފެއްދުމަށް ފަހުން ގަވާއިދުގައި ހިމަނާފައި އޮތް އޮނިގަނޑަށް ވެސް މުއިއްޒު ފާޑުވިދާޅުވި އެވެ.
"ތިން ޑިރެކްޓަރުން ތިބެން ޖެހެނީ، އެއިން އެކަކު ކައުންސިލުން މި ހުރެވެނީ، ދެން މިއިން އެއްވެސް މީހަކީ ކުންފުންޏެއްގެ ތަޖުރިބާ ހުރި މީހަކަށް ވެގެން ނުވޭ، މިހެން ވެރިކަން ކުރާ ރަށުގެ ކުންފުނި ހިންގާނީ،" މުއިއްޒު ކަންބޮޑުވުން ފާޅުކުރެއްވި އެވެ.
