ރ. އަލިފުށީ ކައިރި އޮންނަ އެ ރަށުގެ އިހްތިސާސުގެ ތެރޭގައި އޮތް ފަޅު ރަށް އެއްތިނގިލި، އެރަށުގެ އިހްތިސާސުގެ ތެރެއިން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މިއަދު ވަކި ކުރައްވައިފި އެވެ.
އަލިފުށީ ރައްޔިތުން ބޭނުންވެފައި އޮތް އަދި އެއާޕޯޓެއް ހެދުމަށް އެ ރަށުގެ ފަޅު ހިއްކަން ހަމަޖެހިފައިވާ އެއްތިނގިލި އަލިފުށީގެ އިހްތިސާސްގެ ތެރެއަށް މީގެ ކުރިން ވެއްދީ ވެސް ރައީސުލްޖުމްހޫރިއްޔާގެ ގަރާރަކުންނެވެ.
އަލިފުއްޓާއި އެއްތިނގިލި އޮންނަނީ ޖެހިޖެހިގެން ކަހަލަ ގޮތަކަށް އެއް ފަޅެއްގެ ތެރޭގަ އެވެ. އަލިފުށީ ރައްޔިތުން ބޭނުންވީ އެ ރަށުގައި އެއާޕޯޓު ހަދާއިރު އެއްތިނގިއްޔާ ހަމައަށް ހިއްކާލުމަށެވެ. ނަމަވެސް އެއިރުން އެއާޕޯޓު ޕްރޮޖެކްޓުގެ އަގު ބޮޑުވާނެތީ އާއި އެއްތިނގިލީގެ ތިމާވެއްޓަށް އަސަރުކޮށްފާނެތީ ސަރުކާރުން ވަނީ އެކަމަށް ދެކޮޅު ހަދައިފަ އެވެ.
އެއްތިނގިލި ހިއްކުމުގެ ބަދަލުގައި ހިމާޔަތް ކުރުން މާބޮޑަށް ރަނގަޅުވާނެ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވެސް ވިދާޅުވެފައިވެ އެވެ. އެއްތިނގިއްޔަކީ ގޮނޑުދޮށް ރީތި، ތިމާވެށީގެ ގޮތުން ހާއްސަ ސިފަތަކެއް ހުންނަ ރަށެއް ކަމަށްވެ އެވެ.
އަލިފުށީގައި އެއާޕޯޓު އަޅަނީ އެމްޓީސީސީގެ ފަރާތުންނެވެ. އެ ޕްރޮޖެކްޓަށް 450 މިލިއަން ރުފިޔާ ހަރަދުވާއިރު ނިންމޭނެ ކަމަށް ބެލެވެނީ 2024 ވަނަ އަހަރެވެ.
