ކްލަބް ގްރީން ސްޓްރީޓްސް ބަލިކޮށް، ނެޓްބޯޅަ އެސޯސިއޭޝަން ޗެމްޕިއަޝިޕްގެ ތަށި ކުލަބު މެޓްރިކްސް އިން ހޯދައިފި އެވެ.
މި މަހުގެ 10 ވަނަ ދުވަހު، ޖުމްލަ 11 ޓީމާ އެކު ފެށި ނެޓްބޯޅަ އެސޯސިއޭޝަން ޗެމްޕިއަޝިޕަކީ ނެޓްބޯޅަ އެސޯސިއޭޝަން އޮފް މޯލްޑިވްސް (ނާމް)ގެ މި އަހަރުގެ ފަހު މުބާރާތެވެ.
އެކުވެނި އައުޓްޑޯ ނެޓްބޯޅަ ކޯޓުގައި ކުޅުނު ފޯރިގަދަ ފައިނަލް މެޗު މެޓްރިކްސް އިން ކާމިޔާބުކުރީ ގްރީން ސްޓްރީޓްސް 58-54 ޕޮއިންޓުން ބަލިކޮށްގެންނެވެ. ފައިނަލު މެޗުގެ މޮޅު ކުޅުންތެރިޔާގެ މަގާމް ހޯދީ މެޓްރިކްސްގެ މަރިޔަމް ޝިނާއަތު އެވެ.
ފައިނަލަށް ގްރީން ދަތުރުކުރީ ސެމީ ފައިނަލުގައި ޝައިނިން ސްޓާ ބަލިކޮށްގެންނެވެ. މެޓްރިކްސް ފައިނަލުން ޖާގަ ހޯދީ ފޯރިގަދަ ސެމީ ފައިނަލު މެޗުގައި ކުޅުދުއްފުށި ޔޫތް އެންޑް ރެކްރިއޭޝަން ކުލަބު (ކޭވައިއާރުސީ) އެއް ޕޮއިންޓުގެ ތަފާތުން ބަލިކޮށްގެންނެވެ.
ނެޓްބޯޅަ އެސޯސިއޭޝަން ޗެމްޕިއަންޝިޕްގެ އެންމެ މޮޅު ހަތް ކުޅުންތެރިން - ފޮޓޯ: އަބްދުﷲ އިޔާން / އަދަދު
މުބާރާތުގެ އެންމެ މޮޅު ހަތް ކުޅުންތެރިންގެ ތެރޭގައި ހިމެނުނީ މެޓްރިކްސްގެ ޝިނާއަތު، އެކުލަބުގެ އާމިނަތު އައިނީ، އައިޝަތު ސަލީމާ، ކުލަބު ގްރީން ސްޓްރީޓްސްގެ ލަޔާން އަލީ ރަޝީދު، އަމިނަތު ނަޒްރާގެ އިތުރުން ކޭވައިއާރުސީގެ އާމިނަތު ފިރުޝާގެ އިތުރުން އެޓީމްގެ އީމާ އަބްދުއްސައްތާރު އެވެ.
މުބާރާތުގެ އެންމެ އުއްމީދީ ކުޅުންތެރިއަކަށް ސްޕޯޓްސް ކުލަބު ރައިޒިން ސްޓާގެ ޔުމްނު އަހުމަދު މާޒިން ހޮވުނުއިރު، އެންމެ މޮޅު ކޯޗަކީ ޗެމްޕިއަންކަން ހޯދި މެޓްރިކްސްގެ ކޯޗު ނީޝާ ހަލީމް އެވެ.
މުބާރާތުގެ ކުއީން އޮފް ދަ ސީރީސްގެ މަގާމް ހޯދީ މެޓްރިކްސްގެ ޝިނާއަތު އެވެ.
