ނެޓްބޯލް އެސޯސިއޭޝަން އޮފް މޯލްޑިވްސް (ނޭމް) އިން ބޭއްވި 23 ވަނަ ގައުމީ ނެޓްބޯޅަ މުބާރާތުގެ ޗެމްޕިއަންކަން މި ފަހަރު މުޅިން އަލަށް ބޭއްވި ގައުމީ ނެޓްބޯޅަ ލީގު ވެސް ކާމިޔާބުކުރި، ކްލަބް މެޓްރިކްސް އިން ހޯދައިފި އެވެ.
ޒުވާނުންގެ މަރުކަޒު އެތެރެ ކޯޓުގައި ކުރިއަށްދިޔަ ގައުމީ ނެޓްބޯޅަ މުބާރާތުގެ ފުރަތަމަ ޑިވިޝަންގެ ޗެމްޕިއަންކަން މެޓްރިކްސް އިން ހޯދީ ފައިނަލު ކުޅުދުއްފުށީ ޔޫތު އެންޑް ރެކްރިއޭޝަން ކްލަބް (ކޭވައިއާރުސީ) ބަލިކޮށްގެންނެވެ.
އެ ގޮތުން، ރަނގަޅު ފޯމެއްގައި މިހާތަނަށް ފެނުނު މެޓްރިކްސް އިން ފައިނަލުގައި 34-74 ޕޮއިންޓުން މެޗުން މޮޅުވިއިރު، ފައިނަލް މެޗުގެ މޮޅު ކުޅުންތެރިޔާ، "ކުއީން"ގެ މަގާމުގެ އިތުރުން، މުބާރާތުގެ މޮޅު ކުޅުންތެރިޔާ "ކުއީން އޮފް ދި ސީރީޒް" ގެ މަގާމު ވެސް ލިބުނީ، މެޓްރިކްސްގެ އައިމިނަތު ފިރުޝާ އަށެވެ. ފިރުޝާ ވަނީ ފައިނަލް މެޗުގައި ތަފާތު މޮޅު ކުޅުމެއް ދައްކައި، ޓީމަށް ގިނަ ޕޮއިންޓްތަކެއް އެއްކޮށްދީފަ އެވެ.
ފުރަތަމަ ޑިވިޝަނުގައި މެޓްރިކްސް އާއި ކޭވައިއާރްސީގެ އިތުރުން ކުޅުނީ، ކްލަބް ގްރީން ސްޓްރީޓްސް އަދި އެމްވީ ނެޓާސް އެވެ.
ގައުމީ ލީގުގެ ޗެމްޕިއަންކަން މެޓްރިކްސް އިން ހޯދީ ކުޅުނު ފަސް މެޗުން ވެސް މޮޅުވެގެންނެވެ. ގައުމީ ލީގަކީ، ނެޓްބޯޅަ އިތުރަށް ވަރުގަދަ ކުރުމަށްޓަކައި، ނެޓްބޯލް އެސޯސިއޭޝަންގެ އިސްނެގުމަކާ އެކު، ކުޅުންތެރިންނަށް ވާދަވެރި އިތުރު މެޗުތަކެއް ދިނުމަށްޓަކައި ފެށުނު މުބާރާތެކެވެ.
ގައުމީ މުބާާރާތުގެ ދެ ވަނަ ޑިވިޝަނުގެ ތަށި ސްޕޯޓްސް ކްލަބް ޝައިނިން ސްޓާ އިން ހޯދީ ފައިނަލުގައި އެން ސްޕޯޓްސް އެކަޑަމީ ބަލިކުރުމަށް ފަހު އެވެ. ފައިނަލް މެޗުގައި ޝައިނިން ސްޓާ މޮޅުވީ 45-33 އިންނެވެ. މި މެޗުގެ މޮޅު ކުޅުންތެރިޔާ އާއި މި ޑިިވިޝަނުގެ މޮޅު ކުޅުންތެރިއަކަށް ހޮވިފައިވަނީ، ޝަައިނިން ސްޓާގެ މަރިޔަމް ލައިޝާ ޝަރީފް އެވެ.
ދެ ވަނަ ޑިވިޝަނުގައި ކުޅުނު ޓީމުތަކަށް ބަލާއިރު، ސުޕަ ޖެން ސީ، ޔޫތު ޔުނައިޓެޑް ސްޕޯޓްސް ކްލަބް، ސްޕޯޓްސް ކްލަބް ޝައިނިން ސްޓާ، ސްޕޯޓްސް ކްލަބް ސްކައިލާކް، ކްލަބް އެން ސްޕޯޓްސް، ޒެނިތު ސްޕޯޓްސް ކްލަބް، ޔުނައިޓެޑް ޔުނިޓީ ސްޕޯޓްސް ކްލަބް، އިންވިކްޓޯ ސްޕޯޓްސް ކްލަބް، އެން ސްޕޯޓްސް އެކަޑަމީ، އާޖީލަކަށް، ބްލެކް ޕެންތާސް ސްޕޯޓްސް ކްލަބް އަދި ފިއޮންޓި ސްޕޯޓްސް ކްލަބް އެވެ.
