ޑަބްލިޔުއެޗްއޯއިން އޭޝިއާ އާއި ދެކުނުއިރުމަތީ އޭޝިއާއަށް ކަނޑައަޅުއްވާފައި ހުންނަވާ ރީޖަނަލް ޑިރެކްޓަރު ޑރ ޕޫނަމް ކެތްރަޕާލް ސިންގް، ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހުއާ މިއަދު ބައްދަލުކުރައްވައިފި އެވެ.
ޑރ. ޕޫނަމް ރައީސް އޮފީހަށް ކުރެއްވި އިހުތިރާމުގެ ޒިޔާރަތުގައި މިއަދު ރައީސް ސޯލިހާއ ބައްދަލުކުރައްވާ ދެއްކެވި ވާހަކަފުޅުގައި ރާއްޖެއާ ޑަބްލިޔުއެޗްއޯ އާ ދެމެދު އޮންނަ ޒަމާންވީ ބަދަހި ގުޅުމަށް އަލިއަޅުއްވާލެއްވި އެވެ. އަދި ރާއްޖޭގެ ސިއްހޯ ދާއިރާ ކުރިއެރުވުމަށް ކުރަމުންދާ މަސައްކަތްތަކަށް އެކަމަނާ ވަނީ ތައުރީފުކުރައްވާފަ އެވެ.
އޭގެ އިތުރުން ޑރ. ޕޫނަމް ވަނީ ކޮވިޑް 19 ގެ ބަލިމަޑުކަމަށްފަހުން ސިއްހީ ކަންކަމަށް ރާއްޖެއިން ދޭ ސަމާލުކަން އިތުރުކޮށްފައިވާކަން ފާހަގަކުރައްވާފަ އެވެ. އަދި މެލޭރިއާ އާއި ޕޯލިއޯ ފަދަ ގިނަ ބަލިތައް ރާއްޖެއިން ނައްތާލުމަށް ކުރާ މަސައްކަތްތަކަށް ވަނީ ތައުރީފުކުރައްވާފަ އެވެ.
ރައީސް ސޯލިހުގެ ވާހަކަފުޅުގައި އެމަނިކުފާނު ވަނީ ޑަބްލިއުއެޗްއޯއިން ދިވެހިރާއްޖެއަށް ދެމުން ގެންދާ އެއްބާރުލުމާއި އިރުޝާދަށް ޝުކުރު އަދާކުރައްވާފަ އެވެ. އަދި ސިއްހީ ދާއިރާއަށް ބޭނުންވާ ފަންނީ މުވައްޒަފުން ތަމްރީނުކުރުމުގައި އިތުރު ތަޖުރިބާކާރުންގެ އެހީތެރިކަން ބޭނުންވާކަން ރައީސް ވަނީ ފާހަގަ ކުރައްވާފަ އެވެ.
