އެމްޑީޕީގެ ރިޔާސީ ޕްރައިމަރީގައި އެ ޕާޓީގެ ރައީސް، ރައީސް މުހައްމަދު ނަޝީދު ވާދަ ކުރައްވާނެ ކަން އިއުލާނު ކުރައްވައިފި އެވެ.
އެމަނިކުފާނު އެކަން އިއުލާނު ކުރެއްވީ ދާދި ދެންމެއަކު ކުރެއްވި ޓުވީޓެއްގަ އެވެ. އެ ޓުވީޓުގައި އެ މަނިކުފާނު ވަނީ ޕްރައިމަރީގައި ވާދަ ކުރައްވާނެ ކަމަށާއި އެމަނިކުފާނަށް ތާއިދު ކުރައްވައި ވޯޓު ދެއްވުމަށް އެމްޑީޕީގެ ހުރިހާ މެމްބަރުންގެ ކިބައިން އެދިވަޑައިގެންފަ އެވެ.
އެމަނިކުފާނު ޕްރައިމަރީގައި ވާދަކުރައްވާނެކަން އިއުލާނު ކުރައްވާފައި މިވަނީ، ޕާޓީ ތެރޭގައި ވަރަށް ބޮޑަށް ހިޔާލު ތަފާތުވެފައިވުން އުފެދިފައިވާ ދަނޑިވަޅެއްގަ އެވެ. ހިޔާލު ތަފާތުވުން އުފެދިފައި ވަނީ ރިޔާސީ ޕްރައިމަރީގެ ކުރިން ވާހަކަ ދައްކަން ޖެހޭނީ ދައުލަތް ހިންގުމުގެ ނިޒާމާ ގުޅޭ ގޮތުން ކަމަށް ބުނެ ބަރުލަމާނީ ނިޒާމަކަށް ބަދަލު ކުރެއްވުމަށް ރައީސް ނަޝީދު ފައިނެންގެވި ހިސާބުންނެވެ.
އެމްޑީޕީގެ ޕްރައިމަރީގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވެސް ވާދަ ކުރައްވާނެ ކަމަށް ވަނީ އިއުލާނު ކުރައްވައިފަ އެވެ. އެހެން އެ މަނިކުފާނު ވިދާޅުވެފައި ވަނީ މިދިޔަ ޖޫން މަހު އެވެ.
އެމްޑީޕީ އަކީ ރާއްޖޭގެ އެންމެ ގިނަ ދުވަސްވީ އެންމެ ބޮޑު ސިޔާސީ ޕާޓީ އެވެ. ރިޔާސީ ޕްރައިމަރީއަށް ހުޅުވާލުމާ ހަމައަށް އެޕާޓީގެ ދަފްތަރުގައި 58،000 މެމްބަރުން އެބަ ތިއްބެވެ.
މިއީ އެމްޑީޕީގެ ރިޔާސީ ޕްރައިމަރީއެއްގެ ފޯރި މިހާ ގަދަވެގެންދިޔަ ފުރަތަމަ ފަހަރެވެ. މީގެ ކުރީގެ އެއްވެސް އިންތިހާބެއްގައި ޕާޓީގެ އެތެރޭގެ މަސްލަހަތު ގެއްލި، ފެކްޝަންތަކެއް އުފައްދައި އެއްބަޔަކު އަނެއްބަޔަކާ ދިމާލަށް ފާޅުގައި އެއްޗެހި ކިޔާފައެއް ނުވެ އެވެ. 2018 ވަނަ އަހަރުގެ ރިޔާސީ އިންތިހާބަށް ކެންޑިޑޭޓަކު ހޮވުމަށް ބޭއްވި ޕްރައިމަރީގައި ވާދަ ކުރެއްވީ ވެސް ރައީސް ނަޝީދު އެކަންޏެވެ. އެހެންނަަމަވެސް ރިޔާސީ އިންތިހާބާ ކުރިމަރިލާން ޖެހިވަޑައިގަތް އިރު އެމަނިކުފާނަށް ކުރިމަތިލެއްވޭ ގޮތް ނުވުމުން، އެ ފުރުސަތު އެމަނިކުފާނުގެ އޭރުގެ އެންމެ އަރިސް ބޭފުޅާ، މިހާރުގެ ރައީސުލްޖުމްހޫރިއްޔާ، އިބްރާހިމް މުހައްމަދު ޞާލިހަށް ދެއްވީ އެވެ.
އަންނަ މަހު 28، ގައި އެމްޑީޕީގެ ރިޔާސީ ޕްރައިމަރީ ބާއްވާނެކަން އިއުލާނުކޮށް، ކުރިމަރިލުމުގެ ފުރުސަތު ހުޅުވާލާފައި ވަނީ މިއަދު އެވެ. 500 މީހުންގެ ތާއިދާ އެކު ފޯމު ފުރާ މިއަންނަ ހޮނިހިރު ދުވަހުގެ ކުރިން އެޕާޓީގެ އޮފީހަށް ހުށަހަޅަން ޖެހޭނެ އެވެ.
ރިޔާސީ ޕްރައިމަރީއަށް ކުރިމަތިލުމަށް ދިން ފުރުސަތު ކުޑަކަމާއި ރައީސް ނަޝީދު ރަށުގައި ވަޑައިގެން ނެތް ދަނޑިވަޅެއްގައި ޕްރައިމަރީ އިއުލާނުކުރެއްވުމުން ނަޝީދުއަށް ތާއީދު ކުރައްވާ ބައެއް ފަރާތްތަކުން ވަނީ މިއަދު އެކަމާ ނުރުހުން ވެސް ފާޅު ކުރައްވާފަ އެވެ.
