ލާމަރުކަޒީ ގާނޫނުގެ ދަށުން އުފެދިފައިވާ ކައުންސިލްތަކަށް ބާރުލިބޭ ގޮތަށް ދިވެހިރާއްޖޭގެ ފަޅުރަށްރަށާ ބެހޭ ގާނޫނަށް އިސްލާހު ގެނައުމުގެ ބިލު ރައީސް އިބްރާހިމް މުހައްމަދު ސޯލިހު މިއަދު ތަސްދީގުކުރައްވައިފ އެވެ.
މި ބިލަކީ މިދިޔަ ނޮވެމްބަރު މަހުގެ 28 ވަނަ ދުވަހު ރައްޔިތުންގެ މަޖިލީހުން ފާސްކުރި ބިލެކެވެ.
ފަޅުރަށްރަށާ ބެހޭ ގާނޫނަށް ގެނެވުނު އިސްލާހުތަކުގެ ތެރޭގައި އިދާރީ ދާއިރާއެއްގައި ހިމެނޭ ފަޅު ރަށެއް، ނުވަތަ ސިޓީއެއްގެ އިހްތިސާސުގައި ހިމެނޭ ފަޅުރަށެއް ވަރުވާއަށް ލިޔެދޭނަމަ ނުވަތަ ވަކިކުރާނަމަ އެކަން ދެން ކުރާނީ އެ ރަށެއް ނުވަތަ ސިޓީއެއްގެ ކައުންސިލުންނެވެ. މިކަން ކުރަން ޖެހޭނީ މި ގާނޫނުގެ ދަށުން ހަދާ ގަވައިދުގެ ދަށުންނެވެ.
މީގެއިތުރުން ވަރުވާއަށް ލިޔެދީފައިވާ ފަޅުރަށެއް އެ ރަށެއް ލިޔުއްވައިގެން އުޅޭ ފަރާތުން އެހެން ފަރާތަކަށް ލިޔެދިނުމާއި، ކުއްޔަށް ދިނުމާއި، އެ ރަށް ބެލެހެއްޓުމުގެ ޒިންމާ އެހެން ފަރާތަކާ ހަވާލުކުރުން ވަނީ މި އިސްލާހުގެ ދަށުން މަނާކުރެވިފަ އެވެ.
މި އިސްލާހުގައި އިތުރަށް ބަޔާންކޮށްފައިވާ ގޮތުން، އިދާރީ ދާއިރާއެއްގައި ހިމެނޭ ފަޅުރަށެއް ނުވަތަ ސިޓީ ކައުންސިލެއްގެ އިހްތިސާސުގައި ނުހިމެނޭ ފަޅުރަށްރަށުގެ ތެރެއިން، ވަރުވާއަށް ލިޔެދޭ ރަށެއް، އިންޑަސްޓްރިއަލް ރަށުގެ ގޮތުގައި ދޭ ރަށެއް، އަދި އެނޫން ބޭނުންތަކަށް ކުއްޔަށްދޭ ރަށްރަށާއި، އެނޫންވެސް އެކި ބޭނުންތަކަށް ކަނޑައެޅޭ ރަށްރަށް ކަނޑައެޅުމުގެ ޒިންމާ އަދާކުރައްވާނީ ރައީސުލްޖުމްހުރިއްޔާ އެވެ.
މިއަދުން ފެށިގެން އަމަލުކުރާ މި އިސްލާހުގެ ދަށުން އެކުލަވާލަންޖެހޭ ގަވާއިދުތަކާއި، އިސްލާހުކުރަންޖެހޭ ގަވާއިދުތައް އެކުލަވާލުމަށް ވަނީ ހަ މަހުގެ މުއްދަތެއް ކަނޑައަޅާފަ އެވެ.
