މިހާރު ކުރިއަށްދާ ނެޓްބޯޅަ އެސޯސިއޭޝަން ޗެމްޕިއަންޝިޕްގެ ސެމީ ފައިނަލުން ކުލަބު މެޓްރިކްސް، ކުޅުދުއްފުށި ޔޫތު އެންޑް ރެކްރިއޭޝަން ކުލަބު (ކޭވައިއާރުސީ)، ކުލަބު ގްރީން ސްޓްރީޓްސް އަދި ސްޕޯޓްސް ކުލަބު ޝައިނިންގް ސްޓާ ޖާގަ ހޯދައިފި އެވެ.
މި މަހުގެ 10 ވަނަ ދުވަހުން ފެށިގެން އަންނަ ހޯމަ ދުވަހުގެ ނިޔަލަށް ކުރިއަށްދާ މުބާރާތުގައި މި އަހަރު ވާދަކުރަނީ 11 ޓީމަކުންނެވެ. ޓީމުތައް ތިން ގްރޫޕަކަށް ބަހާލާފައިވާއިރު ސެމީ ފައިނަލުން ފުރުސަތު ލިބުނީ ކޮންމެ ގްރޫޕެއްގެ އެއް ވަނަ ޓީމާއި ދެ ވަނަ އަށް ދާ ޓީމުތަކުގެ ތެރެއިން އެންމެ ރަނގަޅު ނަތީޖާ ނެރޭ ޓީމެވެ.
މި ގޮތުން ގްރޫޕް އޭގައި ކުޅުނު ތިން މެޗުވެސް ކާމިޔާބުކޮށް ކުލަބު މެޓްރިކްސް ވަނީ ސެމީގެ ޖާގަ ހޯދައިފަ އެވެ. ގްރޫޕް ބީގެ އެއް ވަނަ ހޯދީ ކުލަބު ގްރީން ސްޓްރީޓްސް އެވެ. ގްރޫޕް ތިނެއްގެ އެއް ވަނަ ހޯދީ ކޭވައިއާރުސީ އެވެ. ދެ ވަނަ އަށް ދިޔަ ޓީމްތަކުގެ ތެރެއިން އެންމެ ރަނގަޅު ނަތީޖާ ނެރުނީ ޝައިނިންގް ސްޓާ އެވެ.
ސެމީ ފައިނަލުން ފުރުސަތު ނުލިބި ކެޓި ޓީމްތަކަކީ ގްރޫޕް އެކެއްގައި ވާދަކުރި ޔުނިޓީ ސްޕޯޓްސް ކުލަބު، ޒެނިތް ސްޕޯޓްސް ކުލަބު، ގްރޫޕް ބީގެ އެމްވީ ނެޓާސް، ސްޕޯޓްސް ކުލަބު ސްކައިލާކް، ޔޫތް ސްޕޯޓްސް ކުލަބު، ގްރޫޕް ސީގެ ލޮރެންޒޯ އަދި މަހިބަދޫ ސްޕޯޓްސް ކުލަބެވެ.
ނެޓްބޯޅަ އެސޯސިއޭޝަން ޗެމްޕިއަންޝިޕްގެ ސެމީ ފައިނަލް މެޗުތައް ކުޅޭނީ މާދަމާ ރޭ އެވެ. ފުރަތަމަ މެޗުގައި މެޓްރިކްސް ނުކުންނާނީ ކޭވައިއާރުސީއާ ދެކޮޅަށެވެ. ސެމީ ފައިނަލް ދެ ވަނަ މެޗުގައި ވާދަކުރާނީ ގްރީން ސްޓްރީޓްސް އާއި ޝައިނިންގް ސްޓާ އެވެ.
މުބާރާތުގެ ފައިނަލް މެޗު ކުޅުމަށް ހަމަޖެހިފައިވަނީ އަންނަ ހޯމަ ދުވަހު އެވެ.
