ބޮޑުކަންނެލި މަސްވެރިކަމާ ގުޅުންހުރި އިދާރާތަކުން މަސްވެރިންނާ މިއަދު ބައްދަލުކޮށްފި އެވެ.
އިކޮނޮމިކް މިނިސްޓްރީން ބުނީ ބޮޑުކަންނެލި މަސްވެރިކަން ކުރުމުގައި ހުރި ގޮންޖެހުންތަކާއި ކަންނެލި އެކްސްޕޯޓު ކުރަމުން އަންނަ ކުންފުނިތަކަށް ދިމާވަމުން އަންނަ މައްސަލަތައް ދެނެގަތުމަށް މިއަދު ބޮޑުކަންނެލި މަސްވެރިންގެ ޔޫނިއަން އަދި ބޮޑުކަންނެލި އެކްސްޕޯޓް ކުރުމުގެ ވިޔަފާރި ކުރަމުން އަންނަ އެމްއެސްޕީއީއޭ މޯލްޑިވްސްއާ ބައްދަލުކޮށް މަޝްވަރާ ކުރި ކަމަށެވެ.
އެ ބައްދަލުވާ ބެހޭ ގޮތުން ބޮޑުކަންނެލި މަސްވެރިންގެ ޔޫނިއަނުން ބުނީ މިއީ ބޮޑުކަންނެލި މަސްވެރިކަމުގައި ހަރަކާތްތެރިވަމުން އަންނަ ފަރާތްތަކަށް ބޭނުންތެރިި، މުހިންމު އަދި ފައިދާވި ބައްދަލުވުމެއް ކަމަށެވެ.
ބޮޑުކަންނެލީގެ މަސްވެރިކަމުގެ ސިނާއަތަށް ދިމާވެފައިވާ އެކި ގޮންޖެހުންތައް ހައްލުކުރުމަށް މިފަދަ ބައްދަލުވުންތަކުގެ މުހިންމުކަން އެ ޔޫނިއަނުން ވަނީ ފާހަގަކޮށްފަ އެވެ.
ބޮޑުކަންނެލި މަސްވެރިކަމަކީ ފައިދާ ކުރުވަނިވި މަސައްކަތެއް ނަމަވެސް މަސްވެރިންނަށް މި މަސައްކަތުން ހަމަ އަގު ނުލިބޭ މައްސަލަތަކަށް އަދިވެސް އެދެވިގެންވާ ހައްލެއް ނުލިބޭ ކަމަށް އެފަރާތްތަކުން ފާހަގަކުރެ އެވެ.
ބޮޑުކަންނެލީގެ މަސްވެރިކަން ރަނގަޅުވާ ދުވަސްވަރާ ދިމާކޮށް އަބަދުވެސް އަގުތައް ދަށަށްދެ އެވެ. އެގޮތުން އެ ދުވަސްވަރު 30 ކިލޯއިން މަތި ނަމަ ކިލޯއަކަށް 70ރ. އަދި 30 ކިލޯއިން ދަށް ނަމަ ކިލޯއެއް ގަންނަނީ 50ރ. އަށެވެ.
ބޮޑުކަންނެލީގެ މަސްވެރިން އެންމެ ބޮޑަށް ޑިމާންޑުކުރަމުން އަންނަނީ މަސްވެރިކަން ތިޔާގި ދުވަސްވަރު ވެސް އަގުތައް ވަކި މިންވަރަކަށްވުރެ ދަށަށް ދިޔަ ނުދިނުމަށްޓަކާ ބޮޑުކަންނެލި ގަނެވޭނެ އެންމެ ދަށް އަގު ކަނޑައެޅުމަށެވެ.
