ގިރާވަރު ފަޅު ހިއްކައިގެން ތަރައްގީ ކުރާ މީހުން ދިރިއުޅޭ ސިޓީއަށް ހަރަދު ކުރާ ފަރާތްތަކަށް ވެސް ކްރޮސްސަބްސިޑީގެ އުސޫލުގެ ދަށުން ބިން، ރަށް ނުވަތަ ފަޅު ދެވޭނެ ގޮތަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ހަމަޖައްސަވައިފި އެވެ.
ރައީސް ސޯލިހު 2021 ވަނަ އަހަރު ނެރުއްވި ގަރާރެއް އިސްލާހު ކުރައްވައި އިއްޔެ ނެރުއްވި އިރު ކްރޮސްސަބްސިޑީ ޕްރޮޖެކްޓުތަކުގެ ލިސްޓަށް ރީޖަނަލް އެއާޕޯޓްސްތަކުގެ އިތުރުން އޮތީ ގިރާވަރު ފަޅު ހިއްކުމާއި ތަރައްގީ ކުރުމުގެ ޕްރޮޖެކްޓު ހިމަނައްވައިފަ އެވެ.
ރައީސްގެ ގަރާރުގައިވާ ގޮތުގެ މަތިން ކްރޮސްސަބްސިޑީގެ އުސޫލުގެ ދަށުން ގިރާވަރު ހިއްކުމުގެ ޕްރޮޖެކްޓަށް ފަސް މިލިއަން ޑޮލަރު (77 މިލިއަން ރުފިޔާ) ފައިނޭންސް ކުރާ ފަރާތުން ހަރަދު ކުރަންޖެހޭނެ އެވެ.
ރީޖަނަލް އެއާޕޯޓުތަކަށް ހަރަދު ކުރާ ފަރާތްތަކުން މަދުވެގެން ތިން މިލިއަން ޑޮލަރު (46.2 މިލިއަން ރުފިޔާ) ހަރަދު ކުރަންޖެހޭނެ އެވެ. އެއީ ކުރިން ވެސް ހަމަޖެހިފައި އިން ގޮތެވެ.
ސަރުކާރުގެ ޕްރޮޖެކްޓުތަކަށް ހަރަދު ކުރާ ފަރާތްތަކަށް ބިމާއި ރަށް ދެވޭ ގޮތަށް ހަދާފައި ވަނީ ޓުއަރިޒަމާ ބެހޭ ގާނޫނުގެ ދަށުންނެވެ. އެ މާއްދާގައި ބުނެފައި ވަނީ މަޝްރޫއުތަކަށް ހަރަދު ކުރާ ފަރާތްތަކަށް ކްރޮސްސަބްސިޑީގެ ގޮތުގައި ރަށެއް ނުވަތަ ބިމެއް ނުވަތަ ފަޅެއް ދެވިދާނެ ކަމަށެވެ.
